தலீபான்கள் நடத்திய தாக்குதலில் அமெரிக்காவுக்கு ரூ.1,100 கோடி இழப்பு

ஆப்கானிஸ்தானில் இங்கிலாந்து இளவரசர் ஹாரி தங்கியிருந்த முகாம் மீது தலீபான்கள் நடத்திய தாக்குதலில் அமெரிக்காவுக்கு ரூ.1,100 கோடி இழப்பு ஏற்பட்டது. இதனால் அமெரிக்க ராணுவ தலைமையகமான பென்டகன் அதிர்ச்சி அடைந்துள்ளது.

தலீபான்கள் தாக்குதல்

அமெரிக்கா தலைமையிலான நேட்டோ படை ஆப்கானிஸ்தானில் முகாமிட்டு தலீபான்களை ஒடுக்கும் நடவடிக்கையை எடுத்து வருகிறது. அதில் ஹெல்மாண்ட் மாகாணத்தில் பாஸ்டன் என்ற இடத்திலுள்ள ராணுவ முகாம் முக்கியமானதாகும்.

இந்த முகாமில் இங்கிலாந்து இளவரசர் ஹாரி தங்கி பயிற்சி எடுத்து வருகிறார். இவருக்கு தலீபான் தீவிரவாத அமைப்பு கொலை மிரட்டல் விடுத்தது. சில நாட்களுக்கு முன்பு நள்ளிரவு நேரத்தில் இந்த முகாம் மீது தலீபான்கள் அதிரடி தாக்குதல் நடத்தினார்கள்.

8 விமானங்கள் சேதம்

இந்த தாக்குதலில் ஈடுபட்ட 15 தலீபான் தீவிரவாதிகள் 3 குழுவாக பிரிந்து ராக்கெட் குண்டுகளையும், கையெறி குண்டுகளையும் வீசினர். அத்துடன் துப்பாக்கியாலும் சுட்டனர். இதில் 2 அமெரிக்க வீரர்கள் பலியானார்கள். பலர் காயம் அடைந்தனர். இளவரசர் ஹாரி காயமின்றி தப்பினார்.

ஆனாலும் இந்த தாக்குதலில் முகாமிற்கு பெரும் சேதம் ஏற்பட்டதை அமெரிக்க ராணுவம் ஒப்புக் கொண்டுள்ளது. இவர்கள் வெளியிட்ட அறிக்கையில், கடற்படையை சேர்ந்த ஏ.வி.-8பி ரகத்தை சேர்ந்த 6 ஜெட் போர் விமானங்கள் முழுமையாக சேதம் அடைந்தன. மேலும் 2 விமானங்களின் ஒரு பகுதி சேதம் ஏற்பட்டது. 3 எரிபொருள் நிரப்பும் நிலையம் அழிந்தது. விமானங்களை நிறுத்தி வைக்கும் 6 கூடாரங்களும் நொறுங்கின' என்று தெரிவித்துள்ளது.

ரூ.1,100 கோடிக்கு இழப்பு

இதன் சேத மதிப்பை தற்போது கணித்து இருக்கிறார்கள். இதன்படி சேதத்துக்குள்ளான ஒவ்வொரு போர் விமானமும் ரூ.125 கோடி முதல் ரூ.165 கோடி மதிப்புள்ளவை.

எனவே தலீபான்களின் தாக்குதல் மூலம் மொத்தம் ரூ.1,100 கோடிக்கு சேதம் ஏற்பட்டதாக கணக்கிடப்பட்டுள்ளது.

பென்டகன் அதிர்ச்சி

ஆப்கானிஸ்தானில் கடந்த 11 ஆண்டுகளாக முகாமிட்டுள்ள அமெரிக்க படைக்கு இவ்வளவு பெரிய இழப்பு இதுவரை ஏற்பட்டதில்லை. இதனால் அமெரிக்க ராணுவ தலைமையகமான பென்டகனுக்கு இது பெரும் அதிர்ச்சியை கொடுத்துள்ளது.

தினத்தந்தி