கூடங்குளம் அணுமின் நிலையத்தில் விபத்து ஏற்பட்டால் ரஷியாவையும் குற்றவாளியாக சேர்க்க வேண்டும்

கூடங்குளம் அணுமின் நிலையத்தில் விபத்து ஏற்பட்டால், ரஷியாவையும் குற்றவாளியாக சேர்த்து, இழப்பீடு வழங்க உத்தரவிட வேண்டும்'' என்று சுப்ரீம் கோர்ட்டில் பொது நல வழக்கு தொடரப்பட்டு உள்ளது.

சுப்ரீம் கோர்ட்டில் வழக்கு

கூடங்குளம் அணுமின் நிலையத்தில் எரிபொருள் நிரப்ப எதிர்ப்பு தெரிவித்து, அணுமின் நிலைய எதிர்ப்பாளர்கள் கடும் போராட்டம் நடத்தி வருகிறார்கள்.

அந்த அணுமின் நிலையத்தில் பாதுகாப்பு ஏற்பாடுகள் சரியாக உள்ளனவா? என்பதை உறுதி செய்ய வேண்டும் என்று ஏற்கனவே சுப்ரீம் கோர்ட்டில் வழக்கு தொடரப்பட்டு உள்ளது.

இந்த நிலையில், நேற்று புதிதாக 2 பொது நல வழக்குகள் தாக்கல் செய்யப்பட்டன. `பொது நல வழக்கு மையம்' என்ற தன்னார்வ அமைப்பும், `பூவுலகின் நண்பர்கள்' என்ற அமைப்பு சார்பாக பிரபல வக்கீல் பிரசாந்த் பூஷணும் இந்த வழக்குகளை தாக்கல் செய்து உள்ளனர். அவற்றில் கூறப்பட்டு இருப்பதாவது:-

ரஷியாவுக்கு விலக்கு

கூடங்குளம் அணுமின் நிலையம் ரஷியா நாட்டின் உதவியுடன் அமைக்கப்பட்டு உள்ளது. இந்த அணுமின் நிலையத்தில் ஏதாவது விபத்து ஏற்பட்டால், மத்திய அரசு இழப்பீடு வழங்க வேண்டும். அணு உலையை நிறுவிய நாடான ரஷியா எந்த இழப்பீடும் தரவேண்டியது இல்லை, விபத்துக்கு பொறுப்பு ஏற்க வேண்டியது இல்லை என்று ஒப்பந்தம் போடப்பட்டு உள்ளது.

ரஷியாவுக்கு மத்திய அரசு அளித்துள்ள இந்த உறுதி மொழி (ஒப்பந்தம்), `அணுமின் நிலையங்களில் விபத்து ஏற்பட்டால் அணு எரிபொருள் சப்ளை செய்யும் நாடும், அணு உலையை நிறுவும் நாடும் இழப்பீடு வழங்க வேண்டும்' என்ற `2010-ம் ஆண்டின் அணு இழப்பீடு சட்ட'த்துக்கு எதிரானது ஆகும்.

ஒப்பந்தங்களை தாக்கல் செய்ய உத்தரவிட வேண்டும்

இந்த ஒப்பந்தம், உறுதி மொழி அபாயகரமான விளைவுகளை உள்ளடக்கி உள்ளது. இந்த ஒப்பந்தம் சட்டத்துக்கு புறம்பானது. ஆகவே, கூடங்குளம் அணுமின் நிலையம் தொடர்பாக ரஷியாவுடன் மத்திய அரசு செய்து கொண்டுள்ள அனைத்து ஒப்பந்தங்களையும் தாக்கல் செய்யும்படியும், கூடங்குளம் அணுமின் நிலையத்தில் ஏதாவது விபத்து ஏற்பட்டால், ரஷியாவையும் குற்றவாளியாக சேர்த்து, உரிய இழப்பீடு அளிக்க உத்தரவிடும்படியும் கேட்டுக் கொள்கிறோம்.

இவ்வாறு அந்த வழக்குகளில் தெரிவிக்கப்பட்டு உள்ளது.

வியாழக்கிழமை விசாரணை

கூடங்குளம் அணுமின் நிலையத்தில் செய்யப்பட்டுள்ள பாதுகாப்பு ஏற்பாடுகள் தொடர்பாக தொடரப்பட்டு உள்ள வழக்கு வியாழக்கிழமை (20-ந் தேதி) விசாரணைக்கு வருகிறது. அன்றைக்கே இந்த வழக்குகளும் விசாரணைக்கு எடுத்துக் கொள்ளப்படும் என்று தெரிகிறது.

தினத்தந்தி

இது மிகவும் முக்கியமான வழக்கு.... முதலில் ரஸ்யா ஒப்பந்தப்படி கோர்பச்சேவ் பொறுப்பேர்பதாக குறிப்பிட்டிருந்தார். பிறகு எல்ஸ்டின் தேவகவுடா மீண்டும் ஒப்பந்தத்தை புதுப்பிக்கும்போது இது காற்றில் பறக்கவிடப்பட்டது.

ஆனால் ரஷ்யா இதற்குப் பொறுப்பேற்காது என்பதை தெளிவாகக் குறிப்பிட்டுள்ளது!

விபத்து நடந்த பிறகு பொறுப்பு ஏற்றா என்ன ஏற்காட்டி என்ன .... ஐயோ ஐயோ

வேணுமின்னா ஒண்ணு பண்ணலாம் தமிழ்நாட்டில் இருந்து (குறிப்பா கூடங்குளத்தை சுற்றியுள்ள பகுதி மக்களில்) வீட்டுக்கு ஒருவரை வெளிமாநிலத்திலோ அல்லது வெளிநாட்டிலோ அரசு செலவில் தங்கவைக்கலாம். அப்பதானே விபத்து நடந்தா கொடுக்குற இழப்பீடை வாங்க ஆள் இருப்பார்கள்.