அமெரிக்க தேர்தலில் ஒபாமா மீண்டும் வெற்றி இந்திய ஐ.டி துறை பாதிக்குமா?

புதுடெல்லி : அமெரிக்க அதிபராக ஒபாமா மீண்டும் வெற்றி பெற்றதற்கு இந்திய கம்பெனிகள் வரவேற்பு தெரிவித்துள்ளன. எனினும், இந்திய ஐ.டி. துறைக்கு பாதிப்பு வருமோ என்ற அச்சமும் ஏற்பட்டுள்ளது. இந்தியாவின் தகவல் தொழில் நுட்ப(ஐ.டி) கம்பெனிகளுக்கு அமெரிக்கா மற்றும் ஐரோப்பாவின் அவுட்சோர்சிங் மூலம்தான் 80% வருவாய் கிடைக்கிறது. ஒபாமா தனது தேர்தல் பிரசாரத்தின் போது,

இந்தியா போன்ற நாடுகளுக்கு அவுட்சோர்சிங் விடுவதால், அமெரிக்க இளைஞர்களுக்கு வேலைவாய்ப்பு பாதிக்கிறது என்று விமர்சனம் செய்தார். இந்நிலையில், அவரே மீண்டும் அதிபராக தேர்வானது இந்திய ஐ.டி. துறைக்கு அச்சம் கொடுத்துள்ளது. எனினும், ஒபாமா இந்தியாவுக்கு ஆதரவாகவே இருப்பார் என இந்திய கம்பெனிகள் நம்பிக்கை தெரிவித்துள்ளன.

நாஸ்காம் தலைவர் சோம் மிட்டல் கூறுகையில், ‘அமெரிக்காவில் அவுட்சோர்சிங் எதிர்ப்பு என்பது உற்பத்தி துறைக்குத்தான். ஐ.டி துறைக்கு அல்ல. எனவே, இந்த துறைக்கு எந்த விதத்திலும் பாதிப்பு வராது’ என்றார். ஐ கேட் தலைமை செயல் அதிகாரி பணீஷ் மூர்த்தி கூறுகையில், ‘ஒபாமா வெற்றி இந்தியாவுக்கு நல்ல செய்தி அல்ல. அமெரிக்காவில் வேலைவாய்ப்பு மற்றும் நிதி பற்றாக்குறை பிரச்னை இருக்கத்தான் செய்யும். எனினும், எதிர்காலத்தில் என்ன விளைவுகள் ஏற்படும் என்பதை நாம் கவனிக்க வேண்டும்’ என்றார்.

கோத்ரெஜ் குரூப் சேர்மன் ஆதிகோத்ரெஜ் கூறுகையில், ‘இந்தியாவுக்கு இது நல்ல செய்திதான். 2 பெரிய பொருளாதார நாடுகளுக்கு இடையே அவுட்சோர்சிங் உள்பட பல்வேறு பிரச்னைகள் இருக்கும். ஆனால், அவை எல்லாமே சுமுகமாக தீர்க்கப்படும் என நம்புகிறேன்’ என்றார்.

பார்தி குரூப் சேர்மன் சுனில் பார்தி மிட்டல் கூறுகையில், ‘எதிர்பார்த்த வெற்றி. இந்தியாவுக்கு இது நல்லதுதான். அவுட்சோர்சிங் குறித்து முன்பு கிளிண்டன் கடுமையாக பேசினார். ஆனால், நமது வர்த்தகத்தையோ, இருநாட்டு உறவையோ பாதிக்கும் எதுவும் நடக்கவில்லை’ என்றார். அமெரிக்காவுக்கும், இந்திய ஐ.டி துறைக்கும் ஒபாமா வெற்றியால் நல்லதுதான் என்று என்ஐஐடி சேர்மன் ராஜேந்தி பவார் கூறினார்.

பொருளாதார உறவு மேம்படும்: சிதம்பரம்

மத்திய நிதியமைச்சர் ப.சிதம்பரம் நேற்று டெல்லியில் நிருபர்களிடம் கூறுகையில், ‘அமெரிக்க அதிபராக மீண்டும் தேர்ந்தெடுக்கப்பட்டுள்ள ஒபாமாவை பாராட்டுகிறேன். இந்த வெற்றியின் மூலம் இந்தியாவுக்கும், அமெரிக்காவுக்கும் இடையேயான உறவு பலமடையும். குறிப்பாக, பொருளாதார உறவு மேம்படும்’ என்றார்.

தினகரன்

ஒவ்வொரு முறையும் இப்படி வதந்தி கிளம்புவது உண்மைதானா?...
ஒபாமா வந்து எங்க பசங்க வாழ்க்கைல உப்புமா கிண்டிட மாட்டார்ல?...
பார்த்து எதுனா செஞ்சா சரி...

//பொருளாதார உறவு மேம்படும்: சிதம்பரம்//

அப்படி ஏற்ப்பட்டா சந்தோஷமே

இந்த அச்சம் நியாயம் தான். பிரச்சாரத்தின் போது மட்டுமல்ல. நிதிநெருக்கடி ஏற்ப்பட்ட போது இந்திய தொழிலாளிகளுக்கு மட்டுமல்லாது அனைத்து நாட்டு தொழிலாளிகளுக்கும் அவர் விடுத்த அறிக்கையும் குறிப்பிடத்தக்கது