பாகிஸ்தானுக்கு எதிரான கடைசி 20 ஓவர் கிரிக்கெட் போட்டியில் இந்தியா வெற்றி: தொடர் டிரா ஆனது

அகமதாபாத், டிச. 28-


இந்தியாவில் சுற்றுப்பயணம் மேற்கொண்டுள்ள பாகிஸ்தான் கிரிக்கெட் அணி, 2 போட்டிகள் கொண்ட இருபது ஓவர் கிரிக்கெட் போட்டியில் விளையாடி வருகிறது. இதில், பெங்களூரில் நடந்த முதல் போட்டியில் பாகிஸ்தான் வெற்றி பெற்றது. 2-வது போட்டி அகமதாபாத்தில் இன்று நடைபெற்றது.

டாஸ் வென்ற பாகிஸ்தான் அணி பீல்டிங்கைத் தேர்வு செய்தது. இந்திய அணியில் அஸ்வின் சேர்க்கப்பட்டிருந்தார். பாகிஸ்தான் அணியில் எந்த மாற்றமும் செய்யப்படவில்லை.

பொறுப்புடன் ஆடிய துவக்க வீரர்கள் காம்பிர் 21 ரன்களிலும், ரகானே 28 ரன்களிலும் ஆட்டமிழந்தனர். இவர்களின் விக்கெட்டுகளை உமர் குல் கைப்பற்றினார். 3 பவுண்டரிகளுடன் 27 ரன்கள் சேர்த்த கோலி, எதிர்பாராத விதமாக ரன் அவுட் ஆகி வெளியேறினார். அப்போது அணியின் ஸ்கோர் 88.



4-வது விக்கெட்டுக்கு இணைந்த யுவராஜ்-டோனி ஜோடி, பந்துகளை நாலாபுறமும் சிதறடித்து ஸ்கோரை மளமளவென உயர்த்தியது. 29 பந்துகளில் 4 பவுண்டரி, 4 சிக்சர்களுடன் அரை சதம் கடந்த யுவராஜ், பந்துகளை சிக்சர்களாக விளாசினார். 19-வது ஓவரில் ஹாட்ரிக் சிக்சர் அடித்து ரசிகர்களை உற்சாகத்தில் மிதக்கவிட்டார். அந்த ஓவரில் மட்டும் 22 ரன்கள் எடுக்கப்பட்டது. கடைசி ஓவரிலும் தனது பாணியில் சிக்சர் அடிக்க முயன்று, எல்லையில் நின்ற மாலிக்கிடம் கேட்ச் கொடுத்து ஆட்டமிழந்தார். யுவராஜ் 36 பந்துகளில் 4 பவுண்டரி, 7 சிக்சர்களுடன் 72 ரன்கள் குவித்தார்.

மறுமுனையில் ஆடிக்கொண்டிருந்த கேப்டன் டோனி 33 ரன்களில் உமர் குல் பந்தில் போல்டாகி பெவிலியன் திரும்பினார். இதனால் இந்தியா 20 ஓவர் முடிவில் 5 விக்கெட் இழப்பிற்கு 192 ரன்கள் என்ற இமாலய இலக்கை எட்டியது. ரெய்னா ஒரு ரன்னுடனும், ரோகித் சர்மா 4 ரன்களுடனும் களத்தில் இருந்தனர்.

இதையடுத்து 193 ரன்கள் எடுத்தால் வெற்றி என்ற இலக்குடன் களமிறங்கிய பாகிஸ்தான் அணிக்கு, துவக்க வீரர்கள் உத்வேகமான ஆட்டத்தை வெளிப்படுத்தினர். நசீர் ஜாம்ஷெட் 32 பந்துகளில் 41 ரன்களும், அகமது ஷேஜாத் 29 பந்துகளில் 31 ரன்களும் சேர்த்தனர். அடித்து ஆடி வேண்டிய நெருக்கடியில், அவர்கள் விட்ட பணியைத் தொடர்ந்த உமர் அக்மல் விறுவிறுவென 24 ரன்களை தன் பங்கிற்கு சேர்த்தார். மிகவும் எதிர்பார்க்கப்பட்ட சாகித் அப்ரிடியை 11 ரன்களில் புவனேஸ்குமார் பெவிலியனுக்கு அனுப்பினார்.

ரன்ரேட்டை நெருங்குவதற்காக போராடிய கேப்டன் முகமது ஹபீஸ், இந்திய பந்துவீச்சை அடித்து நொறுக்கினார். விரைவில் அரை சதம் கடந்த அவர், 26 பந்துகளில் 55 ரன்கள் குவித்தார். அவரது விக்கெட்டை திண்டா கைப்பற்றியதையடுத்து, ஆட்டம் இந்தியாவுக்கு சாதகமாக மாறியது. அவர்களையடுத்து வந்த கம்ரான் அக்மல் 5 ரன்னில் வெளியேறினார்.

கடைசி ஓவரை இஷாந்த் சர்மா வீசினார். அந்த ஓவரில் 20 ரன்கள் தேவை என்ற நிலையில், 8 ரன்கள் மட்டுமே எடுத்தனர். இதனால் இந்தியா 11 ரன்கள் வித்தியாசத்தில் வெற்றி பெற்று தொடரை சமன் செய்தது. இப்போட்டியின் ஆட்டநாயகனாக யுவராஜ் சிங் தேர்வு செய்யப்பட்டார். அடுத்தடுத்து இரண்டு போட்டிகளிலும் அரை சதம் அடித்த பாகிஸ்தான் கேப்டன் முகமது ஹபீசுக்கு தொடர் நாயகன் விருது வழங்கப்பட்டது.

-மாலை மலர்