பாதிப்பு தரும் புத்தக சுமை!

**Tamilzhan** · **Tamilzhan** Thu Oct 15, 2009 8:02 pm

பாதிப்பு தரும் புத்தக சுமை!

இன்றைய நாட்களில் பள்ளிக்கூடம் செல்லும் மாணவ-மாணவியர் பொதி மூட்டை சுமப்பதுபோல் நோட்டு-புத்தகங்களை சுமந்து செல்வதை காண முடிகிறது. இவ்வாறு சுமையோடு செல்லும் மாணவ-மாணவிகளின் முதுகுத்தண்டு நாளடைவில் பாதிக்கப்பட்டு விடுகிறது.
இதுபற்றிய விழிப்புணர்வை பொதுமக்களிடம் ஏற்படுத்த இங்கிலாந்தில் உள்ள ஒரு தனியார் அமைப்பு முடிவு செய்தது. அதையொட்டிய பிரசாரத்தை அவர்கள் அங்குள்ள தொலைக்காட்சி மூலம் தொடங்கி வைத்தார்கள்.
அதுபற்றி அவர்கள் கூறியதாவது :

"அதிக சுமையாக புத்தகங்களை சுமந்து செல்லும் மாணவ-மாணவியருக்கு முதுகுத்தண்டு பாதிப்பு ஏற்படுவதோடு மட்டுமின்றி, அவர்களது வளர்ச்சியும் பாதிக்கப்படுகிறது. இந்த பள்ளி வயதில்தான் அவர்களது உடல் வளர்ச்சி அதிகமாக காணப்படும். அந்தநேரத்தில், அவர்களிடம் அதிக சுமையை திணிப்பது தவறான செயல்.

இங்கிலாந்தை பொறுத்தவரை 50 சதவீதத்திற்கு மேற்பட்ட மாணவ-மாணவியர் அதிக புத்தக சுமை காரணமாக இந்த பிரச்சினைகளுக்கு ஆளாகி இருக்கிறார்கள். ஒவ்வொரு குழந்தைகளின் பெற்றோரும் இந்த விஷயத்தில் தனிக்கவனம் செலுத்த வேண்டும்.

அதாவது, தங்கள் குழந்தைக்கு அன்றைய பள்ளி வகுப்பில் என்ன புத்தகங்கள் தேவை என்பதை குழந்தையிடம் கேட்டறிந்து, அந்த புத்தகங்களை மாத்திரம் கொண்டு செல்ல அனுமதிக்க வேண்டும். இப்படிச் செய்வதால், குழந்தைகள் தேவையற்ற புத்தகங்களை பள்ளிக்கு எடுத்துச் செல்வதை தவிர்க்கலாம்'' என்றனர் அவர்கள்.

இதுதவிர, இன்னொரு முக்கியமான விஷயத்தையும் அப்போது அவர்கள் தெளிவுபடுத்தினர். அதாவது, அதிக புத்தக சுமையுடன் செல்லும் மாணவர்கள் படிப்பில் பின்தங்கி விடுகிறார்களாம். அதற்கு காரணம், அந்த சுமையால் ஏற்படுகிற மனஅழுத்தம் தானாம்.

நம்மூர் குழந்தைகளும் பள்ளிக்கு இதுபோன்று புத்தக சுமையுடன்தான் செல்கிறார்கள். நம்மவர்களும் இதுவிஷயத்தில் உஷார் ஆனால் தேவையற்ற பிரச்சினைகளை தவிர்க்கலாம் தானே...?