வளைந்தோர் உயர்வார்!

**சாமி** · **சாமி** Tue 20 Nov 2012 - 21:51

வளைந்த பொருள்களுக்கு ஒருவிதமான மதிப்பும் அழகும் உண்டாகின்றன. உயர்வு வளைவில் விளைகின்றது.

1. புருவம் நேராக இருந்தால் அழகாக இராது. வில்லைப்போல் வளைந்த புருவம் எத்துணை அழகாக இருக்கின்றது?
2. வளைந்த யாழில்தான் என்ன என்ன மதுரகானங்கள் எழுந்து செவியில் புகுந்து உள்ளத்தைக் கொள்ளுகின்றன.
3. மயிர் நேராக இருந்தால் அழகு செய்யாது; வளைந்து வளைந்து கடல் அலை போல் சுருண்டு இருந்தால் அழகு செய்கின்றது.
4. நதி வளைந்து வளைந்து ஓடுகின்றபொழுது அழகாக விளங்குகின்றது.
5. பூத்து வளைந்த கொடிகளைக் கண்டு மகிழாதார் யார்?
6. ஒரு பெண் நெட்டையாக நின்றால் விகாரமாக இருக்கும். சிறிது இடையைச் சாய்த்து, தலையை வளைத்து நின்றால் பார்வதிதேவியையொத்திருப்பாள்.
7. நேராகத் தொங்கவிடும் பூமாலை அழகு செய்யாது; வளைத்துவிட்ட பூமாலை மிகுந்த அழகு செய்கின்றது.
8. இராகங்கள் நேராக ஆரோகண அவரோகணமாக ஏறி இறங்குவதைவிட, இடையிடையே வளைந்து வளைந்து சஞ்சாரஞ்செய்கின்றபோது உயர்ந்த இனிமையுண்டாகின்றது.
9. வளைந்திருக்கின்ற நடராசமூர்த்தியின் குஞ்சிதபாதம் அகில உலகங்களையும் வாழ்விக்கின்றதன்றோ?
10. ஒரு கருத்தை நேர்முகமாக கூறுவதைவிட வளைத்து மறைமுகமாகக் கூறுகின்றபோது கருத்தின் உயர்வு நனிசிறப்பு அடைகின்றது.

அறிவில்லாத கீழ்மக்கள் நட்பு தீயது என்று கூறக்கருதினார் திருவள்ளுவர். ஆனால் அப்படி கூறினால் கேட்பவர் மனதில் ஆழமாகப்பதியாது. பொருள் சுவை கலந்து வளைத்துக் கூறுகின்றார். “அறிவு ஒரு சிறிதும் இல்லாதவர்களுடைய நட்பு மிகவும் இனிமையானது"
ஏன்?
"அவர்கள் கூடிப்பிரியும் போது கவலையிராது. ஆதலின் தீயவர் நட்பு இனிமையானது" என்றார். எத்துணை இனிமை தருகின்றது இந்தத் திருக்குறள் என்று சிந்தியுங்கள்.
பெரிதினிது பேதையார் கேண்மை பிரிவின்கண்
பீழை தருவதொன் றில்.
இந்தப் பத்து எடுத்துக்காட்டால் வளைவின் உயர்வை ஒருவாறு சிந்தித்தோம்.

இனி இளமையில் சிறுவர் சிறுமிகள், அடக்கமாகப் பணிவுடன் உடம்பாலும், உள்ளத்தாலும் தாழ்வு என்ற தன்மைக்கு உரைகல்லாக வளைந்து வளர்வராயின், (இப்படிக்கூறுவதனால் உடம்பைக் கூனலாக என்று கருதக் கூடாது) அவர்களது மேன்மை என்றென்றும் இமயமலை போல் நிமிர்ந்து நிற்கும். பணிவு என்ற ஒன்றே எல்லா நலன்களையும் தரும்.
காக்க பொருளா அடக்கத்தை ஆக்கம்
அதனினூஉங் கில்லை உயிர்க்கு
என்ற திருக்குறளின் உயர்ந்த கருத்தை உன்னுக.

இளமையில் நன்றாக வளைத்துத் துன்புறுத்திய போது வளைந்த மூங்கில் அரசன் ஏறிவரும் பல்லக்கில், அம்மன்னனுடைய மணிமகுடத்திற்கு மேல் உயர்ந்து சிறப்புறுகின்றது. அவ்வாறு வளையாத மூங்கில், மூங்கிலை வீதியில் நட்டு வித்தை காட்டும் கூத்தாடியுடன் ஊர் ஊராய் அலைந்து, அவன் காலின் கீழ் மிதிபட்டு இழிவையடைகின்றது.
‘வருத்தவளை வேய்அரசர் மாமுடியின் மேலாம்
வருத்தவளையாத மூங்கில் – தரித்திரமாய்
வேழம்பர் கைப்புகுந்து மேதினியெல் லாந்திரிந்து
தாமுமவர் தம்மடிக்கீழ் தான்.
(வேய்-மூங்கில், வேழம்பர்-கழைக்கூத்தாடி)

ஆதலின் இளமையில், பெற்றோரிடத்திலும், ஆசிரியரிடத்திலும் பணிவுடன் வளைந்து கல்வி பயின்ற பிள்ளைகள் உலகம் போற்ற இன்புற்று உயர்ச்சியுறுவர். வீட்டிலும் வெளியிலும் வளையாமல் திரிந்த பிள்ளைகள், கல்வியறிவும் அதனால் எய்தும் நல்லொழுக்கம் இன்றி வாழ்நாள் முழுவதும் துன்புற்று இகழ்ச்சியுறுவர்.

- நன்றி திருப்புகழமிர்தம் (தெய்வமுரசு ஆன்மீக மாத இதழ் மார்ச் 2006 இதழில் இருந்து)

ஆரூரன் · ஆரூரன் Wed 21 Nov 2012 - 21:17

சாமி wrote:ஆதலின் இளமையில், பெற்றோரிடத்திலும், ஆசிரியரிடத்திலும் பணிவுடன் வளைந்து கல்வி பயின்ற பிள்ளைகள் உலகம் போற்ற இன்புற்று உயர்ச்சியுறுவர். வீட்டிலும் வெளியிலும் வளையாமல் திரிந்த பிள்ளைகள், கல்வியறிவும் அதனால் எய்தும் நல்லொழுக்கம் இன்றி வாழ்நாள் முழுவதும் துன்புற்று இகழ்ச்சியுறுவர்.

நல்ல கருத்து ! மகிழ்ச்சி