இணையதளம் மூலம் நடத்திய கருத்து கணிப்பில், அரசு பேருந்துகள் மீது, பொதுமக்கள் கூறிய புகார்களுக்கு நடவடிக்கை எடுக்கும் பணியை, போக்குவரத்து துறை முடுக்கி விட்டுள்ளது.அதேபோல், பொதுமக்கள் கூறும் புகார்களை ரகசியமாக அறிய, போக்குவரத்து அலுவலர்கள், வாரத்தில் ஒருநாள் மாநகர பேருந்தில் பயணித்து, அறிக்கை அளிக்க வேண்டும் என, அறிவுறுத்தப்பட்டுள்ளது.
-
சென்னை மாநகர போக்குவரத்து கழகம், பேருந்து இயக்கம் குறித்து, பொதுமக்கள் கருத்தறியும் பணியை நடத்தியது. கடந்தாண்டு, இணையதளம் மூலம் நடத்திய கருத்து கணிப்பில், ஏராளமானோர் தங்கள் கருத்துக்களை பதிவு செய்துள்ளனர்.பெரும்பாலானோர் ஓட்டுனர்கள் மற்றும் நடத்துனர்களின் அணுகுமுறைசரியில்லை; பள்ளி, கல்லூரி மாணவர்களுக்கும், ஓட்டுனர், நடத்துனருக்கும் இடையேயானமோதலுக்கு தீர்வு காண வேண்டும்; காலை, மாலை நேரங்களில், "கட்' சர்வீஸ் சேவையை அதிகப்படுத்த வேண்டும் என்பன உள்ளிட்ட பல ஆலோசனைகளை தெரிவித்திருந்தனர்.பேருந்து இயக்கத்தை மேம்படுத்த,மற்ற போக்குவரத்து கழகங்களிலும், பொதுமக்கள் கருத்தறியும் பணியை, போக்குவரத்து துறை துவக்கியுள்ளது. இந்நிலையில், பொதுமக்கள் கூறிய புகார்களின் மீது நடவடிக்கை எடுக்கும் பணியை, போக்குவரத்து துறை துரிதப்படுத்தி உள்ளது.
-
முதல் கட்டமாக, போக்குவரத்து அதிகாரிகள், வாரத்தில் ஒருநாள், பேருந்தில் பயணித்து, பொதுமக்கள் கூறும் நிறை, குறைகள் மற்றும் பேருந்து இயக்கத்தை மேம்படுத்த தெரிவிக்கும் ஆலோசனைகளை, தவறாமல் அறிக்கையாக அளிக்க வேண்டும் என, தெரிவிக்கப்பட்டுள்ளது.
-
இதுகுறித்து, போக்குவரத்து துறை உயர் அதிகாரி கூறியதாவது: கருத்து கணிப்பில், பொதுமக்கள் கூறிய, புகார்கள் மீது நடவடிக்கை எடுத்து வருகிறோம். ஒரு சில பரிந்துரைகள் மீதான நடவடிக்கையை, அரசு தான் முடிவு செய்யும். ஏற்கனவே, கருத்துகளை அறிக்கையாக அரசுக்கு அனுப்பியுள்ளோம்.
-
கட்டாய பயணம்:
இருப்பினும், பேருந்து சேவையை மேம்படுத்த, புதிய முயற்சியை, போக்குவரத்து துறை எடுத்துள்ளது. அதன்படி, முதல்கட்டமாக, வாரத்தில் ஒருநாள் மாநகர பேருந்துகளில், அனைத்து அதிகாரிகளும் பயணிக்க வேண்டும்.பயணம் செய்யும் போது, பயணிகள் கூறும் புகார்கள் மற்றும் ஆலோசனைகளை பதிவு செய்து, பொது மேலாளர்களுக்கு அறிக்கையாக அனுப்ப வேண்டும்.மாநகர போக்குவரத்து கழக அதிகாரிகள், தவறாமல் பயணித்து, பயணம் செய்த தடம் எண், நாள், சர்வீஸ், நேரம், பேருந்தின் பக்கவாட்டு எண், எந்த பணிமனையை சார்ந்த பேருந்து போன்ற விவரங்களுடன் அறிக்கை இருக்க வேண்டும் என, அறிவுறுத்தியுள்ளோம்.
-
ஏமாற்ற முடியாது:
பொதுமக்கள் தெரிவிக்கும் விமர்சனங்களை, ரகசியமாக பதிவு செய்ய அறிவுறுத்தப்பட்டுள்ளது. அதிகாரிகள் பேருந்தில் பயணம் செய்யாமல், ஏமாற்றுவதை தடுக்க, பல நடவடிக்கைகள் எடுக்கப்பட்டுள்ளன.அதிகாரிகள் அனுப்பும் அறிக்கையை,நிதிக்குழு மற்றும் இயக்குனர் குழு கூட்டத்திலும் ஆய்வு செய்யப்படும். மற்ற போக்குவரத்து கழகங்களில், இத்திட்டம் விரைவில் அமல்படுத்தப்படும்.இவ்வாறு அவர் கூறினார்.
-
தினமலர்

உத்தரவு மூலமின்றி தன்னார்வ கடமையாக ஒவ்வெருவரும் நினைத்து செயல்படாத வரை இது முழுமையடையுமா என்பது கேள்விக்குறியே

இந்த பஸ்ஸை உருட்டோ உருட்டுன்னு உருட்டுராங்களே அதை பற்றி எதாவது நடவடிக்கை எடுத்தால் ரொம்ப நல்லது.

நல்ல விஷயமே...

கரூர் கவியன்பன் wrote:உத்தரவு மூலமின்றி தன்னார்வ கடமையாக ஒவ்வெருவரும் நினைத்து செயல்படாத வரை இது முழுமையடையுமா என்பது கேள்விக்குறியே