எட்டும்... இரண்டும்...!

**சாமி** · **சாமி** Thu Nov 22, 2012 7:16 am

எட்டும் இரண்டும் என்கிறார்களே அதன் பொருள் என்ன?

இறை பரம்பொருளான எம்பெருமான் இவ்வுலகம் முழுவதும் நிறைந்திருக்கிறான். எங்கும் நிறைந்திருந்தால்தான் அது பரம்பொருள். அது எல்லாவற்றிலும் நிறைந்து நிற்கிறது. எனவே உலகப்பொருள்கள் அனைத்தையும் அவன் அறிந்து அறிவிக்கிறான். எனக்கு அறிவிக்க வேண்டும் என்றால் எனக்கு உள்ளேயும் இருக்க வேண்டும்; எதிரேயும் நிறைந்து நிற்க வேண்டும். அப்போதுதான் எனக்குள் இருந்து அவன் அறிவிக்க முடியும். அல்லது உணர்த்த முடியும். அதாவது பார்க்கிற பொருளிலும் இருக்க வேண்டும். பார்க்கப்படுகிற பொருளிலும் நிறைந்து நிற்க வேண்டும்.
நம்மால் பார்க்கப்படுவது பிரபஞ்சம். இந்தப் பிரபஞ்சத்தை எட்டு வகையில் அடக்கி விடலாம். அவை
பஞ்சபூதங்கள் – ஐந்து
ஞாயிறு
திங்கள்
உயிர்
இந்த எட்டிலும் ஆண்டவன் நிறைந்திருக்கிறான். இதையே அட்டமூர்த்தம் என்கிறோம்.

இப்படி எட்டிலும் புணர்ந்து நிற்கும் இறைவனை இரண்டு நிலைகளில் கலந்து நின்று அனுபவிக்கலாம். பிண்டத்தில் அனுபவிப்பது ஒன்று; அண்டத்தில் அனுபவிப்பது மற்றொன்று. பிண்டத்தில் அனுபவிப்பதை வேதாந்தம் என்றார்கள். அண்டத்தில் அனுபவிப்பதைச் சித்தாந்தம் என்றார்கள்.

எனவே எட்டாக நிறைந்த இறைவனை அனுபவிக்கும் நிலை இரண்டு. இதையே எட்டும் இரண்டும் என்றனர். இது எல்லாம் அவன் ஆடும் நடனம். எட்டாக நின்று ஆடுவது ஊன நடனம்; இரண்டாக நின்று ஆடுவது ஞான நடனம்.

(செந்தமிழ் வேள்விச்சதுரர் மு.பெ.ச. அவர்கள் எழுதிய ‘திருமந்திரச் சிந்தனைகள்' புத்தகத்தில் இருந்து)