கடமை உணர்வுடன் இறைவனை தொழுதால் இறையருள் கிட்டும் - ஜெயலலிதா

`கடமை உணர்வுடன் இறைவனை தொழுதால் மட்டும்தான் இறையருள் கிட்டும்'' என்று இப்தார் நோன்பு திறக்கும் நிகழ்ச்சியில் கதை சொல்லி முதல்-அமைச்சர் ஜெயலலிதா பேசினார்.

இப்தார் நோன்பு திறப்பு

கடந்த 15 ஆண்டுகளாக முதல்-அமைச்சர் ஜெயலலிதா இப்தார் நோன்பு திறக்கும் நிகழ்ச்சி நடத்தி வருகிறார். அந்த வகையில் இந்த ஆண்டும், இப்தார் நோன்பு திறக்கும் நிகழ்ச்சிக்கு ஏற்பாடு செய்திருந்தார். சென்னை நந்தம்பாக்கத்தில் உள்ள சென்னை வர்த்தக மையத்தில் நேற்று மாலை நடைபெற்ற இந்த நிகழ்ச்சியில் கலந்துகொள்வதற்காக முதல்-அமைச்சர் ஜெயலலிதா மாலை 6.10 மணிக்கு அரங்கிற்கு வந்தார். அவரை, முன்னாள் அமைச்சர் அன்வர்ராஜா, தலைமை ஹாஜி முகம்மது சலாபுதீன் அய்ïப் உள்ளிட்டோர் மேடைக்கு அழைத்து சென்றனர்.

முதலில், முன்னாள் அமைச்சர் அன்வர்ராஜா அனைவரையும் வரவேற்றார். அவர் தனது வரவேற்புரையில், ``முதல்-அமைச்சர் ஜெயலலிதா இந்த இப்தார் நோன்பு திறப்பு நிகழ்ச்சியை தொடர்ந்து நடத்தி வருகிறார். இது மதநல்லிணக்கத்திற்கு அடையாளமாக விளங்குகிறது'' என்றார்.

அதனைத் தொடர்ந்து, இப்தார் நோன்பு திறக்கும் நிகழ்ச்சியில் முதல்-அமைச்சர் ஜெயலலிதா பேசியதாவது:-

5 கடமைகள்

அ.தி.மு.க. சார்பில் ஒவ்வோர் ஆண்டும் இப்தார் நோன்பு திறப்பு நிகழ்ச்சி நடைபெற்று வருகிறது. அந்த வகையில், இந்த ஆண்டு நான் விடுத்த அழைப்பினை ஏற்று `இப்தார் நோன்பு திறப்பு' நிகழ்ச்சிக்கு வருகை தந்துள்ள சகோதர, சகோதரிகள் அனைவருக்கும் எனது நன்றி கலந்த வணக்கத்தை முதலில் தெரிவித்துக் கொள்கிறேன்.

மதத்தின் மீது பற்று வைத்தல், குர்ஆன் ஓதுதல், நோன்பிருத்தல், இரவலர்க்கு தர்மம் செய்தல், புனித யாத்திரை மேற்கொள்ளுதல் ஆகிய 5 கடமைகளில் ஒன்றான நோன்பிருத்தலை இந்தப் புனித மாதத்தில் மேற்கொண்டிருக்கும் இஸ்லாமியப் பெருமக்கள் அனைவருக்கும் எனது ரம்ஜான் நல்வாழ்த்துகளை அன்புடன் தெரிவித்துக் கொள்கிறேன்.

இறையருள் யாருக்கு கிடைக்கும்?

நீர் அருந்தாமல், உணவு உட்கொள்ளாமல் இறைப் பற்றுடன் இந்த நோன்பினை இஸ்லாமியப் பெருமக்கள் மேற்கொண்டு இருக்கும் இந்தத் தருணத்தில், "இறையருள் யாருக்குக் கிடைக்கும்?'' என்பது குறித்த ஒரு செய்தியை உங்களிடத்தில் பகிர்ந்து கொள்ள விரும்புகிறேன்.

ஒரு வறண்ட பூமி. அங்கே ஒரு மனிதர் நடந்து போய்க் கொண்டிருந்தார். மழை பெய்தால் எவ்வளவு நன்றாக இருக்கும் என நினைத்து ஆகாயத்தைப் பார்த்தார் அந்த மனிதர். அப்போது "இன்னாருடைய தோட்டத்தில் மழை பொழிவாயாக'' என்று மேகத்தில் இருந்து ஒரு குரல் கேட்டது.

தோட்டக்காரர்

பின்னர் ஒரு குறிப்பிட்ட இடத்தில் மழை பொழிந்தது. மழை நீர் பெருக்கெடுத்து ஓடியது. அந்த மனிதர், ஓடிய அந்தத் தண்ணீரை பின்தொடர்ந்து போனார். அங்கே ஒரு தோட்டக்காரர் மண்வெட்டியால் அந்தத் தண்ணீரை திருப்பிவிட்டு தன் தோட்டத்துக்கு பாய்ச்சிக் கொண்டிருந்தார். அந்த தோட்டக்காரரிடம் இந்த மனிதர் "உங்கள் பெயர் என்ன'' என்று விசாரித்தார். அந்தத் தோட்டக்காரரும் தன் பெயரைக் குறிப்பிட்டார்.

உடனே அந்த மனிதர் "கொஞ்ச நேரத்துக்கு முன்பு அந்த வழியாக வந்து கொண்டிருந்தேன். அப்போது உங்கள் பேரைச் சொல்லி உங்கள் தோட்டத்தில் மழை பெய்யும்படியாக என்று மேகத்தில் இருந்து ஒரு குரல் கேட்டது'' என்று கூறினார். "அப்படியா?'' என்றார் அந்த தோட்டக்காரர்.

கடமை உணர்வு

உடனே அந்த மனிதர் "இந்த அளவுக்கு உங்களுக்கு இறையருள் கிடைத்திருக்கிறதே, அதற்காக நீங்கள் என்ன செய்கிறீர்கள்'' என்று வினவினார். அதற்கு அந்தத் தோட்டக்காரர் "நீங்கள் கேட்பதால் சொல்கிறேன். இந்தத் தோட்டத்தில் எது விளைந்தாலும் அதை மூன்றாக பிரித்து விடுவேன். ஒரு பகுதியை தர்மம் செய்து விடுவேன். இரண்டாவது பகுதியை எனது குடும்பத்திற்காக வைத்துக் கொள்வேன். மூன்றாவது பகுதியை இதே நிலத்தில் மீண்டும் பயிர் செய்து விடுவேன்'' என்று கூறினார். இதில் இருந்து கடமை உணர்வுடன் இறைவனைத் தொழுகிறவர்களுக்கு மட்டும் தான் இறையருள் கிட்டும் என்ற உண்மை தெரிகிறது.

இறை வழிபாட்டுடன், ஏழை, எளியவர்களுக்கு தர்மம் செய்யும் கடமை உட்பட இஸ்லாத்தில் கூறப்பட்டுள்ள அனைத்து கடமைகளையும் மேற்கொண்டு இறையருளை நீங்கள் அனைவரும் பெற வேண்டும் என்று கேட்டுக் கொள்கிறேன்.

இவ்வாறு முதல்-அமைச்சர் ஜெயலலிதா கூறினார்.

இறுதியாக, பிற்பட்டோர் நலத்துறை அமைச்சர் முகம்மது ஜான் நன்றி கூறினார்.

கலந்துகொண்டவர்கள்

நிகழ்ச்சியில், அ.தி.மு.க. அமைப்பு செயலாளர் பி.எச்.பாண்டியன், ஓ.பன்னீர்செல்வம் உள்ளிட்ட அமைச்சர்கள், அ.தி.மு.க. எம்.பி., எம்.எல்.ஏ.க்கள், அனைத்துலக எம்.ஜி.ஆர். மன்ற தலைவர் தமிழ்மகன் உசேன், இந்திய கம்ïனிஸ்டு கட்சி மாநில செயலாளர் தா.பாண்டியன், ஆற்காடு இளவரசர் நவாப் முகம்மது அப்துல் அலி, அகில இந்திய சமத்துவ மக்கள் கட்சி தலைவர் ஆர்.சரத்குமார், இந்திய ஹஜ் கமிட்டி துணை தலைவர் பிரெசிடெண்ட் முகம்மது அபுபக்கர், அகில இந்திய மூவேந்தர் முன்னேற்ற கழக தலைவர் டாக்டர் என்.சேதுராமன், இந்திய குடியரசு கட்சி தலைவர் சே.கு.தமிழரசன், சென்னை மாநகராட்சி மேயர் சைதை துரைசாமி, துணை மேயர் பெஞ்சமின், தேசியவாத காங்கிரஸ் மாநில தலைவர் திண்டிவனம் ராமமூர்த்தி உள்பட பலர் கலந்துகொண்டனர்.

தினத்தந்தி