அணு உலை எதிர்ப்பாளர்களுக்கு ஆதரவு தெரிவிக்க கூடங்குளம் சென்றது தவறுதான் - அச்சுதானந்தன்

கட்சியின் நிலைப்பாட்டுக்கு விரோதமாக அணு உலை எதிர்ப்பாளர்களுக்கு ஆதரவு தெரிவிப்பதற்காக கூடங்குளம் சென்றது தவறுதான் என அச்சுதானந்தன் ஒப்புக்கொண்டார்.

போர்க்கொடி

கேரள முதல்-மந்திரியும், மார்க்சிஸ்ட் கம்யூனிஸ்டு கட்சியின் மூத்த தலைவருமான அச்சுதானந்தன், சமீப காலமாக கட்சித்தலைமைக்கு எதிராக போர்க்கொடி உயர்த்தி வந்தார். குறிப்பாக கட்சி நிலைப்பாட்டுக்கு எதிராக, கூடங்குளம் அணுமின்நிலைய எதிர்ப்பு போராட்டத்துக்கு ஆதரவு தெரிவித்தார்.

மார்க்சிஸ்ட் கம்யூனிஸ்டு கட்சியிலிருந்து வெளியேறி தனிக்கட்சி கண்டு கொலை செய்யப்பட்டு உயிரிழந்த டி.பி.சந்திரசேகரனின் வீட்டுக்கு சென்று அஞ்சலி செலுத்தினார். இந்த நடவடிக்கைகளால் கட்சி மேலிடம் அவர் மீது கடும் அதிருப்தி அடைந்தது. சமீபத்தில் நடந்த கட்சியின் மத்தியக்குழு கூட்டத்தில் அச்சுதானந்தனுக்கு கண்டனம் தெரிவிக்கப்பட்டது.

தவறுதான்

இந்த நிலையில் திருவனந்தபுரத்தில் அச்சுதானந்தன் நேற்று நிருபர்களுக்கு பேட்டி அளித்தார். அப்போது அவர் கூறியதாவது:-

இந்தியா, ரஷியா இணைந்து செயல்படுத்துகிற கூடங்குளம் அணுமின்திட்டத்துக்கு மார்க்சிஸ்ட் கம்யூனிஸ்டு கட்சி ஆதரவு அளிக்கிறது. ஆனால் நான் கட்சி நிலைப்பாட்டுக்கு மாறாக, அணுமின்நிலைய எதிர்ப்பாளர்களுக்கு ஆதரவு தெரிவிப்பதற்காக கூடங்குளம் சென்றது தவறுதான்.

ஒப்பிட்டதும் தவறு

1964-ம் ஆண்டு, இந்திய கம்யூனிஸ்டு கட்சியின் பிளவுக்கு காரணமான டாங்கேயுடன் மாநில கட்சி செயலாளர் பினரயி விஜயனை ஒப்பிட்டு கூறியதும் தவறுதான். நான் கட்சி ரீதியில் செய்த தவறுகளை ஒத்துக்கொள்கிறேன்.

கட்சியிலிருந்து வெளியேறி புரட்சிகர மார்க்சிஸ்ட் கட்சி என்ற தனிக்கட்சி தொடங்கிய சிறிது காலத்தில் டி.பி.சந்திரசேகரன் கொலை செய்யப்பட்டார். நெய்யாற்றின்கரை சட்டசபை தொகுதி இடைத்தேர்தல் நடந்த நாளில் நான் சந்திரசேகரனின் வீட்டுக்கு அஞ்சலி செலுத்த சென்றதும் தவறுதான்.

இவ்வாறு அச்சுதானந்தன் கூறினார்.

தினத்தந்தி