சென்னையில் இன்று முதல் அரசு கேபிள் டி.வி. ஒளிபரப்பை ஜெயலலிதா தொடங்கி வைக்கிறார்

முதல்-அமைச்சர் ஜெயலலிதா உத்தரவின் பேரில், தமிழ்நாடு அரசு கேபிள் டி.வி. நிறுவனம் கடந்த ஆண்டு செப்டம்பர் மாதம் 3-ந் தேதி தொடங்கப்பட்டது.

சென்னை நீங்கலாக எஞ்சியுள்ள 31 மாவட்டங்களில், குறைந்த கட்டணத்தில் டெலிவிஷன் நிகழ்ச்சிகளை பார்த்து ரசிப்பதற்காக, அரசு கேபிள் டி.வி. சேவை தொடங்கப்பட்டது.

சென்னையில் அரசு கேபிள் டி.வி.

சென்னை மாநகரில், அரசு கேபிள் டி.வி. சேவை டிஜிட்டல் தொழில்நுட்பத்தில் விரைவில் தொடங்கப்படும் என்று அரசு அறிவித்து இருந்தது. அதன்படி சென்னையில் அரசு கேபிள் டி.வி.சேவையை தொடங்குவதற்குத் தேவையான உள்கட்டமைப்பு வசதிகள் அனைத்தும் செய்து முடிக்கப்பட்டு விட்டன.

அதைத் தொடர்ந்து சென்னையில் அரசு கேபிள் டி.வி.யை முதல்-அமைச்சர் ஜெயலலிதா இன்று (சனிக்கிழமை) தொடங்கி வைக்கிறார். உடனடியாக நுங்கம்பாக்கம் பகுதியில் அரசு கேபிள் டி.வி.சேனல்களைப் பார்க்கலாம். படிப்படியாக சென்னை மாநகர் முழுவதும் அரசு கேபிள் டி.வி.யை பொதுமக்கள் கண்டு களிக்கலாம்.

தொடக்கத்தில் `அனலாக்' தொழில்நுட்பத்தில் 80 சேனல்கள் ஒளிபரப்பாகிறது. அதன்பின்னர் சேனல்கள் எண்ணிக்கை கணிசமாக அதிகரிக்கப்படும் என்று அதிகாரி ஒருவர் தெரிவித்தார்.

சென்னை மாநகரில் அரசு கேபிள் டி.வி. சேவை இன்று தொடங்கி வைக்கப்படுவதன் மூலம், சென்னைவாசிகளின் நீண்டகால கனவு நனவாகிறது.

செட்-டாப் பாக்ஸ்

சென்னை பெருநகரப் பகுதியில், அரசு கேபிள் டி.வி. நிறுவனத்தில் பதிவு செய்துள்ள 2 ஆயிரம் கேபிள் டி.வி. ஆபரேட்டர்கள், தங்கள் வாடிக்கையாளர்களுக்காக லட்சக்கணக்கான செட்-டாப் பாக்ஸ்கள் தேவை என்று தெரிவித்துள்ளனர்.

ரூ.500 முன்பணம் செலுத்தி பதிவு செய்துள்ள வாடிக்கையாளர்களுக்கு `முதலில் வருபவர்களுக்கு முன்னுரிமை' என்ற அடிப்படையில் செட்-டாப் பாக்ஸ் வழங்கப்பட இருக்கிறது. கேபிள் டி.வி. ஆபரேட்டர்கள் செட்-டாப் பாக்ஸிற்கான முன்பணத்தை செலுத்த 25-ந் தேதி கடைசிநாள் ஆகும்.

20 லட்சம் கேபிள் டி.வி. இணைப்புகள்

சென்னை மாநகரில் 20 லட்சத்திற்கும் மேற்பட்ட கேபிள் டி.வி. இணைப்புகள் உள்ளன. இதில், சில லட்சம் பேர் தனியார் நிறுவன டிஷ்-ஆன்டனா மூலம் டிஜிட்டல் சிக்னல் பெற்று அனைத்து சேனல்களையும் தெள்ளத்தெளிவாக பார்த்து வருகிறார்கள். மீதமுள்ளவர்களுக்கு செட்-டாப் பாக்ஸ் வழங்குவதற்கு சில மாதங்கள் ஆகும்.

எனவே, அதுவரை `அனலாக்' தொழில்நுட்பத்தில் அரசு கேபிள் டி.வி. சேவை வழங்கப்படும். அனைவருக்கும் செட்-டாப் பாக்ஸ் கொடுத்த பிறகு அரசு கேபிள் டி.வி. இணைப்பு பெற்றவர்களும் அனைத்து சேனல்களையும் மிகத்துல்லியமாக பார்க்க முடியும் என்று அதிகாரி ஒருவர் கூறினார்.

தினத்தந்தி

இனி செட்டாப் பாஸ் வேற காசு குடுத்து வாங்கணுமா அதையும் இலவசமா குடுத்தா நல்லா இருக்கும் எங்களப் போல ஏழைபாழைங்க பொளச்சிக்குவாங்க