குஜராத்தில் 'ஹாட்ரிக்' அடித்தார் மோடி! இமாச்சலில் ஆட்சியை இழந்தது பாஜக!

Guest · Guest Thu Dec 20, 2012 11:03 am

அகமதாபாத்/சிம்லா: குஜராத் மாநில சட்டசபை தேர்தலில் பாரதிய ஜனதா கட்சி வெற்றி பெற்று மூன்றாவது முறையாக நரேந்திர மோடி முதல்வராக பொறுப்பேற்க இருக்கிறார். ஆனால் பாஜக வசம் இருந்த இமாச்சலப்பிரதேசத்தை காங்கிரஸ் கட்சி கைப்பற்றி இருக்கிறது. குஜராத் மாநிலத்தின் 182 தொகுதிகளுக்கான வாக்கு எண்ணிக்கை இன்று காலை தொடங்கியது.

தொடக்கத்தில் காங்கிரஸ் மற்றும் பாஜக ஆகிய இரு கட்சிகளும் சம எண்ணிக்கையில் இருந்ததால் பரபரப்பு ஏற்பட்டது. ஆனால் பின்னர் கணிசமான எண்ணிக்கையில் பாஜக முன்னிலை வகித்து ஆட்சி அமைக்கத் தேவையான பெரும்பான்மையையும் தாண்டியது. இதானால் அம்மாநிலத்தில் பாஜக ஆட்சி அமைப்பது உறுதியாகி இருக்கிறது. குஜராத் மாநிலத்தில் மூன்றாவது முறையாக பாஜக ஆட்சி அமைகிறது.

மூன்றாவது முறையாக முதல்வராக நரேந்திர மோடி பொறுப்பேற்க இருக்கிறார். இதேபோல இமாச்சலப் பிரதேசத்தில் முதல் சில மணி நேரங்களில் ஆளும் பாஜகவும் காங்கிரஸ் கட்சியும் சம எண்ணிக்கையில் இருந்து வந்தன. பின்னர் காங்கிரஸ் கட்சி கணிசமான தொகுதிகளில் முன்னிலை வகித்து ஆட்சியைப் பிடிக்கும் நிலைக்கு முன்னேறியது.

பாஜக வசம் இருந்த இமாச்சலப் பிரதேசம் இப்போது காங்கிரஸ் வசம் சென்றிருப்பதால்தான் அக்கட்சிக்கு உற்சாகம் கிடைத்திருக்கிறது. இது தொடர்பாக கருத்து தெரிவித்த இமாச்சல் பாஜக தலைவர் பிரேம்குமார் துமல், மக்களின் தீர்ப்பை ஏற்கிறோம் என்றார்.
--
தட்ஸ் தமிழ்