வரும் மார்ச் 31 வரை மேலும் 2 மானிய சிலிண்டர் வாங்கலாம்.........

மத்திய அரசின் உத்தரவுப்படி வரும் மார்ச் மாதம் வரை மேலும் 2 கேஸ் சிலிண்டர்களை பொதுமக்கள் மானிய விலையில் பெற்றுக் கொள்ளலாம் என இண்டேன் கேஸ் நிறுவன அதிகாரி தெரிவித்துள்ளார்.

மானிய விலையில் வீடுகளுக்கு வழங்கப்படும் கேஸ் சிலிண்டர் எண்ணிக்கையை ஆண்டுக்கு 6 என குறைத்து மத்திய அரசு திடீரென அறிவித்தது. கடந்த ஆண்டு செப்டம்பரில் இது நடைமுறைக்கு வந்தது. செப்டம்பர் முதல் மார்ச் வரை இந்த நிதியாண்டின் 6 மாத காலத்துக்கு மானிய விலையில் 3 சிலிண்டர் மட்டுமே வழங்கப்படும் என்றும், அதன் பிறகு அதிக விலையில் சிலிண்டரை வாங்கிக் கொள்ள வேண்டும் எனவும் அறிவிக்கப்பட்டது.

அதன்படி, கடந்த அக்டோபர் முதல் 3 சிலிண்டர்கள் மட்டும் மானிய விலையில் வழங்கப்பட்டன. அதன்பிறகு தேவைப்படுவோர் ரூ.900 கொடுத்து சிலிண்டர் வாங்கினர். சிலிண்டர் எண்ணிக்கை குறைப்புக்கு நாடு முழுவதும் கடும் எதிர்ப்பு கிளம்பிய நிலையில், தனது முடிவை அரசு மறுபரிசீலனை செய்தது. இதையடுத்து, மானிய விலை சிலிண்டர் எண்ணிக்கையை ஆண்டுக்கு 9 ஆக உயர்த்துவது என நேற்று நடந்த மத்திய அமைச்சரவை கூட்டத்தில் முடிவு செய்து அறிவிக்கப்பட்டது.

இது குறித்து மத்திய பெட்ரோலிய துறை அமைச்சர் வீரப்ப மொய்லி கூறுகையில், மானிய விலையில் வழங்கப்படும் கேஸ் சிலிண்டர் எண்ணிக்கை 6 லிருந்து 9 ஆக உயர்த்தி வழங்கப்படும். இது ஏப்ரல் 1-ம் தேதி முதல் நடைமுறைக்கு வரும். கடந்த செப்டம்பரில் இருந்து வரும் மார்ச் வரையிலான அரையாண்டுக்கு மானிய விலையில் 5 சிலிண்டர்களை பெற்றுக் கொள்ளலாம். மேலும் விலையிலும் எந்த மாற்றமும் இல்லை என்று அறிவித்தார்.

ஆனால் கேஸ் ஏஜென்சியினர், மத்திய அரசின் உத்தரவு ஏப்ரலில் தான் அமலுக்கு வருகிறது. அதுவரை அதிக விலை கொடுத்துதான் சிலிண்டர் வாங்க வேண்டும் என கூறி வருகின்றனர். இது நுகர்வோர் மத்தியில் குழப்பத்தை ஏற்படுத்தியுள்ளது.

இதுகுறித்து இண்டேன் கேஸ் நிறுவன அதிகாரி ஒருவரிடம் கேட்டபோது, கடந்த ஆண்டு செப்டம்பர் 13-ஆம் தேதிக்கு முன்பு இருந்த நடைமுறையை கவனத்தில் எடுத்துக் கொள்ளக் கூடாது. செப்டம்பர் 14 முதல் வரும் மார்ச் 31 வரை மானிய விலையில் 5 சிலிண்டர்கள் வழங்கப்படும்.

ஏற்கனவே 3 சிலிண்டர் மானிய விலையில் வாங்கிய பிறகு, 4-வதாக சிலிண்டர் வாங்கியவர்கள் மானியம் இல்லாமல் அதிக விலை கொடுத்து வாங்கி இருக்கலாம். அவர்கள் அந்த கூடுதல் தொகையை திரும்ப பெற இயலாது. அதே நேரத்தில் அவர்கள் மார்ச் வரை மேலும் 2 சிலிண்டர்களை மானிய விலையில் பெற்றுக் கொள்ளலாம்.

பொதுமக்களுக்கு இதில் ஏதேனும் சிக்கல் ஏற்பட்டால் உடனே புகார் தெரிவிக்கலாம். மானிய விலையில் மீதம் உள்ள சிலிண்டரை தர மறுக்கும் ஏஜென்சிகள் மீது கடும் நடவடிக்கை எடுக்கப்படும். ஏப்ரல் மாதம் முதல் ஆண்டுக்கு 9 சிலிண்டர் என்பது நடைமுறைக்கு வந்துவிடும் என்று தெரிவித்தார்.

வெப்துனியா