மயங்கொலிச் சொற்கள்! - தொடர் பதிவு - Page 2

First topic message reminder :

(ண, ன பொருள் வேறுபாடு)
அணல் - தாடி, கழுத்து, அனல் - நெருப்பு
அணி – அழகு, அனி - நெற்பொறி

அணு – நுண்மை, அனு - தாடை, அற்பம்
அணுக்கம் - அண்டை, அண்மை. அனுக்கம் - வருத்தம், அச்சம்

அணை - படுக்கை, அணைத்துக் கொள்ளுதல், அனை - அன்னை, மீன்
அணைய - சேர, அடைய, அனைய - அத்தகைய

அண்மை – அருகில், அன்மை - தீமை, அல்ல
அங்கண் – அவ்விடம், அங்கன் - மகன்

அண்ணம் – மேல்வாய், அன்னம் - சோறு, அன்னப்பறவை
அண்ணன் – தமையன், அன்னன் - அத்தகையவன்
அவண் – அவ்வாறு, அவன் - சேய்மைச் சுட்டு, ஆண்மகன்
.....................................................................................................................................................................
ஆணகம் – சுரை, ஆனகம் - துந்துபி
ஆணம் – பற்றுக்கோடு, ஆனம் - தெப்பம், கள்

ஆணி - எழுத்தாணி, இரும்பாணி, ஆனி - தமிழ் மாதங்களுள் ஒன்று
ஆணேறு –ஆண்மகன், ஆனேறு - காளை, எருது

ஆண் – ஆடவன், ஆன் - பசு
ஆணை - கட்டளை, ஆட்சி, ஆனை - யானை

(தொடரும் - நன்றி-தினமணி)

அருமை அருமை... மிகவும் பயனுள்ள பதிவு... இந்த காலத்துல தமிழையெல்லாம் யாரு கண்டுக்கறாங்க...

மயங்கொலிச் சொற்கள் (ல, ழ, ள பொருள் வேறுபாடு)

குலி - மனைவி
குழி - பள்ளம், பாத்தி, பன்னீரடிச் சதுரம், வயிறு
குளி -நீராடு

குலம் -ஜாதியின் உட்பிரிவு, இனம், குடி
குளம் -நீர்நிலை,கண்மாய், ஏரி

குலை - கொத்து, மனம் தடுமாறுதல்
குழை - குண்டலம், குழைந்துபோதல்

குலவி - மகிழ்ந்திருத்தல்
குழவி - குழந்தை, இளமை, யானைக் கன்று அம்மிக்கல்
குளவி - ஒரு வண்டு, காட்டுமல்லி

குலிகம் -சிவப்பு, இலுப்பை
குளிகம் -மருந்து,மாத்திரை

குவலை -துளசி, கஞ்சா
குவளை - குவளை மலர், சொம்பு,ஒரு பேரெண்

கூலம் - தானியம்,கடைத்தெரு
கூளம் - குப்பை

கூலி - ஊதியம்
கூளி(யார்) - பேய், காளை, வீரர், படைவீரர், வணங்கி நிற்பவர்,ஏவலாளர்

கொலு - அரசசபை, திருவோலக்கம்(தெய்வசபை), உல்லாசமாக வீற்றிருத்தல்
கொழு - மழு, கலப்பையில் மாட்டும் பெரிய இரும்பு, கொழு,கொழுத்து இருத்தல்
கொளு - புறப்பொருள் வெண்பாமாலைத் துறை, பொருந்துவாய்

கொலை - கொல்லுதல்
கொளை - கோட்பாடு, பயன், இசைப்பாட்டு, தாளம்

கொல்லாமை - கொலை செய்யாமை
கொள்ளாமை - ஏற்றுக்கொள்ளாமை, அடங்காமை

கொல்லி - உயிர்க்கொல்லி, ஒரு மலை
கொள்ளி - கொள்ளிக்கட்டை

கொல்லை - புழக்கடை, தரிசுநிலம்
கொள்ளை - திருடுதல், மிகுதி

கோலம் - அழகு, அலங்காரம்
கோளம் - உருண்டை, வட்டம்

கோலை - மிளகு
கோழை - வீரமற்றவன், கபம்
கோளை - குவளை, எலி

கோல் - மரக்கொம்பு,அம்பு, குதிரைச் சம்மட்டி, தண்டு, யாழ்நரம்பு
கோள் - கிரகம்

கோலி - இலந்தை, விளையாடும் குண்டு
கோழி - உறையூர், விட்டில், பறவை
கோளி - பூவாது காய்க்கும் மரம், ஆத்தி, ஆலம்

(ல, ழ, ள பொருள் வேறுபாடு)

சலம் - நீர், சிறுநீர், குளிர்
சளம் - பொய், துன்பம், வஞ்சனை

சாலை - பாடசாலை, பொது மண்டபம், அறக்கூடம்
சாளை - கடல்மீன்
சாழை - குடிசை, குச்சு

சுழித்தல் - சுழலுதல், நீர்ச்சுழல்
சுளித்தல் - முறித்தல், சினத்தல்

சூலை - வயிற்று நோய்
சூளை - செங்கல் சூளை

சூல் - கர்ப்பம்
சூழ் - சூழ்ந்துகொள், சுற்று
சூள் - சபதம்

சேல் - மீன்
சேள் - மேலிடம்

சோலி - ரவிக்கை, காரியம்
சோழி - பலகரை
சோளி - கூடைவகை

தவளை - ஓர் உயிரி
தவலை - பாத்திரம்

தலம் - இடம், பூமி
தழம் - தைலம்
தளம் - மேடை, மாடி வீட்டின் அடுக்கு

தழை - தாவர உறுப்பு
தலை - மண்டை
தளை - விலங்கு

தாலம் - உலகம், தேன்
தாளம் - இசைக்கருவி, ஜதி

தாலி - மங்கலநாண்
தாழி - கடல், குடம், பரணி பெரியபாண்டம்
தாளி - தாளித்தல், பனைதால் - நாக்கு, தாலாட்டு

தாழ் - தாழ்தல், குனிதல்
தாள் - முயற்சி, பாதம், ஆதி, படி, காகிதம்.

(ல, ழ, ள பொருள் வேறுபாடு)
துலக்கம் - ஒளி, தெளிவு
துளக்கம் - அசைவு, வருத்தம், கலக்கம், ஒளி

துலம் - கோரை, கனம்
துளம் - மாதுளை, மயிலிறகு

துலி - பெண் ஆமை
துழி - பள்ளம்
துளி - மழைத்துளி, திவலை, சிறிய அளவு

துலை - ஒப்பு, கனம்
துளை - துவாரம், வாயில்

தூலி - எழுதுகோல், எழுத்தாணி
தூளி - புழுதி, குதிரை

தெழித்தல் - கோபித்தல், முழங்குதல், அதட்டுதல், நீக்குதல், ஆரவாரித்தல்
தெளித்தல் - விதைத்தல், சபதம், கூறல், விதைத்தல்

தெல் - அஞ்சுதல்
தெள் - தெளிவான

தோலன் - அற்பன்
தோழன் - நண்பன்

தோலி - பிசின், ஒருவகை மீன்
தோழி - பாங்கி, நட்பால் நெருக்கமானவள்
தோளி - அவுரி (ஒருவகை குத்துச்செடி), அரக்கு

தோல் - சருமம், வனப்பு, விதையின் மேல்பகுதி
தோள் - புயம், வீரம்

நலன் - நலம், அழகு, புகழ், இன்பம், நன்மை, குணம்,
நளன் - தமயந்தியின் கணவன், ஓர் அரசன்

நலி - நோய்
நளி - குளிர்ச்சி, பெருமை

நலிதல் - நலிந்துபோதல், தோற்றல்
நளிதல் - செறிதல், பரத்தல், ஒத்தல்

நல் - நல்ல
நள் - இரவு, நடு, நள்ளிரவு

நாலம் - பூவின் காம்பு
நாழம் - இழிவுரை, வசவு
நாளம் - பூந்தண்டு, உட்துளை, ரத்தநாளம்

நாலி - முத்து, கந்தை ஆடை
நாழி - உள்தொளையுள்ள பொருள், ஒருபடி, ஏர், அம்பறாத்துணி, நாடா, பூரட்டாதி
நாளி - கல், நாய்

நாலிகை - மூங்கில், அடுப்புச்சந்து
நாழிகை - வட்டம், கடிகாரம்

நால் - நான்கு
நாழ் - குற்றம், செருக்கு
நாள் - காலம், திதி

நீலம் - ஒரு நிறம், கருங்குவளை, இருள்
நீளம் - நெடுமை (நீண்ட), தாமதம்

நீல் - நீலம், காற்று
நீள் - நீளம், ஒளி

(தொடரும்)

என்னை அறியாமலேயே பரீட்சைக்கு படிப்பது போல இதை படித்துகொண்டுள்ளேன். இவ்வளவு காலம் இது போன்ற ஆர்வம் இப்போது புதிதாக ஏற்பட்டுள்ளதை உணர்கிறேன். மிக்க நன்றி. தொடரட்டும் உங்கள் தமிழ்ச்சேவை அன்பரே.
(பின் குறிப்பு: ஈகரை தமிழ் அர்த்தம் வேண்டுகிறேன் அன்பரே சொல்வீர்களா )

அருமை அருமை அருமை. தொடரட்டும் உங்கள் திருப்பணி.மனமார்ந்த வாழ்த்துக்கள்.நன்றி

பலம் - கிழங்கு, வலி, நெற்றி, சக்தி, சேனை, வன்மை, உறுதி, எடை
பழம் - கனி, முதுமை

பல்லி - சிற்றூர், இடையர் ஊர், உழுகருவி, ஓர் உயிரி, வண்டியுறுப்பு
பள்ளி - இடைச்சேரி,புத்தர்கோயில், குறும்பன், மருதநிலத்தூர், படுக்கை, பள்ளிக்கூடம்

பலி - பலியிடுதல், பலியுயிர்
பழி - குற்றம்

பால் - திரவ உணவு, பகுப்பு, இயல்பு
பாழ் - வீண், வெறுமை

பீழை - துன்பம்
பீளை - கண் அழுக்கு

புலி - காட்டு விலங்கு
புளி - புளியமரம்,புளியங்காய்

புலை - புலால், ஊன், கீழ்மை
புழை - துளை, வாயில், நரகம்

புகல் - அடைக்கலம்
புகழ் - பெருமை

புல் - அற்பம், கலவி, புல்பூண்டு
புள் - பறவை

பூலம் - புற்கட்டு
பூளம் - பூவரசு

பூழை - துவாரம், கோபுரவாயில்
பூளை - பூளைச்செடி, இலவம் பஞ்சு

(ல, ழ, ள பொருள் வேறுபாடு)
பாலி - தானியக் குவியல், தூற்றாத தானியம்
பாழி - கொடுத்தல், ஈதல்
பாளி - வரப்பு, எல்லை

பொலிவு - அழகு, நிறைவு
பொழிவு - பொழிதல், மேன்மை

போலி - பொய், வஞ்சகம், ஒப்பு
போளி - இனிப்புப் பண்டம்

பொலிதல் - செழித்தல், மங்கலமாதல்
பொழிதல் - ஈதல், கொடுத்தல், சொரிதல்,பெய்தல், நிறைதல்

மலம் - அழுக்கு, பாவம்
மழம் - இளமை, குழந்தை

மலை - குன்று, பொருப்பு, வெற்பு
மழை - மழைநீர், குளிர்ச்சி, மேகம்

மலைத்தல் - வியத்தல், தடுமாறுதல்
மழைத்தல் - மழை பெய்திருத்தல், குளிர்ந்திருத்தல்

மாலிகை - மாலை, கழுத்தணி, வரிசை
மாளிகை - அரண்மனை, கோயில்

மாலை - அந்திப்பொழுது, பூமாலை
மாழை - மயக்கம், இளமை, அழகு
மாளை - புளியம்பட்டை

மால் - திருமால், மயக்கம், அருகன், இந்திரன், பெருமை, மேகம்
மாள் - இறத்தல், சாதல் (இற,சாவு)

முலை - உடலிலுள்ள ஓர் உறுப்பு
முழை - குகை
முளை - முளைத்தல், தறி, ஆப்பு, அங்குசம், இளமை, தண்டு, மூங்கில்

முழி - விழி (விழித்தல்)
முளி - மரக்கணு, விரல்முளி, வாட்டம்

மூலி - மூலிகை, மரம், வேருள்ளது
மூழி - அகப்பை, சோறு, நீர்நிலை, கோணம்

மூலை - இரு கோடுகள் சந்திக்கும் இடம்
மூளை - மண்டைக்குள் இருக்கும் ஓர் உறுப்பு(முதன்மைப் பகுதி)

மெல்ல - மென்று தின்பது
மெள்ள - மெதுவாக

மாலி - மொளலி கிரீடம்
மாழி - மேழி, கலப்பை
மாளி - துணிமூட்டை,

வலம் - சுற்றுதல், வலப்பக்கம், வெற்றி
வளம் - வளமை, அழகு

வலவன் - திருமால்
வளவன் - சோழன், வேளாளன்

வலன் - ஓர் அரசன், வெற்றி, வல்லவன்
வளன் - செழுமை, வளப்பன்

பயனுள்ள பதிவு..பகிர்விற்கு நன்றி..சேமித்துக்கொண்டேன்..

///வளன் - செழுமை, வளப்பன்///
வளன் என்பதை கிறித்தவர்கள் ஜோசப் என்று கூறுகின்றனரே...அதன் பொருளும் இதுதானா?...