அழிவு பாதையை நோக்கி அட்டை உற்பத்தி தொழில்

அழிவு பாதையை நோக்கி அட்டை உற்பத்தி தொழில்

தமிழக அரசின், விலையில்லா நோட்டு புத்தக திட்டத்தை, மற்ற மாநில அரசுகளும் பின்பற்ற உள்ளதால், அட்டை உற்பத்தி தொழில், அழிவு பாதையை நோக்கி செல்கிறது.
தமிழகம் முழுவதும், 4,000க்கும் மேற்பட்ட, அட்டை உற்பத்தி தொழிற்சாலைகள் உள்ளன. அனைத்து மாவட்டத்தில் இயங்கும், பேப்பர் மில்களில் இருந்து பெறப்படும் பேப்பர் கழிவுகள், மற்றும் சில கழிவுகளை கொண்டு அட்டைகள் தயாரிக்கப்படுகின்றன.
தயாரிக்கப்படும் அட்டைகள், காலண்டர், நோட்டுக்கள், புத்தக பைண்டிங், பெட்டி தயாரிப்பு ஆகியவற்றுக்கு பயன்படுத்தப்படுகிறது.ஆரம்ப காலத்தில், அனைத்து மாணவ, மாணவியரும், காலண்டர் தயாரிப்பாளர்களும், அதிகளவில் அட்டைகளை பயன்படுத்தினர். அட்டை உற்பத்தி தொழில் கொடிக்கட்டி பறந்தது.ஆனால், பிளாஸ்டிக் அட்டை, காகித அட்டை ஆகியவை, அட்டை உற்பத்தி தொழிலுக்கும், "ஆப்பு' வைத்தது. எனினும், மாணவ, மாணவியர் பயன்படுத்தும், நோட்டு, புத்தகம் ஆகியவற்றின் தேவை இருந்ததால், அட்டை உற்பத்தி தொழில் நடந்து வந்தது.ஆனால், அரசின் இலவச திட்டம், பிளாஸ்டிக் அட்டை பயன்பாடு அதிகரிப்பால்,
அட்டை உற்பத்தி தொழில் முற்றிலும் நலிவடைந்தது.ஈரோடு அட்டை உற்பத்தியாளர் சங்க செயற்குழு உறுப்பினர் கோபாலகிருஷ்ணன் கூறியதாவது: அட்டை உற்பத்தியில், மாநில அளவில் லட்சக்கணக்கான தொழிலாளர்கள் ஈடுபட்டுள்ளனர். ஈரோடு, திருச்செங்கோடு, கரூர், நாமக்கல் மாவட்டத்தில் மட்டும், நூறுக்கும் மேற்பட்ட,அட்டை உற்பத்தி ஆலைகள் உள்ளன.பள்ளிபாளையம் பேப்பர் மில், கரூர் பேப்பர் மில்லில் இருந்து, "பில்டர் கேக்குகள்' என்ற கச்சாப்பொருள் ஒரு டன், 575 முதல், 595 ரூபாய்க்கு பெறப்படும். அதை கூழாக்கி, சுற்றுச்சூழலுக்கு
பாதிப்பின்றி, தரமான அட்டைகளாக்கி, வெயிலில் உலர வைத்து, அட்டையாக விற்பனை செய்கிறோம்.ஆறு டன் பில்டர் கேக் மூலம், வெறும் ஒரு டன் அட்டைகள் மட்டுமே தயாரிக்க முடியும். 16 முதல், 18 அவுன்ஸ் கொண்ட அட்டைகள் ஒரு டன், 5,000 ரூபாய்க்கும், 40 முதல், 48 அவுன்ஸ் கொண்ட அட்டைகள் ஒரு டன், 4,500 ரூபாய்க்கும் ஏற்றுமதி செய்யப்படுகிறது.எங்கள் தொழிலில், 80 சதவீதம் மாணவ, மாணவியரையும், 20 சதவீதம் காலண்டர் தயாரிப்பாளர்களையும் நம்பி உள்ளோம்.

Advertisement
ஐந்தாண்டாக, காலண்டர் அட்டைக்கு பதிலாக, பாலிபோர்டு, டூபிளக்ஸ், பிளாஸ்டிக் அட்டைகள் பயன்படுத்தப்படுகின்றன.ரெடிமேடாக கிடைப்பதால், பிளாஸ்டிக் அட்டையை நோக்கியே, காலண்டர் தயாரிப்பாளர்கள் சென்றனர். இதனால், அட்டை உற்பத்தி தொழிலில் பின்னடைவு ஏற்பட்டது.இந்நிலையில், மாணவ, மாணவியருக்கு, விலையில்லா நோட்டு புத்தகத்தை, தமிழக அரசு வழங்கி வருகிறது. அரசு வழங்கும் நோட்டு, புத்தகத்தில், சாதாரணமான காகித அட்டைகளே பயன்படுத்தப்படுகின்றன. இதனால், அட்டை
உற்பத்தி தொழில் முற்றிலும் நசிவடைந்தது.மற்ற மாநிலங்களில், அட்டையை ஏற்றுமதி செய்யலாம் என நினைத்தால், கேரளா, கர்நாடக அரசும், தமிழக அரசின் வழியை பின்பற்றி, மாணவ, மாணவியருக்கு இலவச நோட்டு புத்தகம் வழங்கிட, நடவடிக்கை எடுத்து வருகிறது.

இதனால், எங்கள் தொழில் முற்றிலும், அழிவுப்பாதையை நோக்கி செல்கிறது. அட்டை உற்பத்தி ஆலைகளின், மின் கட்டண உயர்வு, ஆலை வரியை குறைக்க தமிழக அரசு நடவடிக்கை எடுக்க வேண்டும். மேலும், இலவசமாக வழங்கப்படும் நோட்டு, புத்தகத்தில், தமிழகத்தில் உற்பத்தி செய்யும் அட்டைகளை பயன்படுத்த, அரசு நடவடிக்கை எடுக்க வேண்டும்.இவ்வாறு, அவர் தெரிவித்தார்

- நமது நிருபர் -தினமலர்