விழுப்புரத்தில் இன்று காலை பொன்முடி வீட்டில் போலீஸ் சோதனை

**சிவா** · **சிவா** Mon 22 Oct 2012 - 20:17

விழுப்புரம் மாவட்டம் வானூர் தாலுகாவில் உள்ள பூந்துறை கிராமத்தில் செம்மண் குவாரிகள் உள்ளன. இந்த குவாரிகளில் செம்மண் எடுக்க முன்னாள் அமைச்சர் பொன்முடி உறவினர்கள் அனுமதி பெற்றிருந்தனர்.

செம்மண் குவாரிகளில் 2002-ம் ஆண்டு முதல் 2010-ம் ஆண்டு வரை விதிகளை மீறி குறிப்பிட்ட அளவுக்கு மேல் பொன்முடி குடும்பத்தினர் மண் எடுத்தது கண்டுபிடிக்கப்பட்டது. இதனால் அரசுக்கு ரூ. 30 கோடி வருவாய் இழப்பு ஏற்பட்டிருப்பது தெரிய வந்தது.

இதுபற்றி வானூர் தாசில்தார் குமாரபாண்டியன் போலீசில் புகார் செய்தார். அதன் பேரில் போலீசார் வழக்குப்பதிவு செய்து பொன்முடி, கோபிநாத், கோதகுமார் உள்பட 6 பேர் கைது செய்யப்பட்டனர். பொன்முடி திருச்சி ஜெயிலில் அடைக்கப்பட்டுள்ளார். பொன்முடியின் மகன் கவுதமசிகாமணி உள்பட சிலரை போலீசார் தேடி வருகிறார்கள். அவர்கள் அனைவரும் தலைமறைவாக உள்ளனர்.

இந்த நிலையில் பொன்முடி மற்றும் அவரது உறவினர்கள் நண்பர்களின் 11 வீடுகளில் இன்று போலீசார் திடீர் சோதனை நடத்தினார்கள். செம்மண் குவாரி முறைகேடு தொடர்பான ஆவணங்கள் பதுக்கப்பட்டுள்ளதா? என்று அவர்கள் ஆய்வு செய்தனர்.

இந்த சோதனைகளுக்கு போலீசார் கோர்ட்டில் முன் அனுமதி பெற்றிருந்தனர். விழுப்புரம் சண்முகாபுரம் காலனியில் உள்ள பொன்முடி வீட்டில் விழுப்புரம் சரக டி.எஸ்.பி. பி.சேகர் தலைமையில் சோதனை நடந்தது. பொன்முடியின் உதவியாளர் செல்வராஜ் வீடு விழுப்புரம் கே.கே. ரோட்டில் உள்ளது. அங்கும் சோதனை நடத்தப்பட்டது.

பொன்முடியின் குடும்ப நண்பர் ஜெயச்சந்திரன் வீடு நன்னாடு கிராமத்தில் உள்ளது. போலீசார் அந்த வீட்டில் காலை 7 மணி முதல் சோதனை நடத்தினார்கள். பொன்முடியின் உறவினர்கள் ரோகையான், கோத குமார் ஆகியோரது வீடுகளிலும் சோதனை நடத்தப்பட்டது.

விழுப்புரத்தில் மட்டும் 6 இடங்களில் சோதனை நடந்தது. இதுபற்றி தகவல் அறிந்ததும் தி.மு.க. தொண்டர்கள் நூற்றுக்கணக்கில் பொன்முடி வீடு முன்பு குவிந்தனர். இதனால் பரபரப்பு ஏற்பட்டது.

சென்னையில் சைதாப்பேட்டை கோர்ட்டு பின்புறம் உள்ள ஸ்ரீநகரில் பொன்முடி மகன் கவுதமசிகாமணி வீடு உள்ளது. இன்று காலை 7 மணி முதல் அங்கு சோதனை நடந்தது. கவுதமசிகாமணியின் மைத்துனர் ராஜ மனோகரனின் வீடு திருவான்மியூர் வால்மீகி நகரில் உள்ளது.

தனிப்படை போலீசார் அங்கும் சென்று சோதனை நடத்தினார்கள். சென்னையில் இந்த 2 இடங்களில் நடந்த சோதனையில் ஆவணங்கள் ஏதேனும் கண்டெடுக்கப்பட்டதா? என்று தனிப்படை போலீசாரிடம் கேட்கப்பட்டது. ஆனால் போலீசார் எந்த தகவலையும் தெரிவிக்க மறுத்து விட்டனர்.

சென்னை, விழுப்புரத்தில் சோதனை நடந்த அதே நேரத்தில் புதுச்சேரியில் பொன்முடி உறவினர்கள் வீடுகள் மற்றும் ஒரு ஓட்டல் உள்பட 3 இடங்களில் சோதனை நடந்தது. புதுச்சேரி அண்ணா நகரில் பொன்முடியின் தம்பி டாக்டர் ராஜா சிகாமணி வீட்டில் சோதனை நடந்தது. சோதனை நடத்தப்பட்ட 11 இடங்களிலும் பலத்த போலீஸ் பாதுகாப்பு போடப்பட்டிருந்தது.

மாலைமலர்