திருக்குட நன்னீராட்டு (எ) கடவுள் மங்கலம்!

**சாமி** · **சாமி** Wed Jan 16, 2013 8:55 pm

கைவினை முற்றிய தெய்வப் படிமத்து
வித்தகர் இயற்றிய விளங்கிய கோலத்து
முற்றிழை நன்கலம் முழுவதும் பூட்டிப்
பூப்பலி செய்து காப்புக்கடை நிறுத்தி
வேள்வியும் விழாவும் நாடொறும் நிறுத்தி
கடவுள் மங்கலம் செய்கென ஏவினென்

மேலே காணப்படும் வரிகள் சிலப்பதிகாரத்தில் உள்ளவை(சிலப்பதிகாரம் 28: 228-233). அந்த வரிகளில் கடவுள் உருவச் சிலையை நாட்டி குடமுழுக்கு (வடமொழி வார்த்தை கும்பாபிசேகம்) செய்வதைப்பற்றி வருகிறது. அதற்கான வேள்வி புலை வேள்வியாக அல்லாமல் (ஆரியர்களது வேள்வி புலை வேள்வி) புனித வேள்வியாக, அங்கே பூப்பலி மட்டும் செய்யப்படுவது குறிப்பில் கொள்ளத்தக்க செய்தி. அத்துடன் இன்று நாம் குடமுழுக்கு (கும்பாபிசேகம்) என்று கூறுவதை மிக அழகிய தமிழில் இளங்கோ அடிகள் கடவுள் மங்கலம் செய்தல் என்று கூறுவது எண்ணி எண்ணி மகிழத்தக்கது.

இந்த குட முழுக்கு வகைகள் எத்தனை?
திருக்குட நன்னீராட்டு நான்கு வகைப்படும். அவை
1.புதுக்கோயில் நன்னீராட்டு
2. மீண்டெழு புதுக்கோயில் நன்னீராட்டு
3. புதுக்கக்கோயில் நன்னீராட்டு
4. புனிறு நீக்கக் கோயில் நன்னீராட்டு

1.புதுக்கோயில் நன்னீராட்டு
கோயிலே இல்லாமல் புதியதாய்க் கோயில் கட்டி திருக்குட நன்னீராட்டி, கடவுள் மங்கலம் செய்தல்.

2. மீண்டெழு புதுக்கோயில் நன்னீராட்டு
வெகு காலத்திற்கு முன் கோயில் கட்டி பூசையில்லாமல், திருவுருவப் படிமங்கள் நிலை குலைந்து போயிருக்க, பூமியில் பாதி புதைந்தும் புதையாமலும் உள்ள அவற்றை எடுத்துச் சீர்திருத்தி அங்கே புதிய கோயில் எழுப்பி, திருக்குட நன்னீராட்டி, கடவுள் மங்கலம் செய்தல்.

3. புதுக்கக்கோயில் நன்னீராட்டு
கோயில் மண்டபங்கள், விமானக் கருவறை ஆகியவற்றைச் சீர்திருத்தி அமைத்து, திருவுருவப் படிமத்தை நிலைசெய்த எண்மருந்து இற்றுப்போயிருக்க, அதைப் புதியதாகச் சாத்தி நிலைப்பாட்டை உறுதி செய்து விமானங்களுக்கு வர்ணம் தீட்டி இவை போன்ற திருப்பணிகளைச் செய்து எழில் புதுக்கியபின் திருக்குட நன்னீராட்டி, கடவுள் மங்கலம் செய்தல்.

4. புனிறு நீக்கக் கோயில் நன்னீராட்டு
கருவறைச் சுற்றுப்பிரகாரம் முதல் கோயிலில் உள்ள இறுதிச் சுற்றுவரை எங்காயினும் திடீர் மரணம் நேர்ந்தாலும், கொடிக்கம்பத்தினைத் தாண்டி தீட்டுடையவர்கள் வந்துவிட்டாலும், நாய், கழுதை, பன்றி போன்ற அசுத்த விலங்குகள் கோயிலின் உள்ளே வந்துவிட்டாலும், புனிறு நீங்க- அதாவது தீட்டு நீங்க, புனிதம் காக்கத் திருக்குட நன்னீராட்டிக் கடவுள் மங்கலம் செய்தல்.

(திரு.மு.பெ.ச அவர்கள் எழுதிய தமிழ் அருட்சுனைஞர் பட்டயப்பாடநூலில் இருந்து)

திருக்குட நன்னீராட்டு (எ) கடவுள் மங்கலம்!

திருக்குட நன்னீராட்டு (எ) கடவுள் மங்கலம்!

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக