பால் தாக்கரேயின் வாழ்க்கை குறிப்பு

**Powenraj** · **Powenraj** Sun 18 Nov 2012 - 9:34

மகாராஷ்டிர மாநில அரசியல் களத்தில் முக்கிய பங்காற்றிய பால் தாக்கரே, 1926-ம் ஆண்டு ஜனவரி மாதம், 23-ம் தேதி, மத்திய பிரதேச மாநிலத்தில் உள்ள பால்காட் என்ற ஊரில் பிறந்தார்.

மகாராஷ்டிர மாநிலத்தில் வாழும் மராட்டியர்களின் உரிமைக்காக அவர் பாடுபட்டார். மகாராஷ்டிரா என்ற தனி மாநிலம் உருவாகவும் அவர் போராடினார்.

சிறந்த எழுத்தாளர், பத்திரிகையாளர், கார்டூனிஸ்ட், சமூக சேவகராகவும் விளங்கிய அவர், 1966ஆம் ஆண்டு சிவசேனா என்ற அமைப்பை தொடங்கினார். இந்திய பண்பாடு மற்றும் கலாச்சாரத்தை சீரழிக்க முயற்சித்தவர்களை அவர் கடுமையாக கண்டித்தார்.

காதலர் தினம் உள்ளிட்ட பல கலாச்சார சீரழிவுகளை வெளிப்படையாக எதிர்த்து அவர் சிவசேனாவின் அதிகாரபூர்வ பத்திரிகையான ‘சாம்னா’-வில் கட்டுரைகளை வெளியிட்டார்.

2006-ம் ஆண்டு காதலர் தினத்தன்று, காதலர்கள் மீது சிவசேனா உறுப்பினர்கள் தாக்குதல் நடத்தினர். இந்தசம்பவத்துக்காக அவர் வெளிப்படையாக மன்னிப்பு கேட்டுக் கொண்டார்.

பல்வேறு அரசியல் கட்சி, மத அமைப்பு தலைவர்கள், திரையுலக பிரமுகர்களுடன் நெருங்கிய தொடர்பும் நட்பும் பாராட்டி வந்த பால் தாக்கரே, ‘பாலா சாகேப்’ என்று பிரியமுடன் அழைக்கப்பட்டார்.

உடல் நலக் குறைவினால், மும்பை லீலாவதி ஆஸ்பத்திரியில் சிகிச்சை பெற்று வந்த அவர், சில தினங்களுக்கு முன்னர் வீடு திரும்பினார். முன்னாள் ஜனாதிபதி பிரதீபா பாட்டீல் உள்ளிட்ட பல முக்கிய பிரமுகர்கள், மும்பை ‘மட்டே ஸ்ரீ’ இல்லத்தில் அவரை சந்தித்து உடல் நல முன்னேற்றம் குறித்து கேட்டறிந்தனர்.

கடந்த செவ்வாய்க்கிழமை அவரது உடல்நிலையில் திடீரென்று பின்னடைவு ஏற்பட்டது. உயிர் காக்கும் உபகரணங்களின் உதவியுடன் சுவாசித்து வந்த பால் தாக்கரேயின் உயிர் நேற்று மாலை 3.33 மணிக்கு மாரடைப்பால் பிரிந்தது.