பட்டாசு விபத்தில் 32 பேர் பலி: அதிகாரிகள்-போலீசார் 7 பேர் “சஸ்பெண்டு”

மீனு · மீனு Sun 18 Oct 2009 - 16:12

பள்ளிப்பட்டாசு விபத்து நடந்த பகுதியைச்சேர்ந்த காவற்துறை அதிகாரிகள் 7 பேர் சஸ்பெண்டு செய்யப்பட்டுள்ளனர்.

திருவள்ளூர் மாவட்டம் பள்ளிப்பட்டைச்சேர்ந்த ஆனந்தகுமார் சோளிங்கர் ரோட்டில் உள்ள நிலக்கடலை மில்லை வாடகைக்கு எடுத்து தீபாவளி பட்டாசு வியாபாரம் செய்தார். மில் குடோனில் ஏராளமான பட்டாசுகள் வைக்கப்பட்டு இருந்தன. நேற்று முன்தினம் இரவு 7 மணி அளவில் பட்டாசு வாங்குவதற்காக கூட்டம் அலைமோதியது. அப்போது திடீரென்று பட்டாசு குடோனில் தீ பிடித்தது. தீயில் பட்டாசுகள் பயங்கர சத்தத்துடன் வெடித்து சிதறியது. அந்த பகுதி முழுவதும் கரும்புகையுடன் நெருப்பு பிழம்பாக காட்சியளித்தது. தீயில் சிக்கியவர்கள் உயிர் பிழைக்க அங்கும் இங்கும் ஓடினார்கள்.

குடோனில் 3 அறைகள் இருந்தன. வெளியே வருவதற்கு சிறிய வாசல் மட்டுமே இருந்தது. வாசல் பகுதியில் மேஜை போட்டு “பில்” செலுத்தும் கவுண்டர் அமைத்து இருந்தனர். இதனால் குடோனுக்குள் சிக்கியவர்கள் தப்பிக்க முடிய வில்லை.

பள்ளிப்பட்டு தீயணைப்பு படையினர் விரைந்து வந்து தீயை அணைக்கும் பணியில் ஈடுபட்டனர். சுமார் 2 மணி நேரம் போராடி தீயை அணைத்தனர்.

அதற்குள் குடோன் அறையில் சிக்கிய அனைவரும் கருகி பலியாகி விட்டனர். அந்த அறை முழுவதும் உருத்தெரியாதபடி பிணங்கள் குவியல் குவியலாக கிடந்தன. இந்த கோர விபத்தில் மொத்தம் 32 பேர் பலியாகி விட்டனர்.

பலியானவர்களில் 5 பேர் தமிழ்நாட்டைச் சேர்ந்தவர்கள். மற்ற 27 பேரும் ஆந்திராவைச் சேர்ந்தவர்கள்.

ஆந்திராவை விட தமிழ் நாட்டில் பட்டாசு விலை குறைவு என்பதால் ஆந்திராவில் இருந்து ஏராளமானவர்கள் பள்ளிப்பட்டு பகுதிக்கு பட்டாசு வாங்க வருவது வழக்கம்.

இந்த தீபாவளிக்கும் குறைந்த விலைக்கு நிறைய பட்டாசு வாங்கலாமே என்ற ஆசையில் ஏராளமானவர்கள் ஆந்திராவில் இருந்து வந்தனர்.

தீ விபத்து பற்றி கேள்விப்பட்டதும் பட்டாசு வாங்க வந்தவர்களின் உறவினர்கள் விரைந்து வந்தனர். கரிக்கட்டையாக கிடந்த பிணங்களைப் பார்த்து அவர்கள் கதறி அழுதனர். அந்த பகுதி முழுவதும் மரண ஓலமாக இருந்தது.

இறந்து போனவர்களின் உடல்களை அடையாளம் காட்ட முடியாமல் உறவினர்கள் திணறினார்கள். கை கடிகாரம், பெல்ட், மோதிரம் போன்றவற்றை வைத்து அடையாளம் காட்டினார்கள்.

கருகி குவியலாக கிடந்த 32 பேரின் உடல்களையும் தனித்தனியாக மூட்டைகளில் கட்டி திருத்தணி அரசு ஆஸ்பத்திரிக்கு கொண்டு சென்றனர்.

திருவள்ளூர் மாவட்ட கலெக்டர் பழனிக்குமார், போலீஸ் டி.ஐ.ஜி. துரைராஜ் ஆகியோர் விரைந்து சென்று சம்பவ இடத்தை பார்வையிட்டு மீட்பு பணிகளை துரிதப்படுத்தினார்கள்.

அமைச்சர்கள் கே.பி.பி. சாமி, தா.மோ.அன்பரசன், ஆந்திர மாநில மந்திரி ராமச்சந்திர ரெட்டி, திருப்பதி தேவசம்போர்டு தலைவர் ஆதிகேசவலு ஆகியோரும் விரைந்து வந்தனர். பலியானவர்களின் உடலுக்கு அவர்கள் மலர் வளையம் வைத்து அஞ்சலி செலுத்தினார்கள்.

பிண பிரேத பரிசோதனை முடிந்ததும் ஆம்புலன்சுகளில் உடல்கள் சொந்த ஊருக்கு அனுப்பி வைக்கப்பட்டன.

தீ விபத்துக்கான காரணம் பற்றி மாவட்ட வருவாய் அதிகாரி மோகனசுந்தரம் விசாரணை நடத்தினார்.

பள்ளிப்பட்டு பஜாரில் பட்டாசு விற்க குப்பையா ரெட்டி என்பவர் 1996-ல் உரிமம் பெற்று இருந்தார். அதன் பிறகு உரிமத்தை புதுப்பிக்கவில்லை. அவரது மகன் ஆனந்தகுமார் (40) ஜெய்சங்கர் என்பவருக்கு சொந்தமான நிலக்கடலை மில் குடோனை வாடகைக்கு எடுத்து பட்டாசு வியாபாரம் செய்துள்ளார்.

இதையடுத்து பட்டாசு விற்பனையாளர் ஆனந்தகுமார், மில் உரிமையாளர் ஜெய்சங்கர், உதவியாளர் மதுமோகன் ஆகிய 3 பேரும் கைது செய்யப்பட்டனர்.

தாசில்தார் ஜான்பெல் லார்மின், துணை தாசில்தார் சங்கரி, வருவாய் ஆய்வாளர் அருண்குமார், கிராம நிர்வாக அதிகாரி செய்யது பாபு, ஆர்.கே.பேட்டை போலீஸ் இன்ஸ்பெக்டர் வெங்கடேசன், பள்ளிப்பட்டு போலீஸ் சப்-இன்ஸ்பெக்டர் கோபால், தனிப்பிரிவு போலீஸ் ஏட்டு பாலசுப்பிர மணியன் ஆகிய 7 பேரும் சஸ் பெண்டு செய்யப்பட்டுள்ளனர்.

அதிகாரிகள் நடத்திய முதல் கட்ட விசாரணையில் ஆந்திராவைச் சேர்ந்த 2 பேர் குடிபோதையில் பட்டாசு வாங்க வந்ததாகவும், அவர்கள் கையில் வைத்திருந்த சிகரெட்டில் இருந்து விழுந்த தீப்பொறியால் விபத்து ஏற்பட்டிருப்பதாகவும் தெரிய வந்துள்ளது.

பட்டாசு விபத்தில் 32 பேர் பலி: அதிகாரிகள்-போலீசார் 7 பேர் “சஸ்பெண்டு”

பட்டாசு விபத்தில் 32 பேர் பலி: அதிகாரிகள்-போலீசார் 7 பேர் “சஸ்பெண்டு”

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக