அன்புக்குரியவனே..!!

நின் காதலில் கசிந்துருகி
கண்ணீர்க்கடலில்
நினைவுப்படகில் தத்தளிக்கும்
எனைக் கரம் பிடித்து
கரைசேர்க்க
அன்புக்குரியவனே அருகே வா...!!
‎
பொய்யுரைக்கா உன் விழி கூர்ந்து
உள்ளிருக்கும் எனை உணர
அன்புக்குரியவனே அருகே வா...!!
‎
பசி, தூக்கம் தவிர்த்து
பசலையில் வாடும் எனை
முத்தம் பரிமாறி
நின்மடிகிடத்தி உறங்கவைக்க
அன்புக்குரியவனே அருகே வா..!!
‎
மனதாள்பவனே
நான் உந்தன் சுவாசமா..
நீ கொள்ளும் பயணத்தின்
ஓட்டுநரா...
நடத்துனரா..
உடன் பயணிக்கும் பயணியா..
இடமில்லாமல் இறக்கிவிடப்பட்டவளா..??
நானறிய
அன்புக்குரியவனே அருகே வா..!!!
‎
என் எண்ணத்தை சமைத்து
கவிதையாய்ப் பரிமாற
உண்டு மகிழ்ந்து
உன்னுள்ளம் உரைக்க
அன்புக்குரியவனே அருகே வா...!!!
‎
யாவற்றிலும், யாதுமாய்
தோன்றுபவனே..
என்னவனாய் என்னில்லத்தில்
என்றென்றும்
நீயாகத் தோற்றமளிக்க
அன்புக்குரியவனே அருகே வா...!!!
‎
இயற்கையின் இரகசியத்தை
இடைவிடாது பேசிமகிழ
அன்புக்குரியவனே அருகே வா...!!!
‎
நம் காதல்பயணத்தில்
மழலையிசை கேட்டு மகிழ..
பிரபஞ்சம் போற்ற
நம் பிள்ளைகளை பேணிகாக்க
அன்புக்குரியவனே அருகே வா..!!!
‎
இதயத்தில் இருப்பவனே
என் இறுதிப் பயணத்தின்
இறங்(க்)கும் தருவாயில்
சுவாசம் துறந்து
உன் இதயத்தில் கலக்க
அன்புக்குரியவனே அருகே வா..!!
‎
என் கரம்பிடித்து
காதல் உணர்த்திய நின் கரம்
என் சதைக்கு தீ மூட்டி
பாரினில் பஞ்சபூதமிருக்கும்வரை
நின் நெஞ்சத்தில் குடியிருக்க
அன்புக்குரியவனே அருகே வா...!!!‎

--நட்புடன் காயத்ரி வைத்தியநாதன்

முதல் கவி அருமை ... தொடர்ந்து எழுதுங்கள் ..

விருப்ப பொத்தனை பாவித்தேன் ..

மனதாள்பவனே
நான் உந்தன் சுவாசமா..
நீ கொள்ளும் பயணத்தின்
ஓட்டுநரா...
நடத்துனரா..
உடன் பயணிக்கும் பயணியா..
இடமில்லாமல் இறக்கிவிடப்பட்டவளா..??
நானறிய
அன்புக்குரியவனே அருகே வா..!!!
‎

இந்த வரிகள் ரொம்ப பிடிச்சிருக்கு...

அருமையா இருக்கு கவிதை

சிந்தைக்கு சிதை மூட்டியவனை
சிதைக்கு தீமூட்ட அழைக்கும்
உன்னதமே காதல்

அன்புக்குரியவன் சிந்தையில் சிதறாமல்
இருப்பது வரிகளில் வலிகளாக - நன்று...

அருமை வரிகள்

கருத்திட்டு எம்மை ஊக்குவிக்கும் தோழமைகளுக்கு நன்றி..எம் எழுத்துக்களை வளப்படுத்த குறையிருப்பினும் தவறாமல் சுட்டிக்காட்டவும்..குறைகளையும், நிறைகளாய் ஏற்கும் பக்குவமுண்டு எமக்கு..நன்றி.

யினியவன் wrote:சிந்தைக்கு சிதை மூட்டியவனை
சிதைக்கு தீமூட்ட அழைக்கும்
உன்னதமே காதல்

அன்புக்குரியவன் சிந்தையில் சிதறாமல்
இருப்பது வரிகளில் வலிகளாக - நன்று...

...எமது வரிகளும் நட்புகளின் சிந்தையில் என்றும் நினைவிருக்கும்படி முயற்சிக்கிறேன்,,,நன்றி தோழர்..

காதலில் கசிந்து
விழிகள் மோதி
பசி தூக்கம் மறந்து
மனதாள்பவன்
மனதால பயணித்து
எண்ணங்களை சமைத்து
யாதுமாய் தோற்றமளித்து
மழலை இசை கேட்டு
இதயம் இறக்கும் வரை
இறுதி வரை பயணிக்கும்
உங்கள் அன்புக்குரியவர் அருகில் வர வாழ்த்துக்கள் ,.....



கவிதை அருமை ......

பெண்ணின் பார்வையில் ஆணை நேசிக்கும் கவிதை அருமை...
வார்த்தைகளில் பலம் சேர்த்து மனதின் பலவீனத்தைச் சொல்வது சூப்பர்...
நன்று...வாழ்த்துகள்...