கதை எண். 20 - புதிய பாரதம் (சிறுகதை சின்னத்திருவிழா)

புதிய பாரதம்

இன்று அவனுடைய கனவு நனவாகிய நாள். அவனுக்கு மட்டுமல்ல பெரும்பாலான இந்தியர்களுக்கு இதுதான் கனவாக இருந்திருக்க முடியும். ஆம், லஞ்சமற்ற இந்தியா உருவாகிவிட்டது. லஞ்சம் இல்லாத நாடுகளின் பட்டியலில் இந்தியாவுக்கு முதலிடம். இது எப்படி சாத்தியமாயிற்று?

அவனுக்கு வயது ஐந்து. பள்ளியில் முதல் நாள். இந்தியாவின் வளமை, பெருமை, தொன்மை இவற்றைக்கேட்டே ஆரம்பமானது அவன் பள்ளிப்பருவம். இதனால் இயல்பாகவே தாய்நாட்டின் மீதான அவன் ஆர்வம் கொழுந்துவிட்டு எரியத்தொடங்கியது.

ஆனால், அவன் எண்ணங்களின் நடுவே கரும்புள்ளியாய் கவலையளித்தவை, அவ்வப்போது நடக்கும் பெரும் ஊழல்கள். எப்படியாவது இந்தியாவை, ஒரு லஞ்சமற்ற தேசமாய் மாற்றவேண்டுமேன்பதே, லட்சியமாய் அவன் கண்முன் விரிந்தது. ஆனால், தனியொரு மனிதனாய் அவனால் எப்படி சாதிக்கமுடியும் ? அப்படியே செய்தாலும், பதவிபடைத்த அரசியல்வாதிகளின் கைகளிலிருந்து அவனால் தப்பிக்கத்தான் முடியுமா?

நாட்டின் பிரதமர் ஆகிவிட்டால் , எல்லா அதிகாரங்களையும் தனக்குக்கீழே கொண்டுவந்துவிட்டால், அனைத்தும் சாத்தியம்தான். ஆனால் அவ்வளவு சுலபமாக, பிரதமர் ஆகிவிடமுடியுமா? ஒரு ஊர்த்தலைவர் ஆவதற்கே மற்றவர்கள் படும்பாட்டை அவன் பார்த்துக்கொண்டே வளர்ந்தவன்தான். ஆகவே அவன் சிந்திக்கலானான். பணம், பிரபலம்,ஆட்சிதிறமை இவை மூன்றே பிரதான தகுதிகளாய் இருப்பதாய் அவன் உணர்ந்தான். அதை மனதில் கொண்டே வளரலானான்.

பள்ளியில் தேசிய மாணவர் படையில் இணைந்து, பல குழுக்களுக்கு தலைவராக தன்னை ஒரு தலைவனாய் முன்னிலைப்படுத்தி , சிறந்த நிர்வாகியாகவும் ஆனான். அப்படியே மாநிலம், நாடு என்று தன்னுடைய சேவைகளையும் நட்பு வட்டாரத்தையும் வளர்த்தான். நண்பர்களிடையே தன்னுடைய எண்ண விதையை தூவி வேரூன்ற செய்தான்.

மட்டைப்பந்து என்றால் அவனுக்கு மிகவும் பிடிக்கும். அதில் முயன்று, தேசிய அணியில் இடம்பிடித்து, நாட்டுக்காக பல வெற்றிகளை தேடித்தந்தான். இதற்கிடையில் தான் ஈட்டிய வருவாயைக்கொண்டு, ஒவ்வொரு மாநிலத்திலும், மாநிலத்தின் பல்வேறு பகுதிகளிலும் நண்பர்கள் மூலமாக நற்பணி மன்றங்கள் தொடக்கி, மக்களுக்கு சேவை புரிய தொடங்கினான். அரசியல்வாதிகளின் மகன்களையும், பேரன்களையும் பெரிதும் முயன்று தன்பக்கம் இழுத்து, நற்பணி மன்றம் மூலமாக தொண்டு புரிய வைத்தான்.

அரசியல்வாதிகளின் தீயபார்வை, மன்றங்களின் மேல் விழ, அதைக்காப்பற்ற தன்னுடைய லட்சியம் நிறைவேற “புதிய பாரதம்” என்ற கட்சியை தொடங்கினான். நற்பணி மன்றங்கள் அனைத்தையும் “புதிய பாரதம்” மூலமாக ஒன்றிணைத்தான். இப்போது மக்கள் அவனை, மட்டைப்பந்து வழியாக பிரபலமானவனாகவும், இந்தியாவுக்காக போராடும் ஒரு வீரனாகவும் ஏற்றுக்கொண்டிருந்தனர்.

தேர்ந்தெடுக்கப்பட்ட வாக்களர்களோடும், திட்டமிட்ட தேர்தல் அறிக்கைகளோடும் தேர்தலை சந்தித்தான். இப்போது பணம், பிரபலம், ஆட்சிதிறமை மூன்றுமே அவனிடம் இருந்ததால் வெற்றி தேவதை தோள் தழுவினாள். தகுதியானவர்கள் அமைச்சர்களாய் அமர, தாய்நாட்டின் முன்னேற்றம் தடம் பதிக்க ஆரம்பித்தது.

அரசு அலுவலகங்களில் சான்றிதழ், ஆவணங்களுக்காக லஞ்சம் உருவாவதை அறிந்த அவன் , எல்லாருக்கும் அதை கணினி மூலமாக வழங்க ஆரம்பித்தான். குழந்தை பிறக்கும்போதே அனைத்து ஆவணங்களும் முழுமையாக, கணினி அட்டையாக வழங்கப்பட்டது. அனைத்து பணிகளுக்குமான ஏல முறைகள் வெளிப்படையாக நடக்க ஆரம்பித்தன. அதன் வெளிப்பாடு தான் லஞ்சமற்ற நாடுகளின் பட்டியலில் இந்தியாவுக்கு முதலிடம்.

இனி பாரதம் தரணியில் தலைநிமிர ,அவனோடு நாமும் சேர்ந்தே பாடுபடுவோம். புதிய பாரதம் மலரட்டும்.

500 % கற்பனை...200 % கதை..