பாக்டீரியாக்களுக்கு எதிரான பாதுகாப்பு

இந்த உலகத்தில் எல்லா இடங்களிலும் பாக்டீரியாக்களின் ராஜ்ஜியம்தான். அதுமட்டுமில்லாமல், உலகின் பல உயிரினங்கள் வாழ முடியாத தட்பவெப்ப சூழ்நிலைகளான பனிப்பிரதேசங்கள், பாலைவனங்கள், வெந்நீர் ஊற்றுகள் என எல்லா இடங்களிலும் பாக்டீரியாக்களின் கொடி பறந்துகொண்டுதான் இருக்கிறது.

இந்த பாக்டீரியாக்கள் யாரையும் தொந்தரவு செய்யாமல் அவைபாட்டுக்கு `சிவனே' என்று இருந்துவிட்டால் பரவாயில்லை. மாறாக, அவை நம்மை எப்படியெல்லாம் தொந்தரவு செய்யமுடியுமோ, அத்தனை வகையிலும் தொந்தரவு செய்துகொண்டுதான் இருக்கின்றன. முக்கியமாக ஆபத்தான நோய்கள் மூலமாக.

இதனால், நுண்ணுயிரியல் விஞ்ஞானிகள் பலர், பாக்டீரியாக்கள் முதன்முதலில் கண்டுபிடிக்கப்பட்ட காலம்தொட்டு இதுவரையில், அவற்றை ஒழிக்கும் முயற்சியில் ஈடுபட்டுக்கொண்டுதான் இருக்கிறார்கள்.

இந்த முயற்சியின் பலனாக, பல நுண்ணுயிர்க்கொல்லி மருந்துகள் மற்றும் ஸ்ப்ரேக்கள் இதுவரை உருவாக்கப்பட்டு இருந்தாலும், பாக்டீரியாக்களிடமிருந்து முழுமையான பாதுகாப்பு என்பது இன்னும் கிடைக்கவே இல்லை.

ஆனால், பாக்டீரியாக்கள் பற்றிய கவலை இனி உங்களுக்கு வேண்டாம். பாக்டீரியாக்களிடம் இருந்து நம்மை பாதுகாக்க வந்துவிட்டது `ஸ்லிப்ஸ்' என்கிறார்கள் அமெரிக்காவின் ஹார்வர்டு பல்கலைக்கழக ஆய்வாளர்கள். மிகவும் வழுக்கும் தன்மையுள்ள, `ஸ்லிப்ஸ்' என்றழைக்கப்படுவது ஒரு திரவப்படலம் ஆகும்.

இது பூச்சிகளை கவர்ந்து, கொன்று உண்ணும் `பிட்ச்சர் பிளான்ட்' எனும் ஒருவகை தாவரத்தில் இருந்து எடுக்கப்பட்டது. இந்த திரவப்படலத்துக்கு, பாக்டீரியாக்களின் வளர்ச்சியை தடுக்கும் பிரத்தியேக திறன் இருக்கிறது என்று கண்டுபிடித்திருக்கிறது இந்த ஹார்வர்டு ஆய்வுக்குழு.

`ஸ்லிப்ஸ்' படலத்தைக் கொண்டு பல்வேறு வகையான ஆய்வுகளை மேற்கொண்ட ஆய்வாளர்கள், காற்றில் மிதந்து செல்லும் பாக்டீரியாக்கள் இதன் மீது வளர முடியாது என்று ïகித்தார்கள். ஏனென்றால், மிக மிக வழுக்கும் தன்மையுள்ள ஸ்லிப்ஸ் மீது படர்ந்து அல்லது ஒட்டிக்கொண்டு, பின்னர் வளர்ந்து, பாக்டீரிய குழுக்களான பயோ படலங்களை பாக்டீரியாக்களால் வளர்க்க முடியாது.

ஆய்வாளர்கள் ïகித்தது போலவே, ஸ்லிப்ஸ் மீது பொதுவான மற்றும் ஆபத்தான பாக்டீரிய பயோ படலங்களால் வளர முடியவில்லை. உதாரணமாக, இ.கோலை உள்ளிட்ட பாக்டீரிய படலங்களின் வளர்ச்சியை, ஸ்லிப்ஸ் சுமார் 96 முதல் 99 சதவீதம் வரை குறைத்திருந்தது குறிப்பிடத்தக்கது.

அப்படியென்றால், நாம் வீடுகள் உள்ளிட்ட பல இடங்களில் இதுவரை தெளித்துக்கொண்டு இருக்கும் பாக்டீரியா கொல்லி மற்றும் கிருமிநாசினிகளால் பலனே இல்லையா என்றுதானே கேட்கப்போகிறீர்கள்? பலன் உண்டு, ஆனால் அது தற்காலிகமானதே. நிரந்தரமானதல்ல என்கிறது அறிவியல்.

ஏனென்றால், சில உயிரணுக்கள் மட்டும் மீதமிருந்தாலே மீண்டும் உயிர்த்தெழுந்து பரவிவிடும் பிரத்யேக திறனுள்ள `சாம்பீ' பாக்டீரியாக்களை, தற்போதுள்ள பாக்டீரியா கொல்லிகளால் ஒன்றும் செய்ய முடியாதாம்.

ஆனால், ஸ்லிப்ஸ் மூலமாக கிடைக்கும் பாதுகாப்பு நீண்டகாலம் நிலைத்திருக்கக் கூடியது. உதாரணமாக, ஒரு வார காலம் உப்புத் தண்ணீரில் ஊற வைக்கப்பட்ட பின்னரும், ஸ்லிப்ஸ் உறுதியாக இருந்ததாம். அதுமட்டுமில்லாமல், அமிலங்கள் மற்றும் அல்ட்ரா வயலெட் கதிர்கள் போன்றவற்றாலும் பாதிப்படையாத தன்மையுடையது ஸ்லிப்ஸ் என்பது குறிப்பிடத்தக்கது.

சுவாரசியமாக, தற்போது பயன்பாட்டிலுள்ள மிகச்சிறந்த பாக்டீரியா கொல்லியான பாலி எத்திலீன் கிளைக்காலை விட ஸ்லிப்ஸ் 35 மடங்கு சக்தி வாய்ந்ததாம். மேலும், தற்போதுள்ள பாக்டீரியா கொல்லிகள் விஷத்தன்மை உடையவை. ஆனால் ஸ்லிப்ஸில் விஷத்தன்மை ஏதுமில்லை என்பதும் கவனிக்கத்தக்கது.

மிகவும் சுவாரசியமாக, உடலுக்கு உள்ளேயும் பாக்டீரியாக்களுக்கு எதிரான பாதுகாப்பை அளிக்கும் பிரத்தியேக திறன் உடையதாம் இந்த ஸ்லிப்ஸ். இந்த தனித்துவமான பண்பு காரணமாக, உடலுக்குள் பொருத்தக்கூடிய உயிர்காக்கும் கருவிகளான பேஸ் மேக்கர்கள், செயற்கை இடுப்புகள், முட்டிகள் மற்றும் உட்பொருத்தி கம்பிகள் போன்றவற்றை பாக்டீரியாக்களிடம் இருந்து காப்பாற்றவும் ஸ்லிப்ஸை பயன்படுத்தலாமாம்.

ஏனென்றால், உடலுக்குள் பொருத்தப்படும் இத்தகைய கருவிகள், நாளடைவில் பாக்டீரிய தொற்றுகளால் பாதிக்கப்பட்டு செயலிழந்துபோகும் ஆபத்து இருக்கிறது.

ஆக மொத்தத்தில், `ஸ்லிப்ஸ் இருக்க, பாக்டீரியா பற்றிய பயமேன்' என்கிறார்கள் ஹார்வர்டு பல்கலைக்கழக ஆய்வாளர்கள்.

முனைவர் பத்மஹரி

யாமிருக்க பயமேன்னு தமிழ் கடவுள் சொல்றாப்ல
ஸ்லிப்ஸ் இருக்க பாக்டீரியா பயமேன் ன்னு இவரு சொல்றாரு