ஹெலிகாப்டர், பீரங்கிகள் மூலம் தாக்குதல், சிரியா தலைநகர் டமாஸ்கசில் ராணுவம்-கிளர்ச்சியாளர்கள் கடும் சண்டை

சிரியா தலைநகர் டமாஸ்கசில் ராணுவம்-கிளர்ச்சியாளர்கள் இடையே கடும் சண்டை நடக்கிறது. ஹெலிகாப்டர், பீரங்கிகளை கொண்டு ராணுவம் குண்டு வீசுகிறது. இதனால் ஐ.நா. கண்காணிப்பு குழு நிபுணர்கள் அவசர, அவசரமாக சிரியாவை விட்டு வெளியேறினர்.

பீரங்கி குண்டு வீச்சு

சிரியா அதிபர் ஆசாத்தை பதவியை விட்டு துரத்த கிளர்ச்சி நடைபெற்று வருகிறது. இதை ஒடுக்க ராணுவம் கடும் தாக்குதல் நடத்துகிறது. இதில் 20 ஆயிரத்துக்கும் மேற்பட்டோர் பலியாகி விட்டனர். கடந்த பல வாரமாக அலிப்போ நகர் மற்றும் சுற்றுப்புற நகரங்களில் வேட்டை நடத்திய ராணுவம் நேற்று முன்தினம் தலைநகர் டமாஸ்கசில் மீண்டும் தீவிர தாக்குதலை தொடங்கியது. ஹெலிகாப்டர்கள் மற்றும் பீரங்கிகளை கொண்டு குண்டு வீசியது.

இதில் டமாஸ்கசில் 37 பேரும், கப்ரிசூசா என்ற இடத்தில் 24 பேரும் பலியானார்கள். அலிப்போ, டாரா, டைர் எஷ்ஷோர் ஆகிய நகரங்கள் மீதும் குண்டு வீச்சு நீடிக்கிறது என்று மனித உரிமை ஆர்வலர்கள் தெரிவித்தனர்.

தலைநகரில் கடும் சண்டை

இந்நிலையில் கிளர்ச்சியாளர்கள் தலைநகர் டமாஸ்கசை நோக்கி விரைந்தனர். இதனால் நேற்று காலை டமாஸ்கஸ் நகர் மற்றும் சுற்றுப்புற பகுதிகளில் ராணுவம்-கிளர்ச்சி படை இடையே கடும் சண்டை தொடங்கியது. அருகிலுள்ள மலைப்பகுதியில் இருந்து ராணுவம் பீராங்கியால் குண்டு மழை பொழிந்தது.

இதில் தலைநகரின் தென்மேற்கு நுழைவு வாயில் பகுதியான டாராயா என்ற இடத்தில் 15 பேர் உயிர் இழந்தனர். மேலும் 150-க்கும் மேற்பட்டோர் காயம் அடைந்தார்கள். அத்துடன் ராணுவத்தினர் வீடு, வீடாக தீவிர சோதனையும் நடத்துகிறார்கள்.

எனவே அங்கு இரு தரப்பினரும் உச்சகட்ட தாக்குதலில் இறங்கியிருப்பதாக பார்வையாளர்கள் கூறினர். இந்த மோதல் குறித்து டமாஸ்கசில் வசிக்கும் ஒருவர் கூறுகையில், `பல மணி நேரமாக குண்டு வெடிப்பு சத்தமும், துப்பாக்கி சூடு சத்தமுமாக இருக்கிறது. நாங்கள் எவ்வாறு உயிர் தப்ப போகிறோம் என்று தெரியவில்லை. மக்கள் பெரும் அச்சத்தில் இருக்கிறார்கள்' என்று தெரிவித்தார்.

ஐ.நா. நிபுணர்கள் வெளியேற்றம்

சிரியாவில் வன்முறை சம்பவங்களை கண்காணிக்க ஐ.நா.சபையின் மூலம் பாபாகார் காய் என்பவர் தலைமையில் நிபுணர்கள் குழுவினர் தங்கி இருந்தார்கள். தலைநகரில் தற்போது கடும் சண்டை நடப்பதால் இவர்கள் வெளியேறி வருகிறார்கள்.

இது பற்றி குழு தலைவர் பாபாகார் காய் கூறும்போது, `சில நிபுணர்கள் புதன்கிழமையே வெளியேறி விட்டார்கள். நானும் எஞ்சியவர்களும் வெளியேறி விடுவோம்' என்றார்.

அப்பாவி மக்கள் தவிப்பு

கடும் சண்டை தொடங்கியதால் நூற்றுக்கணக்கான அப்பாவி மக்கள் தங்களுடைய வீடுகளை விட்டு வெளியேறி மசூதிகள், பள்ளிக்கூடங்களில் தஞ்சம் அடைகிறார்கள். அகதிகள் முகாமை தேடி பலர் அலைகிறார்கள்.

இதற்கிடையில் பள்ளிக்கூடங்களில் தங்கி இருப்பவர்களுக்கு அதிபர் ஆசாத் அரசாங்கம் எச்சரிக்கை விடுத்துள்ளது. பள்ளிகள் செயல்பட இருப்பதால் ஓரிரு தினங்களில் வெளியேற வேண்டும் என்று கூறியுள்ளது. எனவே எங்கு செல்வது என்ற வழிதெரியாமல் அப்பாவி மக்கள் தவிக்கிறார்கள்.