மவுனம் கலைத்தார் மன்மோகன்: எதிர்க்கட்சிகள் மீது பாய்ச்சல்

புதுடில்லி: ""நிலக்கரி சுரங்க விவகாரம் தொடர்பாக, விவாதத்துக்கு முன் வராமல், பார்லிமென்டை முடக்கியது, சரியான செயல் அல்ல. ஜனநாயகத்தை கேலிக் கூத்தாக்கும் செயல். எதிர்க்கட்சிகளின் இந்தப் போக்கிற்கு எதிராக, மக்கள், குரல் எழுப்ப வேண்டும்,'' என, பிரதமர் மன்மோகன் சிங் கூறினார். இந்த விவகாரத்தில், முதல் முறையாக, தன் நீண்ட நாள் மவுனத்தை கலைத்து, வாய் திறந்துள்ளார்.

பெரும் எதிர்பார்ப்புகளுக்கு இடையே, பார்லிமென்டின் மழைக்கால கூட்டத் தொடர், ஆகஸ்ட் 8ல் துவங்கியது. பல முக்கியமான மசோதாக்கள், இதில் நிறைவேற்றப்படும் என்றும், அனல் பறக்கும் விவாதங்கள் நடக்கும் என்றும் எதிர்பார்க்கப்பட்டது. ஆனால், நிலக்கரி சுரங்க ஒதுக்கீடு செய்ததில், அரசுக்கு, 1.86 லட்சம் கோடி ரூபாய் இழப்பு ஏற்பட்டுள்ளதாக, மத்திய கணக்கு தணிக்கை அலுவலகம், தாக்கல் செய்த அறிக்கையால், அனைத்து எதிர்பார்ப்புகளும், தவிடு பொடியாகி விட்டன. எதிர்க்கட்சிகள், பார்லிமென்டை முடக்கியதால், இந்த கூட்டத் தொடரில் நிறைவேற்றப்படவிருந்த, 31 மசோதாக்களில், ஆறு மசோதாக்கள் மட்டுமே, நிறைவேற்றப்பட்டன. இந்நிலையில், நேற்றுடன், காலவரையின்றி, பார்லிமென்டின் இரு சபைகளும் ஒத்தி வைக்கப்பட்டன.

இந்நிலையில், இந்த விஷயத்தில், இதுவரை மவுனம் காத்து வந்த, பிரதமர் மன்மோகன் சிங் கூறியதாவது: நிலக்கரி சுரங்க ஒதுக்கீடு விஷயம் குறித்து, மத்திய கணக்கு தணிக்கை அலுவலகம் அறிக்கை தாக்கல் செய்துள்ளது. தணிக்கை அலுவலகத்தின் மீது, மிகுந்த நம்பிக்கை வைத்துள்ளோம். அறிக்கையில் குறிப்பிட்டுள்ள விஷயம் குறித்து, பார்லிமென்டிலும், பார்லிமென்ட் பொதுக் கணக்கு குழுவிலும், விவாதிக்கப்பட வேண்டும். இதற்கு, அரசு தயாராக உள்ளது. ஆனால், விவாதம் நடக்க விடாமல், எதிர்க்கட்சிகள், பார்லிமென்டை முடக்கி விட்டன. இது, சரியான செயல் அல்ல. பார்லிமென்ட் விதிமுறைகளை, அப்பட்டமாக மீறும் செயல்; ஜனநாயகத்தை கேலிக் கூத்தாக்கும் செயல் இது. எதிர்க்கட்சிகளின் இந்தப் போக்கிற்கு எதிராக, மக்கள் குரல் எழுப்ப வேண்டும். பார்லிமென்டை முடக்குவதன் மூலம், ஜனநாயக நடவடிக்கைகளின் செயல்பாட்டை, எதிர்க்கட்சிகள் தடுக்கின்றன. பார்லிமென்ட் நடவடிக்கைகளுக்கு, எந்த இடையூறும் ஏற்படுத்தக் கூடாது என்பதை, நாடு சுதந்திரம் அடைந்ததில் இருந்தே, அறிந்து வைத்துள்ளோம். அதற்கு, தற்போது குந்தகம் விளைவிப்பது சரியல்ல. வகுப்புக் கலவரம், நக்சலைட் வன்முறை மற்றும் பொருளாதார பிரச்னை போன்ற, சவாலான விவகாரங்களை, நாடு எதிர்கொண்டுள்ள சூழ்நிலையில், பார்லிமென்டை முடக்குவது, எந்த வகையிலும் நியாயமில்லை. முக்கியமான பிரச்னைகளை, பார்லிமென்டில் விவாதிக்க முடியாத நிலையும் ஏற்பட்டுள்ளது. இவ்வாறு, பிரதமர் மன்மோகன் சிங் கூறினார்.

ஏமாற்றம் அளிக்கிறது: மீரா குமார் உருக்கம்:

லோக்சபா சபாநாயகர் மீரா குமார் கூறியதாவது: பார்லிமென்ட் கூட்டத் தொடர் முடக்கப்பட்டது, மிகவும் வருத்தமான விஷயம். எதிர்ப்புகளை தெரிவிப்பதற்கு, ஜனநாயகத்தில், சில வழிமுறைகள் உள்ளன. இதை காரணமாக வைத்து, பார்லிமென்ட் முடக்கப்படுவது, எனக்கு பெரும் ஏமாற்றத்தை அளிக்கிறது. ஆனால், ஐ.மு., கூட்டணிக்கும், தே.ஜ., கூட்டணிக்கும் இடையே ஏற்பட்டுள்ள பிரச்னைக்கு, விரைவில் சுமுக தீர்வு ஏற்பட்டு, அடுத்த கூட்டத் தொடர், சுமுகமாக நடக்கும் என்ற, நம்பிக்கை உள்ளது. இவ்வாறு மீரா குமார் கூறினார்.


"தெருவில் இறங்கி போராடுவோம்':

பா.ஜ., மூத்த தலைவர்கள் சுஷ்மா சுவராஜ், அருண்ஜெட்லி ஆகியோர் கூறியதாவது: நிலக்கரி சுரங்க ஊழலால், அரசுக்கு, 1.86 லட்சம் கோடி ரூபாய் இழப்பு ஏற்பட்டுள்ளதாக, தணிக்கை அலுவலகம் கூறியுள்ளது. இதற்கு காரணமானவர்கள், பதவி விலகக் கோரி, பார்லிமென்டில் போராட்டம் நடத்தினோம். இதில், எந்தத் தவறும் இல்லை. இயற்கை வளங்கள் ஒதுக்கீடு விஷயத்தில், வெளிப்படையான நடைமுறையை கொண்டு வரவேண்டும் என்பதே, எங்கள் நோக்கம். எங்கள் கோரிக்கை நிறைவேறா விட்டால், அடுத்த கட்டமாக, தெருவில் இறங்கி போராட்டம் நடத்துவோம். இவ்வாறு அவர்கள் கூறினர்.

தினமலர்

இந்தக் கோபத்தை இவரது ஆட்சியில் ஊழல் செய்தவர்கள் மீது காட்டியிருக்கலாம். பரதேசிகளும், வந்தேறுங்குடிகளும் ஆட்சி செய்யும் நாடாக இந்தியா மாறிவிட்டது! மீண்டும் ஒரு அந்நிய நாட்டிற்கு அடிமையானால் தான் மக்கள் திருந்துவார்கள்.