டெல்லியில் இன்று உடல் தகனம் முன்னாள் பிரதமர் குஜ்ரால் காலமானார்

டெல்லியில் இன்று உடல் தகனம் முன்னாள் பிரதமர் குஜ்ரால் காலமானார்

குர்கான்: முன்னாள் பிரதமர் குஜ்ரால் நேற்று காலமானார். அவரது உடல் டெல்லியில் இன்று தகனம் செய்யப்படுகிறது. முன்னாள் பிரதமர் ஐ.கே.குஜ்ரால்(92) கடந்த ஓராண்டாக உடல்நலக்குறைவால் அவதிப்பட்டார். சிறுநீரகங்கள் செயலிழந்ததால் அவருக்கு டயாலிசிஸ் செய்யப்பட்டது. இந்த நிலையில் அண்மையில் அவருக்கு நுரையீரலில் நோய் தொற்று ஏற்பட்டது. இதனால், குர்கானில் உள்ள தனியார் மருத்துவமனையில் அவர் கடந்த 19ம் தேதி சேர்க்கப்பட்டார். அங்கு டாக்டர்கள் தீவிர சிகிச்சை அளித்தபோதும், அவரது உடல்நிலை தேறவில்லை. அடுத்தடுத்து அவரது உடலில் பல்வேறு உறுப்புகள் செயலிழந்தன. இதனால், கவலைக்கிடமான நிலையில் சிகிச்சை பெற்று வந்த குஜ்ரால் நேற்று மாலை காலமானார். அவரது உடல் டெல்லியில் இன்று தகனம் செய்யப்படுகிறது. கடந்த 1919ல் தற்போது பாகிஸ்தானில் உள்ள ஜீலம் நகரில் இந்தர் குமார் குஜ்ரால் பிறந்தார். அவரது குடும்பத்தினரில் பலர் சுதந்திரபோராட்ட வீரர்கள். இதனால் குஜ்ராலும் சுதந்திர போராட்டத்தில் பங்கேற்றார். 1942ல் வெள்ளையனே வெளியேறு போராட்டத்தில் பங்கேற்ற அவர் சிறையில் அடைக்கப்பட்டார்.

பாகிஸ்தான் பிரிவினையின்போது இந்தியாவுக்கு குஜ்ரால் குடும்பத்தினர் வந்தனர். அரசியலில் ஈடுபட்ட குஜ்ரால் புதுடெல்லி நகராட்சியின் துணைத் தலைவராக 1958ல் தேர்ந்தெடுக்கப்பட்டார். 1964ல் காங்கிரஸ் சார்பில் மாநிலங்களவை உறுப்பினராக தேர்வு செய்யப்பட்டார். லால் பகதூர் சாஸ்திரி மரணத்துக்கு பிறகு இந்திரா காந்தியை பிரதமராக்க பாடுபட்ட குழுவின் உறுப்பினராக குஜ்ரால் இருந்தார். இதனால், இந்திரா அமைச்சரவையில் அமைச்சராக்கப்பட்டார். நெருக்கடி நிலை அமலில் இருந்தபோது, ரஷ்யாவுக்கான இந்திய தூதராக நியமிக்கப்பட்டார். பின்னர், 1989ல் வி.பி.சிங் அமைச்சரவையில் வெளியுறவுத் துறை அமைச்சரானார். பின்னர், தேவகவுடா அமைச்சரவையில் அந்த பொறுப்பை வகித்தார். தேவகவுடா அரசுக்கு அளித்த வந்த ஆதரவை விலக்கிக்கொள்ள காங்கிரஸ் முடிவு செய்தது. இதை தொடர்ந்து 1997 ஏப்ரலில் குஜ்ரால் பிரதமராக்கப்பட்டார். 11 மாதங்கள் மட்டுமே அவரது ஆட்சி நீடித்தது. இவரது மனைவி ஷீலா கடந்த ஆண்டு இறந்துவிட்டார். 2 மகன்கள் உள்ளனர். அவர்களில் ஒருவர் நரேஷ் குஜ்ரால், அகாலிதள எம்.பி.யாக உள்ளார்.குஜ்ரால் காலமான தொடர்ந்து இரு அவைகளும் நாள் முழுவதும் ஒத்திவைக்கப்பட்டது. அவரது மறைவுக்கு ஜனாதிபதி பிரணாப் முகர்ஜி, பிரதமர் மன்மோகன் சிங், காங்கிரஸ் தலைவர் சோனியா காந்தி மற்றும் பல்வேறு தலைவர்கள் இரங்கல் தெரிவித்துள்ளனர்.

-தினதந்தி