மூச்சிரைப்பை ஆரம்பத்தில் குணப்படுத்திவிட்டால் ஆஸ்துமா வராமல் தடுக்கலாம்

சாதாரண மூச்சிரைப்பை ஆரம்பத்திலேயே கண்டறிந்து குணப்படுத்திவிட்டால், ஆஸ்துமா வராமல் தடுக்கலாம் என்று சென்னையில் நடந்த சர்வதேச கருத்தரங்கில் டாக்டர் எஸ்.கே.ராஜன் கூறினார்.

சர்வதேச கருத்தரங்கம்

காமன்வெல்த் பவுண்டேஷன், காமன்வெல்த் தலைமைச் செயலகம் சார்பில் சர்வதேச மருத்துவ கருத்தரங்கம் சென்னையில் நேற்று நடந்தது. இதில், டாக்டர் எம்.ஜி.ஆர். மருத்துவ பல்கலைக்கழக கவுரவ பேராசிரியர் டாக்டர் எஸ்.கே.ராஜன் கலந்துகொண்டு ``மூச்சிரைப்பு நோய்களும், அவற்றுக்கான சிகிச்சை முறைகளும்'' என்ற தலைப்பில் பேசினார். அப்போது அவர் கூறியதாவது:-

மூச்சிரைப்பு சம்பந்தப்பட்ட நோய்கள் வராமல் தடுக்க முடியும். நோய்கள் வந்தாலும் அவற்றை குணப்படுத்த முடியும். ஆஸ்துமாவுக்கு புகைப்பிடிக்கும் பழக்கம்தான் முக்கிய காரணம் என்றுதான் மேற்கத்திய நாடுகளில் ஆய்வுகள் கூறுகின்றன. அமெரிக்காவில் ஆஸ்துமாவால் அதிகம் பேர் உயிரிழக்கிறார்கள்.

புகைப்பிடித்தல்

வாழ்க்கை முறை மாற்றம், மூச்சுப்பயிற்சி, புகைப்பிடிக்கும் பழக்கத்தை விட்டுவிடுவது போன்றவற்றால் ஆஸ்துமா வராமல் தடுக்கலாம். ஆஸ்துமாவுக்கு புகைப்பிடிக்கும் பழக்கமும், ஒவ்வாமையும்தான் முக்கிய காரணம். அசுத்தமான காற்றும், ஒவ்வாமை ஏற்படுத்தக்கூடிய பொருளும் மூக்கின் வழியாக உள்ளே நுழைந்து, நுரையீரலின் உட்புறச்சுவர்களை சேதப்படுத்துகின்றன. இதனால், அதிகளவு சளி உண்டாகி, கிருமிகளால் பாதிக்கப்பட்ட உட்சுவர்கள் புண்ணாகி, வீக்கத்தை உண்டாக்குகின்றன.

அப்போது, நுரையீரலின் சுருங்கி விரியும் தன்மை பாதிப்புக்கு உள்ளாகிறது. இதன் காரணமாக, வெளியே உள்ள சுத்தமான காற்று உள்ளே செல்ல முடியாமலும், உள்ளே உள்ள அசுத்தமான காற்று வெளியே செல்ல முடியாமலும் சிரமமான சூழ்நிலை ஏற்படுகிறது.

நோயாளிகள் படும்பாடு

இதனால், முதிர்நிலை ஆஸ்துமா நோயாளிகளால் 10 அடி தூரம்கூட நடக்க முடியாத நிலை உண்டாகும். ஏன் அவர்களால் தங்கள் சட்டையைக்கூட போட முடியாது. பட்டனை மாட்ட இயலாது. வேட்டியைக்கூட கட்ட முடியாது. அனைத்துக்கும் மற்றவர்களின் உதவியையே நாடுவார்கள். இரவில் அவர்களால் படுத்து தூங்க முடியாது. எனவே, மேஜையில் தலையை வைத்துக்கொண்டு பரிதாபமாக தூங்குவார்கள். இவ்வாறு வாழ்க்கை தன்மை பாதிக்கக்கூடிய பரிதாப நிலைக்கு ஆளாகிறார்கள்.

ஒருசில ஆஸ்துமா நோயாளிகள், `நான் எந்த மருந்தும் சாப்பிட மாட்டேன், கடவுள் என்னை காத்துக்கொள்வார்' என்று மிகவும் பிடிவாதமாக இருப்பார்கள். மருந்து கொடுத்தால் சாப்பிடாமல் அதை தலையணைக்குள் மறைத்துவைத்து விடுவார்கள். ``எனக்கு ஆங்கில மருந்து சரிப்பட்டுவராது, நான் வேறு வைத்தியம் பார்த்துக்கொள்கிறேன்'' என்று நினைப்பார்கள். மருந்து கொடுத்தால் அது தனக்கு விஷமாகிவிடும் என்றுகூட கருதுவார்கள். கடைசியில் மிகவும் ஆபத்தான ஆஸ்துமா உண்டாகி உயிர்காக்க முடியாத நிலைக்கு ஆளாகிவிடுவார்கள்.

ஆஸ்துமா வராமல் தடுக்கலாம்

சாதாரண மூச்சிரைப்பு, மூக்குச்சளி, இருமல், மார்பு சளி ஆகியவற்றுக்கு சரியான முறையில் சிகிச்சை பார்க்கவில்லை என்றால் அது நாளடைவில் முதிர்நிலை ஆஸ்துமாவாக மாறி குணப்படுத்த முடியாத நிலைக்கு உருவெடுத்து விடும். எனவே, இதுகுறித்து மக்களுக்கு விழிப்புணர்வு அவசியம்.

பொதுவாக மழைக்காலங்களில், குளிர்காலங்களில் ஆஸ்துமா நோயாளிகளுக்கு அதிக தும்மல், அதிக சளி வரும். வைரஸ் மற்றும் பாக்டீரியா கிருமிகளால் பாதிப்பு உண்டாகும். மூச்சிரைப்பு, மூக்கடைப்பு, நுரையீரல் செயல்படும் தன்மை பாதிக்கப்படும். மூச்சிரைப்பை ஆரம்ப நிலையிலேயே கண்டறிந்து சிகிச்சை அளித்துவிட்டால் பின்னாளில் அது முதிர்நிலை ஆஸ்துமாவாக மாறுவதை தடுக்கலாம்.

இவ்வாறு டாக்டர் ராஜன் கூறினார்.

விருது

மாநாட்டில், டாக்டர் எஸ்.கே.ராஜனின் மருத்துவ சேவையைப் பாராட்டி காமன்வெல்த் நாடுகளின் மருத்துவ தலைமைச் செயலக பொதுச் செயலாளர் முபாரக் நைஜீரியா விருது வழங்கினார்.

அழகான பொண்ணுங்க பாத்தா என்ன மாதிர உள்ள சிருசுகளுக்கு மூச்சிரைப்பு வருதே அது ஏன்?