வண்டலூர் அருகே அ.தி.மு.க. ஊராட்சி தலைவர் ஓட ஓட விரட்டி படுகொலை

வண்டலூர் அருகே அ.தி.மு.க. ஊராட்சி மன்ற தலைவர் ஓட ஓட விரட்டி, படுகொலை செய்யப்பட்டார். காரில் வந்த 6 பேர் கொண்ட கும்பல் ஸ்கூட்டரில் சென்ற அவர் மீது மோதி, அவரை வெட்டிச் சாய்த்தது.

அ.தி.மு.க. ஊராட்சி தலைவர்

சென்னையை அடுத்த வண்டலூர் அருகே உள்ள மண்ணிவாக்கம் ஊராட்சி மன்ற தலைவர் புருஷோத்தமன் (வயது 45). மண்ணிவாக்கம் அ.தி.மு.க. கிளை செயலாளராகவும் இருந்து வந்தார்.

நேற்று காலை 7.45 மணி அளவில் வழக்கம் போல் அவர் ஓட்டேரி போலீஸ் நிலையம் பின்புறம் உள்ள கடைக்கு டீ குடிப்பதற்காக, ஸ்கூட்டரில் சென்றார். அப்போது எதிரே வந்த ஒரு கார் திடீரென புருஷோத்தமனின் ஸ்கூட்டர் மீது மோதியது. இதில் நிலை தடுமாறிய அவர், ஸ்கூட்டரோடு கீழே விழுந்தார்.

ஓட ஓட விரட்டி கொலை

அவர் சுதாரித்துக்கொண்டு எழுவதற்குள், காரில் இருந்து 6 பேர் கொண்ட கும்பல் இறங்கி, வீச்சு அரிவாள், கத்தி, உருட்டுக்கட்டை போன்ற பயங்கர ஆயுதங்களுடன் அவரை சுற்றி வளைத்தது. இதை கண்டு அதிர்ச்சி அடைந்த புருஷோத்தமன், பதறியடித்து எழுந்து, போலீஸ் நிலையம் நோக்கி ஓடினார்.

ஆனால் அந்த கும்பல், அவரை மறித்து, ஓட ஓட விரட்டிச்சென்று, வீச்சரிவாளால் தலை மற்றும் உடலில் பல்வேறு இடங்களில் சரமாரியாக வெட்டியது. இதில் படுகாயம் அடைந்து ரத்த வெள்ளத்தில் சாய்ந்த புருஷோத்தமன், சம்பவ இடத்திலேயே துடி துடித்து இறந்தார். உடனே கொலையாளிகள் 6 பேரும் காரில் ஏறி தப்பிச்சென்று விட்டனர்.

உறவினர்கள் வாக்கு வாதம்

புருஷோத்தமன் படுகொலை செய்யப்பட்ட தகவல் அறிந்ததும் அவரது உறவினர்களும், நண்பர்களும், அ.தி.மு.க.வினரும் சம்பவ இடத்தில் குவிந்தனர். இந்த படுகொலையால் அந்தப்பகுதியில் பரபரப்பும், பதற்றமும் ஏற்பட்டது.

இதற்குள், கொலை பற்றி தகவல் அறிந்த காஞ்சீபுரம் மாவட்ட போலீஸ் சூப்பிரண்டு மனோகரன், செங்கல்பட்டு துணை சூப்பிரண்டு தணிகைவேல், கூடுவாஞ்சேரி இன்ஸ்பெக்டர் வெங்கடாச்சலம் ஆகியோர் போலீஸ் படையுடன் சம்பவ இடத்திற்கு சென்றனர். அங்கு கொலை குறித்து விசாரணை நடத்தி, புருஷோத்தமனின் பிணத்தை கைப்பற்றி பிரேத பரிசோதனைக்கு அனுப்ப முயற்சி செய்தனர். ஆனால் அவரது உறவினர்கள் மற்றும் கிராம மக்கள், "கொலையாளிகளை உடனடியாக பிடித்தால் மட்டுமே உடலை எடுக்க விடுவோம்'' என்று போலீசாரிடம் வாக்குவாதத்தில் ஈடுபட்டனர்.

சமரசம்

இதனை தொடர்ந்து போலீசார், புருஷோத்தமனின் உறவினர்கள் மற்றும் கிராம மக்களிடம் பேச்சுவார்த்தை நடத்தினார்கள். கொலையாளிகளை பிடிக்க உடனடியாக நடவடிக்கை எடுக்கப்படும் என்று போலீஸ் அதிகாரிகள் உறுதி அளித்ததை தொடர்ந்து, சுமார் 2 மணி நேரம் கழித்து போலீசார், புருஷோத்தமனின் பிணத்தை கைப்பற்றி, பிரேத பரிசோதனைக்காக செங்கல்பட்டு அரசு ஆஸ்பத்திரிக்கு அனுப்பி வைத்தனர்.

தேர்தல் முன்விரோதம்

இவர், ஏற்கனவே 1996-ம் ஆண்டு ஊராட்சி மன்ற உறுப்பினராக இருந்து உள்ளார்.

கடந்த ஆண்டு நடைபெற்ற உள்ளாட்சி தேர்தலில் மண்ணிவாக்கம் ஊராட்சி மன்ற தலைவர் பதவிக்கு அ.தி.மு.க சார்பில் போட்டியிட்டார். அதில், ஆயிரத்து 115 வாக்குகள் வித்தியாசத்தில், தன்னை எதிர்த்து போட்டியிட்ட தி.மு.க. வேட்பாளர் போகி கிருஷ்ணனை தோல்வி அடைய செய்தார். இதனால், போகி கிருஷ்ணனுக்கும், புருஷோத்தமனுக்கும் இடையே தேர்தல் முன்விரோதம் இருந்து வந்தது.

5 தனிப்படை அமைப்பு

இது குறித்து காஞ்சீபுரம் மாவட்ட போலீஸ் சூப்பிரண்டு மனோகரன் நிருபர்களிடம் கூறியதாவது:-

"கொலை செய்யப்பட்ட புருஷோத்தமனுக்கும், கடந்த உள்ளாட்சி தேர்தலில் ஊராட்சி தலைவர் பதவிக்கு போட்டியிட்டு தோல்வி அடைந்த முன்னாள் துணை தலைவர் போகி கிருஷ்ணனுக்கும் தேர்தல் முன்விரோதம் இருந்து வந்தது. இந்த முன்விரோதம் காரணமாக இந்த கொலை நடந்து உள்ளது. இந்த கொலை வழக்கு தொடர்பாக போகி கிருஷ்ணன் மற்றும் அவரது கூட்டாளிகளை பிடிக்க 5 தனிப்படை அமைக்கப்பட்டு உள்ளது.''

இவ்வாறு அவர் தெரிவித்தார்.

கடைகள் அடைப்பு

போலீஸ் நிலையம் பின்புறத்திலேயே ஊராட்சி மன்ற தலைவர் வெட்டி படுகொலை செய்யப்பட்ட சம்பவம், காட்டு தீ போல் மண்ணிவாக்கம் பகுதி முழுவதும் பரவியது. இதையடுத்து அந்தப் பகுதி முழுவதும் உள்ள கடைகள் அனைத்தும் அடைக்கப்பட்டன. அந்தப்பகுதியில் பதற்றத்தை தவிர்க்க போலீஸ் படை குவிக்கப்பட்டது.

கொலை செய்யப்பட்ட ஊராட்சி மன்ற தலைவர் புருஷோத்தமனுக்கு சாந்தி (38) என்ற மனைவியும், கவுதம் (20) என்ற மகனும் உள்ளனர். சாந்தி, அ.தி.மு.க. மாவட்ட பிரதிநிதியாக உள்ளார். கவுதம், தாம்பரம் அருகே உள்ள தனியார் கல்லூரியில் பி.பி.ஏ. 2-ம் ஆண்டு படித்து வருகிறார்.

6 பேர் கோர்ட்டில் சரண்

இதற்கிடையே, நேற்று மாலையில் போலீசாரால் தேடப்பட்டு வந்த மண்ணிவாக்கம் ஊராட்சி மன்ற முன்னாள் துணை தலைவர் போகி கிருஷ்ணன் (வயது 40), அவரது கூட்டாளிகள் கேசவன் (33), பிரகாஷ் (28), கவாஸ்கர் (29), கணேஷ் (24), தாம்பரம் கடப்பேரியைச்சேர்ந்த ஆறுமுகம் (23) ஆகிய 6 பேர் திருவள்ளூர் ஜ×டீஷியல் மாஜிஸ்திரேட்டு கோர்ட்டு எண் 2-ல் சரண் அடைந்தனர். அவர்களை 15 நாள் காவலில் வைக்கும்படி மாஜிஸ்திரேட்டு உத்தரவிட்டார்.

அதன்படி அவர்கள் சிறையில் அடைக்கப்பட்டனர்.

தினத்தந்தி

சினிமாவுல வர்ர வில்லன் மாரி இருக்காரு.