கற்பழிப்புக்கு தண்டனை; வர்மா குழு பரிந்துரை ஏற்கப்படும் -பிரதமர்

கற்பழிப்பு வழக்குகள் தொடர்பான சட்டங்களில் திருத்தம் செய்வது பற்றிய வர்மா குழு சிபாரிசுகளை பின்பற்ற அரசு தயாராக இருப்பதாக பிரதமர் மன்மோகன்சிங் கூறினார்.

டெல்லியில் கடந்த டிசம்பர் மாதம் 16 ஆம் தேதி நள்ளிரவு ஓடும் பேருந்தில் மருத்துவ மாணவி கற்பழிக்கப்பட்டார். சிங்கப்பூர் மருத்துவமனையில் சிகிச்சை பலனின்றி அவர் டிசம்பர் 29 ஆம் தேதி உயிரிழந்தார். நாடு முழுவதும் இச்சம்பவம் கொந்தளிப்பை ஏற்படுத்தியது. தற்போதைய நிலையில் கற்பழிப்பு குற்றத்துக்கு 7 ஆண்டு ஜெயில் முதல் ஆயுள் தண்டனைவரை மட்டுமே விதிக்க முடியும். மரண தண்டனை விதிக்க சட்டத்தில் வழி இல்லை. எனவே கற்பழிப்பு குற்றத்துக்கு மரண தண்டனை போன்ற கடுமையான தண்டனை விதிக்க வேண்டும் என்று பல்வேறு தரப்பிலும் குரல் எழுந்தது. இதையடுத்து, சட்ட திருத்தம் கொண்டு வருவது குறித்து சிபாரிசு செய்வதற்காக ஓய்வு பெற்ற உச்சநீதிமன்றத் தலைமை நீதிபதி ஜே.எஸ்.வர்மா தலைமையில் 3 பேர் கொண்ட குழுவை மத்திய அரசு அமைத்தது.

அந்தக்குழு 30 நாட்களுக்குள் ஆய்வை முடித்துக் கொண்டு, கடந்த 23 ஆம் தேதி மத்திய அரசிடம் தனது அறிக்கையை சமர்ப்பித்தது. அதில் கற்பழிப்பு குற்றவாளிகளுக்கு கடுமையான தண்டனை விதிக்கும் வகையில் குற்றவியல் சட்டத்தில் திருத்தங்கள் செய்ய வேண்டும் என்று சிபாரிசு செய்தது. கற்பழித்து கொலை குற்றத்துக்கு 20 ஆண்டுகள் வரை சிறை தண்டனையும், கூட்டு கற்பழிப்புக்கு ஆயுள் தண்டனையும் விதிக்குமாறு சிபாரிசு செய்துள்ளது. ஆனால், மரண தண்டனை விதிக்குமாறு வலியுறுத்தவில்லை.

இந்நிலையில், நீதிபதி ஜே.எஸ்.வர்மாவுக்கு பிரதமர் மன்மோகன்சிங் கடிதம் எழுதி உள்ளார். அதில் பிரதமர், தங்களிடம் ஒப்படைத்த பணியை குறுகிய காலத்தில், அதாவது 30 நாட்களில் முடித்து ஒப்படைத்தமைக்காக நன்றி தெரிவித்து கொள்கிறேன். பொது நலனில் உங்களுக்கு எவ்வளவு அக்கறை இருக்கிறது என்பதற்கு இதுவே உதாரணம். தங்கள் குழுவின் சிபாரிசுகளை பின்பற்ற அரசு தயாராக இருக்கிறது என்று அரசின் சார்பில் உறுதி அளிக்கிறேன் என்று பிரதமர் மன்மோகன் சிங் தெரிவித்துள்ளார்.

http://tamil.webdunia.com