பத்துமலையில் களைகட்டும் தைப்பூசத் திருவிழா

**சிவா** · **சிவா** Tue Jan 22, 2013 5:06 pm

கோலாலம்பூர், ஜனவரி 21 – இம்மாதம் 27-ஆம் தேதி நாடு தழுவிய நிலையில் தைப்பூச திருவிழா மிகவும் விமரிசையாக அனுசரிக்கப்படவுள்ளது. இந்தியர்களின் முதன்மை பண்டிகைகளுள் ஒன்றாக திகழும் இவ்விழா, மலேசியாவில் மிகவும் விமரிசையாக கொண்டாடப்படும் ஒரு திருவிழாவாகும். இத்திருநாள் பல மாநிலங்களில் கொண்டாடப்பட்டாலும் பத்துமலை திருத்தலம் மற்றும் பினாங்கு தண்ணீர்மலை கோவிலில் மிகவும் சிறப்பாக கொண்டாடப்படும்.

நேற்று தொடங்கி பத்துமலை திருத்தலத்தில், முறுகப்பெருமானுக்கு காணிக்கை செலுத்தும் பக்தர்களின் எண்ணிக்கை அதிகரித்த வண்ணம் இருக்கிறது.

பால்குடம், காவடி, முடிக்காணிக்கை, கரும்புத் தொட்டில்கள் என பத்துமலையே திருவிழாக் கோலமாக திகழ்ந்தது. முடிந்த வார இறுதி நாட்களில் மட்டும் சுமார் 30 ஆயிரத்திற்கும் மேற்பட்ட பக்தர்கள் இத்திருத்தலத்தில் கூடியிருந்ததாக கூறப்படுகின்றது.

இவ்வாண்டு தைப்பூச திருவிழாவிற்கு வருகை புரியும் பக்தர்களின் எண்ணிக்கை 15 லட்சம் வரை அதிகரிக்கும் என தேவஸ்தான தலைவர் டத்தோ ஆர்.நடராஜா தெரிவித்தார். நேர்த்திக் கடன் செலுத்த வருவோரின் வசதிக்காக சிறப்பு ஏற்பாடுகள் செய்யப்பட்டுள்ளன என அவர் குறிப்பிட்டார்.

பக்தர்களின் வசதிக்காக, சிறப்பு பொது போக்குவரத்து சேவைகளும் மேற்கொள்ளப்படவுள்ளது.

மேலும், பக்தர்களின் பாதுகாப்பை உறுதி செய்ய 1000 போலிஸ் அதிகாரிகள் கடமையில் ஈடுபடவுள்ளதாக சிலாங்கூர் மாநில துணைப் போலிஸ் தலைவர் டத்தோ தெய்வீகன் தெரிவித்துள்ளார்.

வணக்கம் மலேசியா