பெரிய பண்ணை வீடு. காம்பவுண்டு சுவர் போடப்பட்டு நடுவில் வீடு அமைந்திருந்தது. வீட்டை சுற்றி மரம் செடி, கொடிகள் வளர்க்கப்பட்டன. மா, கொய்யா, மாதுளை, நெல்லி போன்ற பழ மரங்களும் அதில் நின்றன.

வீட்டையும், தோட்டத்தையும், காவல் காக்க நாய் ஒன்றை வளர்த்து வந்தார் வீட்டுக்காரர். மரங்களில் விளையும் காய்கனிகளை அணில்களும், பறவைகளும் சாப்பிடும்.

சில அணில்கள் அங்குள்ள மரப்பொந்தில் வாழ்ந்து வந்தன. அவை காய்கள் நன்றாக பழுக்கும் முன்பாக செம்பழமாக இருக்கும் பொழுதே கடித்து உண்ணும். சில சமயம் பழுத்து கீழே விழும் பழங்களை எடுத்து தின்ன அணில்கள் கீழே இறங்கும்.

மரத்தைவிட்டு இறங்கும் அணில்களை நாய் பிடித்து தின்றுவிட ஆசைப்படும். ஆனால் அணில்கள் நாயின் பிடியில் சிக்குவதே இல்லை.

நாய் ஓடி வருவதை அறிந்த உடனே அணில்கள் சுவற்றிலோ, மரத்திலோ ஏறிக்கொள்ளும். அன்றும் அப்படித்தான் நாய், ஒரு அணிலை கவ்விப்பிடிக்க முயன்றது. அந்த அணில் சுவற்றில் ஏறித் தப்பிவிட்டது.

அணில் அகப்படாததால் ஏமாற்றம் அடையும் நாய், `ஏய், பயந்தாங் கொள்ளி பயலே, சுவர் மீது ஏறி தப்பிச்சுட்டியா? கீழே இறங்கி வாடா, ஒழிச்சிக் கட்டிடறேன்' என்று குரைக்கும்.

`யாரைப் பார்த்து பயந்தாங்கொள்ளின்னு சொல்றே. நீ மேலே ஏறி வா, உன் பல்லை உடைச்சி கையில் கொடுக்குறேன்' என்று நாயிடம் அணில் சொல்லும்.

இப்படியாக நாயும், அணிலும் தினம் தினம் வாய் வலிக்க சண்டை போட்டுக் கொண்டிருந்தன.

ஒரு நாள், அணில் நன்கு கனிந்த பழத்தை ருசித்துச் சாப்பிட்டுக் கொண்டிருந்தது. இடையே நாயைப் பார்த்து கேலி செய்து கொண்டே, வாலை இப்படியும் அப்படியும் ஆட்டி குறும்புகள் செய்து கொண்டே பழத்தை தின்றது.

பழத்தின் சுவையிலும், நாயைக் கிண்டல் செய்வதுமாக மெய்மறந்து நின்ற அணிலை, ஒரு பருந்து பறந்து வந்து பிடிக்கப் பார்த்தது. பருந்தின் நகங்கள் அணிலின் முதுகில் கீறிவிட்டது. இதைப் பார்த்துவிட்ட நாய், `லொள் லொள்' என்று குரைத்துக் கொண்டே பருந்தைப் பிடிப்பதுபோல் தாவிக் குதித்தது. உடனே பயந்துபோன பருந்து அணிலை விட்டுவிட்டு உயரமாக பறந்து வட்டமடித்தது. சுதாரித்துக் கொண்ட அணிலும் அவசரமாக ஓடி பொந்துக்குள் மறைந்து கொண்டது.

சிறிது நேரம் கழித்து வெளியே வந்த அணில் நாய்க்கு நன்றி சொன்னது. `என்னுடன் அடிக்கடி சண்டைபோட்டாலும் ஆபத்தில் இருந்து என்னை காப்பாற்றி விட்டீர்கள், உங்களுக்கு நான் என்ன கைமாறு செய்யப்போகிறேனோ?' என்றது அணில்.

`தம்பி, நமக்குள் போட்டி, பொறாமை, கருத்து வேறுபாடு இருந்தாலும் வேற்று ஆள் வந்து தாக்கினால் அனுமதிக்க முடியுமா? அப்படி ஒருவருக்கு ஒருவர் உதவாமல் இருந்தால் நாளை என்னையும் யாராவது வந்து தாக்கி அழித்துவிடுவார்கள். நாம் ஒரே இடத்தில் வாழும் வரை நமக்குள் கருத்து வேறுபாடு இருந்தாலும் பிரச்சினை என்று வரும்போது ஒற்றுமையாக செயல்பட வேண்டும். எதிரிக்கு விட்டுக் கொடுக்கக் கூடாது?' என்றது நாய்.

`அண்ணே அதனால்தான் உங்களை நன்றியுள்ள ஜீவன் என்று அனைவரும் கொண்டாடுகின்றனர்' என்றன அணில்களின் கூட்டம்.

த.விஜயபால்

தமிழ்நாட்டு அரசியயல்வாதிகளும் இப்படி இருந்திருந்தால் ?