ஏரியன்-5 ராக்கெட் மூலம் ஜிசாட்-10 செயற்கைக்கோள் வெற்றிகரமாக விண்ணில் செலுத்தப்பட்டது

ஏரியன்-5 ராக்கெட் மூலம் ஜிசாட்-10 செயற்கைக்கோள் வெற்றிகரமாக விண்ணில் செலுத்தப்பட்டது. இது நவம்பர் மாதம் பயன்பாட்டுக்கு வரும்.

ஜிசாட்-10 செயற்கைக்கோள்

தொலை தொடர்பு சேவை மேம்பாட்டுக்காக இந்திய விண்வெளி ஆராய்ச்சி அமைப்பு இஸ்ரோவின் விஞ்ஞானிகள் ரூ.750 கோடியில், 3.4 டன் எடையுடன் ஜிசாட்-10 என்ற செயற்கைக்கோளை உருவாக்கினர். இந்த செயற்கைக்கோள் இஸ்ரோவின் 101-வது திட்டத்தில் உதித்தது ஆகும்.

ஜிசாட்-10 செயற்கைக்கோளில் 12 கு பாண்ட், 12 சி பாண்ட், 6 விஸ்தரிக்கப்பட்ட சி பாண்ட் என 30 டிரான்ஸ்பாண்டர்கள் பொருத்தப்பட்டுள்ளன.

கடைசி நிமிடத்தில் ஒத்திவைப்பு

பிரெஞ்ச் கயானாவில், கொரவ் என்ற இடத்தில் அமைந்துள்ள ஐரோப்பிய விண்வெளித்தளத்தில் இருந்து ஏரியன் -5 ராக்கெட் மூலமாக ஜிசாட்-10 செயற்கைக்கோளை கடந்த 23-ந் தேதி விண்ணில் செலுத்த ஏற்பாடு ஆகி இருந்தது. ஆனால் ராக்கெட்டின் மேல்பகுதியில் மிகச்சிறிய அளவில் ஒரு பாதிப்பு ஏற்பட்டு இருப்பது கண்டறியப்பட்டது. அந்தப் பாதிப்பு, ராக்கெட்டின் முக்கிய பாகங்களை செயலிழக்கச்செய்யும் ஆபத்து இருந்ததால், ஜிசாட்-10 செயற்கைக்கோளை விண்ணில் செலுத்தும் நடவடிக்கை ஒத்தி போடப்பட்டது.

இந்த நிலையில் ராக்கெட்டின் மேல் பகுதி சரிசெய்யப்பட்டது. அதைத் தொடர்ந்து ஜிசாட்-10 செயற்கைக்கோளை ஏரியன்-5 ராக்கெட் மூலம் விண்ணில் செலுத்தும் ஏற்பாடுகள் பிரெஞ்ச் கயானாவில் முடுக்கி விடப்பட்டது. 11 மணி நேரத்துக்கும் அதிகமாக கவுண்ட் டவுன் நடைபெற்று வந்தது.

வெற்றி

இந்திய நேரப்படி நேற்று அதிகாலை 2.48 மணிக்கு ஜிசாட்-10 செயற்கைக்கோளை சுமந்து கொண்டு, ஏரியன்-5 ராக்கெட் விண்ணில் வெற்றிகரமாகப் பாய்ந்தது. 30 நிமிடம் 45 வினாடிகள் விண்ணில் பயணம் செய்த நிலையில், ஜிசாட்-10 செயற்கைக்கோள் ஜி.டி.ஓ. என்னும் அதற்குரிய சுற்றுப்பாதையில் செலுத்தப்பட்டது.

அதைத் தொடர்ந்து ஜிசாட்-10 செயற்கைக்கோளின் கட்டுப்பாடு கர்நாடக மாநிலம், ஹசனில் உள்ள இஸ்ரோவின் தலைமை கட்டுப்பாட்டு மையத்தின்வசம் வந்தது.

திருப்தி என தகவல்

இதுதொடர்பாக இஸ்ரோ ஒரு செய்திக்குறிப்பு வெளியிட்டுள்ளது.

அதில், " ஜிசாட்-10 செயற்கைக்கோள் ஏரியன்-5 ராக்கெட்டின் மூலம் விண்ணில் பாய்ந்து, அதன் சுற்றுப்பாதையில் செலுத்தப்பட்டதைத் தொடர்ந்து செயற்கைக்கோளின் மிக முக்கிய துணை அமைப்புக்களான எரிசக்தி, அனல்சக்தி, கமாண்ட், சென்சார்கள், கட்டுப்பாடு அனைத்தும் சோதித்துப் பார்க்கப்பட்டது. அவை அனைத்தும் நல்ல முறையில் இயங்குகின்றன. இது திருப்தி அளிக்கிறது'' என கூறப்பட்டுள்ளது.

நவம்பர் முதல் பயன்பாடு

ஜிசாட்-10 கிழக்கு சுற்றுவட்டப்பாதையில், 83 டிகிரியில் நிலைநிறுத்தப்படும் என தகவல்கள் கூறுகின்றன. சுற்றுவட்டப்பாதையில் அனைத்து சோதனைகளும் முடிந்தபின்னர், நவம்பர் மாதம் ஜிசாட்-10 செயற்கைக்கோள் பயன்பாட்டுக்கு வந்து விடும்.

ஜிசாட்-10 செயற்கைக்கோளின் ஆயுள்காலம் 15 ஆண்டுகள் ஆகும்.

தினத்தந்தி

வாழ்த்துகள்.

என்ன பயன்கள் நமக்குன்னு தினத்தந்தி சொல்லவே இல்லையே.

யினியவன் wrote:வாழ்த்துகள்.

என்ன பயன்கள் நமக்குன்னு தினத்தந்தி சொல்லவே இல்லையே.

நவம்பர் 10 அப்புறமா சொல்லுவாங்க