சந்திரன் மீது இன்று `நாசா' ராக்கெட் மோதுகிறது

சந்திரன் மீது இன்று `நாசா' ராக்கெட் மோதுகிறது மறைந்திருக்கும் தண்ணீரை கண்டறிய அதிரடி ஆய்வு

சந்திரனில் மறைந்திருக்கும் தண்ணீரை கண்டறிவதற்காக, `நாசா' அனுப்பி வைத்த ராக்கெட் இன்று சந்திரன் மீது மோதுகிறது.

`நாசா' திட்டம்

சந்திரனில் தண்ணீர் இருப்பதற்கான ஆதாரங்களை கண்டுபிடித்து இருப்பதாக சில வாரங்களுக்கு முன்பு அமெரிக்க விண்வெளி ஆராய்ச்சி நிறுவனமான `நாசா'வும், இந்திய விண்வெளி ஆராய்ச்சி நிறுவனமான `இஸ்ரோ'வும் அறிவித்தன.

இந்நிலையில், சந்திரனின் ஒரு பகுதியில் கோடிக்கணக்கான டன் எடையுள்ள ஐஸ் கட்டி மறைந்து இருப்பதாக `நாசா' விஞ்ஞானிகள் கருதுகிறார்கள். எனவே, அந்த இடத்தை மோதி தகர்த்தால், தண்ணீர் இருப்பதை கண்டறியலாம் என்று அவர்கள் கருதுகிறார்கள்.

அதற்காக, 2.2 டன் எடையுள்ள காலி ராக்கெட்டை சந்திரனுக்கு அனுப்பி வைத்துள்ளனர். அதனுடன் கலர் கேமராக்கள் இணைந்த `எல்.சி.ஆர்.ஓ.எஸ்.எஸ்' என்ற செயற்கைக்கோளையும் அனுப்பி வைத்துள்ளனர். இந்த செயற்கைக்கோளுடன் இணைந்த ராக்கெட், சந்திரனின் மேற்பரப்பை சுற்றி வருகிறது.

ராக்கெட் மோதுகிறது

இந்நிலையில், `நாசா' விஞ்ஞானிகளின் திட்டப்படி, இன்று ராக்கெட்டும், செயற்கைக்கோளும் தனித்தனியாக பிரிகின்றன. இந்திய நேரப்படி, மாலை 5.01 மணிக்கு, சந்திரனின் தென்துருவத்தின் மீது ராக்கெட் பலமாக மோதுகிறது. அங்கு 10 கி.மீ. உயரத்துக்கு துகள்கள் குவிந்து கிடக்கின்றன. அந்த குவியல் மீது மணிக்கு 9 ஆயிரம் கி.மீ. வேகத்தில் ராக்கெட் மோதுகிறது. இது ஒலியின் வேகத்தைப் போல் 7 மடங்குக்கும் அதிகமாகும். இந்த மோதல், ஒன்றரை டன் டி.என்.டி. வெடிபொருள் அளவுக்கு சக்திவாய்ந்ததாக இருக்கும். 3 லட்சத்து 50 ஆயிரம் கிலோ எடையுள்ள துகள்களை வெளியே தள்ளிவிடும்.

இதனால் துகள்கள் தகர்ந்து, உள்ளே இருக்கும் ஐஸ் கட்டிகளில் இருந்து தண்ணீர் வெளியே வரும் என்று நம்பப்படுகிறது. தண்ணீர் இருக்கிறதா? இல்லையா? என்பதை, மோதல் நடந்த ஒரு மணி நேரத்துக்குள் தெரிந்து கொள்ள முடியும்.

இந்த மோதல் காட்சியை, `எல்.சி.ஆர்.ஓ.எஸ்.எஸ்' செயற்கைக்கோளில் உள்ள கலர் கேமராக்கள் படம் பிடித்து பூமிக்கு நேரடியாக ஒளிபரப்புகின்றன. இந்தக் காட்சியை `நாசா'வின் இணைய தளத்தில் நேரடியாக காணலாம்.

சர்ச்சை

இதற்கிடையே, இந்த மோதல் நடவடிக்கைக்கு எதிர்ப்பு எழுந்துள்ளது. இந்த சோதனை தேவைதானா? சந்திரனில் ஏற்படும் சேதாரத்துக்கு இந்த சோதனை உரிய பலனை அளிக்குமா? என்று கேள்விகள் எழுப்பப்படுகின்றன. சந்திரனில் மோதுவது, இயற்கையின் போக்கில் குறுக்கிடும் செயல் என்று கண்டனம் தெரிவிக்கப்படுகிறது.

ஆனால் இதுபற்றி `நாசா' கண்டுகொள்ளவில்லை. சந்திரனில் தண்ணீர் இருக்கிறதா என்ற ஆராய்ச்சியின் ஒரு பகுதிதான் இந்த நடவடிக்கை என்று `நாசா' கூறியுள்ளது.