ஒரத்தநாட்டில் வேப்பமரத்தில் பால் வடிந்ததால் பொதுமக்கள் சிறப்பு அபிஷேகம்..

DERAR BABU · DERAR BABU Fri Feb 08, 2013 10:02 am

ஒரத்தநாடு மாதா கோவில் அருகே வேப்ப மரம் உள்ளது. இந்த மரத்தில் நேற்று அதிகாலை முதல் பால் வடிந்து கொண்டே இருந்தது. இதனை அப்பகுதி மக்கள் ஆச்சரியத்துடன் பார்த்தனர். பின்னர் பால் வடியும் தகவல் ஆர்.வி.நகர், யானைக்காரத் தெரு, தென்னமநாடு, தெலுங்கன் குடிக்காடு, புதூர் மற்றும் அதனைச் சுற்றியுள்ள மக்களுக்கு காட்டுத் தீ போல் பரவியது.

பொதுமக்கள் சம்பவ இடத்திற்கு வந்து வேப்ப மரத்தில் பால் வடிவதை வியப்புடன் பார்த்தனர். இதனைத்தொடர்ந்து அப்பகுதி பூசாரி ஒருவரை அழைத்து அந்த மரத்தில் மஞ்சள் துணி கட்டினர். பின்னர் சந்தனம், குங்குமம் ஆகியவற்றை மரத்தில் தடவினர். அம்மன் இங்கு குடிபுகுந்துள்ளார். உங்கள் அனைவருக்கும் அம்மன் அருள் புரிய உள்ளார். அதனால் தான் இந்த வேப்ப மரத்தில் பால் வடிகிறது என பூசாரி திடீரென அருள் வந்து கூறினார்.

இதனால் அப்பகுதி மக்கள் வடியும் பாலை பயபக்தியுடன் செம்பில் பிடித்து தங்களின் விருப்ப தெய்வங்களுக்கு சிறப்பு அபிஷேகம் செய்து வருகின்றனர்.
பால் வடியும் மரத்தின் அருகிலேயே மாதா கோவில் உள்ளதால் பொதுமக்கள் கூட்டம் கூட்டமாக சென்று ஆச்சரியத்துடன் பார்த்த வண்ணம் உள்ளனர். இதனால் அப்பகுதியில் பரபரப்பு நிலவி வருகிறது..

மாலைமலர்