குடமிளகாய்

**சிவா** · **சிவா** Sat Sep 22, 2012 9:35 am

அம்மா வாங்கி வந்தால் ஆசையாய் கையில் தூக்கி வைத்து விளையாடத் தூண்டும் அளவுக்கு, பார்க்க அழகாக, குண்டு குண்டென்று இருக்கும் குடமிளகாய். சாதாரண காய்ந்த மிளகாய்போல அதிக காரம் இருக்காது என்பதால் அனைவருக்குமே குடமிளகாயைப் பிடிக்கும். குடமிளகாயில் என்னென்ன சத்துக்கள் அடங்கி இருக்கிறது தெரியுமா உங்களுக்கு...

குடமிளகாயின் (நஞுக்க்ஞ்டக்சிசிக்சு) அறிவியல் பெயர் காப்சிகம் அனம். பார்க்க மணியை கவிழ்த்து வைத்தது போன்ற தோற்றத்தில் இருப்பதால் `பெல் பெப்பர்' என்ற பெயரிலும் அழைக்கப்படுவதுண்டு.

`பெல் பெப்பர்' மற்ற மிளகாய் வகைகளைவிட நோய் எதிர்ப்பு சக்தியும், சத்தும் மிக்கது. மேலும் 100 கிராம் மிளகாயில் 31 கலோரி ஆற்றல் கிடைப்பதால் குறைந்த கலோரியும், கொழுப்பும் அற்ற காய்கறியாக திகழ்கிறது.

அல்கலாய்டு மூலக்கூறுகளில் ஒன்றான `கேப்சாசின்' இதில் உள்ளது. இது கிருமி எதிர்ப்பு, நீரிழிவு எதிர்ப்பு, வலி நிவாரணம் ஆகியவற்றிற்கு உதவுகிறது.

உடலுக்கு அத்தியாவசியமான `விட்டமின் சி', சிவப்பு மற்றும் பச்சை நிற குடமிளகாயில் அதிக அளவில் உள்ளது. குறிப்பாக 100 கிராம் சிவப்பு குடமிளகாயில் 127.7 மைக்ரோகிராம் விட்டமின் சி உள்ளது. ரத்தத்தட்டுகள், தோல், சுரப்பிகள், எலும்புகளின் செயல்பாட்டிற்கு வைட்டமின் சி உறுதுணை புரிவது குறிப்பிடத்தக்கது.

`விட்டமின் ஏ' குடமிளகாயில் நல்ல அளவில் உள்ளது. மேலும் ஆன்டி-ஆக்சிடன்டுகளான ஆல்பா பீட்டா கரோட்டின், லுடின், ஸியாக்சன்தைன், கிரிப்டாக்சான்தைன் போன்றவையும் அடங்கி உள்ளன.

இரும்பு, தாமிரம், துத்தநாகம், பொட்டாசியம், மாங்கனீசு, மெக்னீசியம் போன்ற அத்தியாவசிய தாது உப்புகளும் குறிப்பிட்ட அளவில் உள்ளன.

செய்து சாப்பிடுங்கள்: குடமிளகாய் எல்லாவகை காய்கறிகளுடனும் சேர்த்து சமைக்க ஏற்றது என்பதால் உங்கள் விருப்பமான குழம்புகளில் எல்லாம் இதைச் சேர்த்து சமைத்துச் சாப்பிடலாம். சாலட், பீட்ஸா போன்றவற்றில் அதிகமாக குடமிளகாய் சேர்த்துச் சாப்பிட்டால் சுவையும், சத்தும் மிக்கதாய் இருக்கும்.