சிவனே முருகன் – முருகனே சிவன்!

சிவபெருமானைத் தந்தையென்றும், உமையம்மையைத் தாயென்றும், முருகனைப் புதல்வனென்றுஞ் சொல்லப்படுவதும் புராணமுறை. இம்முறை பற்றி அன்பர்கள் பரம்பொருளைப் போற்றி வருவது நமது நாட்டு வழக்கத்தையுடையது. நாட்டுக் கல்வி அருகியுள்ள இந்நாளில் இவ்வழக்கின் பொருள் முதலியன மறைந்து கிடக்கின்றன. என் செய்வது?

‘தந்தை தாய் முதல்வன்’ என்று புராணம் கூறும் முறையின் உட்பொருளை விரித்துக் கூறவேண்டுவதில்லை. பரம்பொருள் சச்சிதானந்த (சத் சித் ஆனந்தம் – உண்மை அறிவு ஆனந்தம்) மயமாயிருப்பது என்பதைத் தந்தை தாய் சேய் என்று புராணங் கூறுகிறது.

சத்-உண்மை-சிவம்
சித்-அறிவு-சத்தி
ஆனந்தம்-இன்பம்-குகன்.

இவ்வுண்மையை உலகிற்கு உணர்த்துவதே சோமாஸ்கந்த மூர்த்தம் என்பது. (உமையோடு கூடிய ஒருவனும் கந்தனும் என்றபடி) சத் சித் ஆனந்தமென்னும் மூன்றும் சொல்லால் வேறுபட்டிருப்பது போலத் தோன்றினும், அவை பொருளால் ஒன்றையே குறிப்பனவாம்.

அகல நீள உயரங்கொண்ட ஒரு பொருளை எடுத்துக் கொள்வோம். அகலம் நீளம் உயரம் என்னும் மூன்றும் தனித்தனி பிரிந்து நிற்பனவா என்றும், இவை தம்மைக் கொண்டுள்ள பொருளை விடுத்தாதல் நீங்கி நிற்பனவா என்றும் கூர்ந்து நோக்குவோமாக. நோக்கின் மூன்றும், ஒன்றை விடுத்தொன்று பிரிந்து நில்லா என்பதும், தம்மைக் கொண்டுள்ள பொருளையும் விடுத்து நீங்கி நில்லா என்பதும் செவ்வனே விளங்கும்.

அகல நீள உயரம் போன்றன சத் சித் ஆனந்தம். இம்மூன்றையுடைய பொருள் போன்றது பரம்பொருள். இதனை பாம்பன் குமரகுருதாச சுவாமிகள் தமது ‘திருவலங்கற்றிரட்டு’ என்னும் நூற்கண்,

"எதிலே நீளமோ அதிலே அகலமும் - எதிலே அகலமோ அதிலே நீளமும்
எதிலே கனமோ அதிலே நீளமும் - எதிலே நீளமோ அதிலே கனமும்
எதிலே அகலமோ அதிலே கனமும் - எதிலே கனமோ அதிலே அகலமும்
உண்டன்னணமே யுணரின் முறையே
எங்கே அறிவோ அங்கே உண்மையும் - எங்கே உண்மையோ அங்கே அறிவும்
எங்கே இன்பமோ அங்கே அறிவும் - எங்கே அறிவோ அங்கே இன்பமும்
எங்கே இன்பமோ அங்கே உண்மையும் - எங்கே உண்மையோ அங்கே இன்பமும்
எங்கே சிவையோ அங்கே சிவமும் - எங்கே சிவமோ அங்கே சிவையும்
எங்கே சேயோ அங்கே சிவையும் - எங்கே சிவையோ அங்கே சேயும்
எங்கே சேயோ அங்கே சிவமும் - எங்கே சிவமோ அங்கே சேயும்
ஆமென்றறிவர் தாமே அறிஞர் – போமுன்றெரிவீர் பூமியுளீரே”

என்று விளங்க ஓதியிருத்தல் காண்க.

(தொடரும்)
திரு.வி.க எழுதிய “முருகன் அல்லது அழகு” நூலில் இருந்து.