பாதுகாப்பு வளையத்தில் மதுரை மீனாட்சி அம்மன் கோயில்

மதுரை : பாபர் மசூதி இடிப்பு தினத்தையொட்டி, மதுரை மீனாட்சியம்மன் கோயிலில் கூடுதல் பாதுகாப்பு ஏற்பாடுகள் செய்யப்பட்டுள்ளன. பாபர் மசூதி இடிப்பு தினம் நாளை அனுசரிக்கப்படுகிறது. இதையொட்டி, பொதுமக்கள் அதிக அளவில் கூடும் இடங்கள், பஸ் நிலையம், ரயில் நிலையம் மற்றும் வழிபாட்டு தலங்கள் ஆகியவற்றுக்கு கூடுதல் பாதுகாப்பு மற்றும் கண்காணிப்பு ஏற்பாடுகள் மேற்கொள்ளப்படுகிறது.

அதன்படி மதுரை மீனாட்சி அம்மன் கோயிலில் பலத்த பாதுகாப்பு ஏற்பாடுகள் செய்யப்பட்டுள்ளது. போலீசாரின் பாதுகாப்பு வளையத்திற்கு மதுரை வந்தது. மீனாட்சி அம்மன் கோயில், ரயில்வே ஸ்டேஷன் உள்ளிட்ட முக்கிய இடங்களில் போலீசாரின் கண்காணிப்பு தீவிரப்படுத்தப்பட்டுள்ளது. விமான நிலையத்திற்கு தனிக்கவனம் செலுத்தப்பட்டுள்ளது.
மீனாட்சி அம்மன் கோயிலில் உள்ள 5 கோபுரப்பகுதிகளிலும் மெட்டல் டிடெக்டர் கருவி மூலம் பக்தர்கள் சோதனை செய்யப்படுகின்றனர். கோயிலை சுற்றியுள்ள ஆடிவீதிகளில் வெடி பொருட்கள் இருக்கிறதா என மோப்ப நாய் உதவியுடன் போலீசார் சோதனை நடத்தினர். அம்மன்சன்னதி உள்ளிட்ட ஒவ்வொரு வாசல்களிலும் துப்பாக்கி ஏந்திய போலீசார் நிறுத்தப்பட்டுள்ளனர்.

தென்மாவட்டங்களில் 10ஆயிரம் போலீசார் பாதுகாப்பு பணி, கண்காணிப்பு பணி மேற்கொண்டுள்ளனர். அதேபோல் பழனி உள்ளிட்ட அனைத்து கோயில்களிலும் துப்பாக்கி ஏந்திய பாதுகாப்பு போடப்பட்டுள்ளது. திருவண்ணாமலை அண்ணாமலையார் கோயில், ரயில் நிலையம், சாத்தனூர் அணை, பஸ் நிலையங்கள் உள்ளிட்ட முக்கிய இடங்களுக்கு போலீஸ் பாதுகாப்பு ஏற்பாடு செய்யப்பட்டுள்ளது. அண்ணாமலையார் கோயிலில் ராஜகோபுரம், அம்மணி அம்மன் கோபுரம் வழியாக பக்தர்கள் கொண்டு செல்லும் பொருட்கள் அனைத்தும், மெட்டல் டிடக்டர் மற்றும் அதி நவீன ஸ்கேனர் மூலம் சோதித்த பிறகே போலீசார் அனுமதிக்கின்றனர்.

மேலும், சீருடை அணியாத போலீசாரும் கோயில், மாட வீதி போன்ற இடங்களில் கண்காணிப்பு பணியில் ஈடுபட்டுள்ளனர். சாத்தனூர் அணையில் 24 மணி நேரமும் போலீஸ் பாதுகாப்பு போடப்பட்டுள்ளது. ரயில் நிலையங்களில் ரயில்வே போலீசார் கண்காணிப்பு பணியில் ஈடுபட்டுள்ளனர்.

நன்றி:தினகரன்..