இந்திய எல்லையில் தீவிரவாதிகள் அமைத்த 80 சுரங்கப்பாதை: பாதுகாப்பு படையினர் கண்டுபிடித்தனர்

இந்திய எல்லையில் காஷ்மீர் பகுதியில் தீவிரவாதிகள் 80 சுரங்க பாதைகள் அமைத்து பயன்படுத்தி வந்தது கண்டுபிடிக்கப்பட்டுள்ளது. எல்லைக்கு அப்பால் இருந்து காஷ்மீருக்குள் தீவிரவாதிகள் நுழைந்து தாக்குதல்கள் நடத்துவதை தடுக்க பல்வேறு தடுப்பு நடவடிக்கைகள் மேற்கொள்ளப்பட்டு வருகின்றன.

எல்லையில் ராணுவம், துணை ராணுவம், எல்லைப் பாதுகாப்பு படை, மத்திய ரிசர்வ் போலீஸ் படையை சேர்ந்த வீரர்கள் 24 மணி நேரமும் ரோந்து மற்றும் கண்காணிப்பு பணியில் ஈடுபட்டு வருகின்றனர். அப்படி இருந்தும், ஏதாவது ஒரு வழியில் தீவிரவாதிகள் காஷ்மீருக்குள் நுழைந்து அங்குள்ள தீவிரவாதிகளுடன் சேர்ந்து நாசவேலையில் ஈடுபடுகின்றனர்.

எல்லைக்கு அப்பால் இருந்து தீவிரவாதிகள் காஷ்மீருக்குள் எப்படி நுழைகிறார்கள்? என்று எல்லையில் ஆய்வு நடத்தியபோது, பாகிஸ்தான் ஆக்கிரமிப்பு காஷ்மீரில் இருந்து சுரங்கப் பாதை அமைக்கப்பட்டு இருப்பதை பாதுகாப்பு படையினர் கண்டுபிடித்தனர்.

அந்த சுரங்கம் 400 மீட்டர் நீளம் கொண்டதாகவும், 25 மீட்டர் ஆழத்திலும் அமைக்கப்பட்டு இருந்தது. நவீன தொழில்நுட்பத்தை பயன்படுத்தி தீவிரவாதிகள் இந்த சுரங்கத்தை தோண்டி உள்ளனர். இதையடுத்து, பாகிஸ்தானை எல்லையாக கொண்ட காஷ்மீர் பகுதி முழுவதும் பாதுகாப்பு படையினர் ஆய்வு மேற்கொண்டனர். நிலவியல் ஆய்வாளர்கள் உதவியுடன் இந்த ஆய்வு மேற்கொள்ளப்பட்டது. இதில் காஷ்மீர் எல்லை முழுவதும் 80 இடங்களில் சுரங்கங்கள் ஏற்படுத்தப்பட்டு, அதன் வழியாக தீவிரவாதிகள் காஷ்மீருக்குள் வந்து சென்றது கண்டுபிடிக்கப்பட்டது.

இவை தவிர, குகை வழிப்பாதைகளும் அமைத்து தீவிரவாதிகள் பயன்படுத்தி வந்துள்ளனர். இதேபோல், குஜராத் மற்றும் ராஜஸ்தான் மாநில ஊடுருவதற்கும் சுரங்கம் அமைக்க தீவிரவாதிகள் முயன்றுள்ளனர். மணற்பாங்கான பகுதியாக இருந்ததால், சுரங்கவழி ஏற்படுத்தும் தீவிரவாதிகளின் முதல்கட்ட முயற்சி தோல்வி அடைந்திருக்கிறது.

இந்த சுரங்கபாதை மற்றும் குகை வழிபாதை வழியாக தீவிரவாதிகள் காஷ்மீர் வழியாக ஊடுருவி, உள்நாட்டு தீவிரவாத அமைப்புகளுடன் இணைந்து நாட்டின் பல்வேறு பகுதிகளில் மற்றும் முக்கிய நிலைகள் மீது திடீர் தாக்குதல் நடத்த திட்டமிட்டு இருந்ததும் கண்டறியப்பட்டுள்ளது.

இதையடுத்து எல்லையில் பாதுகாப்பு அதிகரிக்கப்பட்டு இருக்கிறது. தீவிரவாதிகள் அமைத்த சுரங்க வழிகள் மற்றும் குகை வழிப்பாதைகள் குறித்து நிலவியல் ஆய்வு துறை அறிக்கை தயாரித்து வருகிறது. இந்த அறிக்கை எல்லை பாதுகாப்பு படையிடம் விரைவில் தாக்கல் செய்யப்படும் என்று கூறப்படுகிறது.

இதற்கிடையே, இந்தியாவுடன் எல்லையை கொண்டுள்ள சீனாவும், எல்லை முழுவதும் ராணுவ நிலைகளை அமைத்து, ராணுவ வீரர்களை குவித்து வருகிறது. இந்தியாவும் முன்னெச்சரிக்கை நடவடிக்கையில் இறங்கியுள்ளது. வடக்கு மற்றும் வடகிழக்கு எல்லைப் பகுதிகளில் பீரங்கிகளையும், குண்டு வீச்சு விமானங்களையும் அதிகளவில் நிறுத்தி வைக்க ராணுவம் திட்டமிட்டுள்ளது.

மாலைமலர்

சீனா பெரிய யுத்தத்திற்கு தயாராக இருக்கிறது என்று நினைக்கிறேன்.

அசுரன் wrote:சீனா பெரிய யுத்தத்திற்கு தயாராக இருக்கிறது என்று நினைக்கிறேன்.

அப்படியாவது பிளவுபட்டிருக்கும் இந்தியா ஒன்றுபடட்டும்!