அக்னி-4 ஏவுகணை சோதனை வெற்றி 4 ஆயிரம் கி.மீ. தொலைவுக்கு சென்று இலக்கை தாக்கியது

அக்னி-4 ஏவுகணை சோதனை வெற்றி பெற்றது. 4 ஆயிரம் கி.மீ. தொலைவுக்கு சென்று உரிய இலக்கை தாக்கியது.

அக்னி வரிசை ஏவுகணைகள்

இந்தியா அக்னி வரிசை ஏவுகணைகளை உருவாக்கி சோதித்து வருகிறது. ஏற்கனவே அக்னி-1, அக்னி-2, அக்னி-3, அக்னி-4 ஏவுகணைகளை இந்தியா தயாரித்து வெற்றிகரமாக சோதித்து பார்த்து உள்ளது. இதில் அக்னி-1 ஆயிரம் கி.மீ., அக்னி-2 இரண்டாயிரம் கி.மீ., அக்னி-3 மூவாயிரம் கி.மீ, அக்னி-4 நான்காயிரம் கி.மீ. தொலைவுக்கு சென்று எதிரியின் இலக்கை தாக்கும் ஆற்றல் வாய்ந்ததாகும்.

ஒரு டன் எடையுடைய அணு குண்டுகளை 4 ஆயிரம் கி.மீ. தொலைவுக்கு (கண்டம் விட்டு கண்டம்) சுமந்துசென்று தாக்கும் ஆற்றல் வாய்ந்த அக்னி-4 ஏவுகணை சோதனை ஏற்கனவே கடந்த ஆண்டு நவம்பர் 15-ந் தேதி ஒடிசாவில் பாலசூர் கடற்கரையில் வெற்றிகரமாக நடந்தது.

மீண்டும் சோதனை

இந்த நிலையில் அதிநவீன அக்னி-4 ஏவுகணையை ராணுவ ஆராய்ச்சி அபிவிருத்தி அமைப்பு (டி.ஆர்.டி.ஓ.) மறுபடியும் சோதித்துப்பார்க்க விரும்பியது. இந்த ஏவுகணை எடை குறைவானது. அதிகளவு நம்பகத்தன்மை அளிக்கத்தக்க விதத்தில் அதிநவீன சாதனங்கள் பொருத்தப்பட்டதாகும்.

குறிப்பாக எதிரியின் இலக்கை மிக துல்லியமாக சென்று தாக்குகிற வகையில் ரிங் லேசர் கைரோஸ், மைக்ரோ நேவிகேஷன் சிஸ்டம் ஆகிய சாதனங்கள் அக்னி-4-ல் பொருத்தப்பட்டுள்ளது.

வெற்றி

அக்னி-4 ஏவுகணை சோதனை நேற்று காலை 11.45 மணிக்கு ஒடிசா மாநிலத்தில் பாலசூரிலிருந்து 100 கி.மீ. தொலைவில் உள்ள வீலர் தீவில் நடந்தது. ஏவுதளம் 4-ல் இருந்து, மொபைல் லாஞ்சரில் இருந்து, அக்னி-4 விண்ணுக்கு செலுத்தப்பட்டது. இதை ராணுவ ஆராய்ச்சி அபிவிருத்தி அமைப்பின் தலைவர் விஜய் குமார் சரஸ்வத், அக்னி திட்ட இயக்குனர் அவினாஷ் சந்தர் கண்காணித்தனர். ஏவுதல் பணியை அக்னி-4 திட்ட இயக்குனர் டெஸ்சி தாமஸ் வழிநடத்தினார்.

உரிய இலக்கின் அருகில் இரண்டு போர்க்கப்பல்கள் நிறுத்தி வைக்கப்பட்டு, ஏவுகணை உரிய இலக்கை தாக்குகிறதா என்பது கண்காணிக்கப்பட்டது. அக்னி-4 ஏவுகணை நிச்சயிக்கப்பட்ட இலக்கை வெற்றிகரமாக தாக்கியது. 20 நிமிடங்களில் அக்னி-4 ஏவுகணை உரிய இலக்கை தாக்கி விட்டதாக ராணுவ ஆராய்ச்சி அபிவிருத்தி அமைப்பு கூறியது. இதன் வெற்றிக்கு உழைத்த விஞ்ஞானிகளுக்கு ராணுவ மந்திரி ஏ.கே.அந்தோணி பாராட்டு தெரிவித்துள்ளார்.

தினதந்தி

பாகிஸ்தான் ஒரு ஏவுகணையைச் சோதித்தால் அடுத்த நாள் இந்தியர்களை மகிழ்விக்க இந்தியா இதுபோன்று ஒரு ஏவுகணை சோதனை வெற்றி என்று செய்தி வெளியிடுவதை வழக்கமாக வைத்துள்ளது.

இலக்கை தாக்குவது இருக்கட்டும் இந்த
இலங்கையின் அட்டூழியத்தை எப்ப தாக்க போறீங்க?

சீனக்காரன் பாகிஸ்தான், நேபாளம், பங்களாதேஷ் , பர்மா, மலேசியா போன்ற நாடுகளில் திறமாக காலூன்றி விட்டு இப்போது இலங்கையையும் தனது கைக்குள் கொண்டுவந்து விட்டான். மாலத்தீவும் அவனிடம் போய்விடும் போல் உள்ளது. நம்மாள் இன்னும் அக்னி சோதனை ஓட்டம் செய்கிறானாம். ஒருநாள் ஒட்டுமொத்தமாக எல்லா திசைகளில் இருந்தும் அவன் நம்மை உதைக்கப் போகிறான். அது வெகு தொலைவில் இல்லை என்பதே உண்மை.