மதுரை மாநகரில் குற்ற நிகழ்வுகளை தடுக்கும் வண்ணம் போலீசார் வாகன சோதனை நடத்தி வருகின்றனர். மாநகர போலீஸ் கமிஷனர் சஞ்சய் மாத்தூர் உத்தரவின்பேரில் துணை கமிஷனர் திருநாவுக்கரசு ஆலோசனையின் பேரில் மாநகர் முழுவதும் இந்த சோதனை நடத்தப்பட்டு வருகிறது. மதுரை தெப்பக்குளம் போலீஸ் இன்ஸ்பெக்டர் துரைப்பாண்டியன் தலைமையில் சப்-இன்ஸ்பெக்டர்கள் அழகுமுத்து, மார்ட்டின் செல்வராஜ், போலீஸ்காரர்கள் சித்திரைகுமார், போதும்பொன்னு ஆகியோர் காமராஜர் சாலையில் வாகன சோதனையில் ஈடுபட்டனர்.

மருதுபாண்டியர் சிலை அருகே நின்ற போலீசார் விரகனூர் சாலையில் வேகமாக வந்த மோட்டார் சைக்கிளை தடுத்து நிறுத்தினர். அதில் கல்லூரி மாணவர் சிலம்பரசன் 60 வயதான பெருமாயி என்ற பெண்ணுடன் வந்தார். அவர்கள் முன்னுக்குப்பின் முரணாக பேசியதால் போலீசார் சோதனை நடவடிக்கையில் இறங்கினர். அப்போது பெருமாயி 1 1/2 கிலோ கஞ்சாவை சிறு, சிறு பொட்டலங்களாக மறைத்து வைத்திருப்பது கண்டு பிடிக்கப்பட்டது. இதனை தொடர்ந்து இருவரும் கைது செய்யப்பட்டனர்.

அவர்களிடம் போலீசார் தீவிர விசாரணை நடத்தியதில் விரகனூர் மகாராஜ நகரில் வீட்டை வாடகைக்கு எடுத்து கஞ்சா பதுக்கியிருப்பது தெரியவந்தது. இதன்பேரில் குறிப்பிட்ட வீட்டில் போலீசார் சோதனை செய்தபோது அங்கு 2 கிலோ வீதம் 190 கஞ்சா பொட்டலங்கள் இருப்பது கண்டுபிடிக்கப்பட்டது. மொத்தம் 376 கிலோ கஞ்சா அங்கு இருந்தது. அவற்றின் மதிப்பு ரூ.35 லட்சம் ஆகும். அவற்றை பறிமுதல் செய்த போலீசார் அங்கிருந்த பால்ராஜ் மற்றும் மாரியம்மாளை கைது செய்தனர்.

இதனை இன்று நிருபர்களிடம் தெரிவித்த போலீஸ் துணை கமிஷனர் திரு நாவுக்கரசு, கைப்பற்றப்பட்ட கஞ்சா, ஆந்திர மாநிலத்தில் இருந்து வாங்கி வரப்பட்டுள்ளதாக தெரிவித்தார். மேலும் அவர் கூறியதாவது:-

ஆந்திர மாநிலத்தில் இருந்து கஞ்சாவை வாங்கி வந்து இங்கிருந்து பல பகுதிகளுக்கும் அனுப்பி உள்ளனர். 35 லட்சம் ரூபாய் மதிப்புள்ள கஞ்சா பறிமுதல் செய்யப்பட்டுள்ள நிலையில் அதனை வாங்கி வந்தது எப்படி? யார்? யாருக்கு தொடர்பு உள்ளது என்பது குறித்து தீவிர விசாரணை நடைபெற்று வருகிறது. மேலும் இந்த விவகாரத்தில் பெருமாயியின் கணவர் காளை, ஜெயராணி, பிரசாந்த் ஆகியோர் தறைமறைவாகி விட்டனர். அவர்களை தேடும் பணி தீவிரமாக நடந்து வருகிறது.

இதற்கிடையில் கல்லூரி மாணவர் சிலம்பரசன் பிடிபட்டுள்ளதால் அவர் மூலம் வேறு கல்லூரி மாணவர்களுக்கு கஞ்சா சப்ளை செய்யப்பட்டுள்ளதா? என்ற கோணத்திலும் போலீசார் விசாரித்து வருகின்றனர். இவ்வாறு அவர் கூறினார்.

கஞ்சா கும்பலை மடக்கிய போலீசாருக்கு பரிசு வழங்கப்பட்டது. மதுரையில் முதல் முறையாக அதிக அளவுள்ள கஞ்சா பிடிபட்டுள்ளது இதுவே முதன்முறை என கூறப்படுகிறது.

மாலைமலர்

பரிசை கஞ்சாவா தரலையே?

மாணவர்கள்???

இவ்வளவு அளவு பிடிபட்டது முதல் முறை எனினும் கல்லூரி மாணவர்களுக்கு வழங்குவது நெடுக்ன்காலமாய் நடந்தேறிவருகிறது இங்கு