மலேசியாவை உலுக்கும் டெங்கி

கோலாலம்பூர்: மலேசியா இதுவரை இல்லாத மிக மோசமான டெங்கிப் பரவலால் பாதிக்கப்பட்டிருப்பதாகச் சுகாதார அதிகாரிகள் நேற்று தெரிவித்தனர்.

அதிக மழையும், பொதுமக்களின் அக்கறையின்மையும் டெங்கியைப் பரப்பும் ஏடிஸ் கொசுக்களின் இனப் பெருக்கத்திற்குக் காரணமாக
இருப்பதாகக் கூறப்படுகிறது.

இவ்வாண்டு தொடக்கத்திலிருந்து ஜனவரி 28ம் தேதி வரை, 14 பேர் டெங்கிக்கு பலியானதோடு, 5,062 பேர் டெங்கிக் காய்ச்சலால் பாதிக்கப் பட்டனர்.

சென்ற ஆண்டு இதே காலகட்டத்தில் ஐவர் மட்டுமே மாண்டதோடு, 2,855 பேர் மட்டுமே டெங்கிக் காய்ச்சலால் பாதிக்கப்பட்டனர்.
கோலாலம்பூரிலும் சிலாங்கூர் மாநிலத்திலும் தான் டெங்கிப் பரவல் ஆக அதிகமாக உள்ளது.

“டெங்கிப் பரவல் மிக மோசமாக உள்ளது. ஆனால் இது மலேசியாவின் பிரச்சினை மட்டுமல்ல, உலகளாவியப் பிரச்சினை” என்று செய்தியாளர் கூட்டத்தில் கூறினார் சுகாதார அமைச்சின் தலைமை இயக்குநர் இஸ்மாயில் மரைக்கான்.

தற்போதைய நெருக்கடி நிலையிலும், பலரும் தங்கள் இருப்பிடங்களில் பூச்சிக் கொல்லி மருந்து அடிக்க அதிகாரி களுக்கு அனுமதி தர மறுப்பதாக அவர் கூறினார்.

பொதுமக்கள் சுற்றுப்புறத்தைத் தூய்மையாக வைத்திருப்பதோடு, தண்ணீர் தேங்கி கொசுக்கள் இனப் பெருக்கம் செய்யக்கூடிய குப்பைகள், சட்டிகள் ஆகியவற்றை அப்புறப் படுத்துமாறும் அவர் வலியுறுத்தினார்.

பொதுமக்கள் ஒன்றுசேர்ந்து கொசு இனப்பெருக்கம் செய்யும் இடங்களை அழிப்பது முக்கியம் என்றார் அவர்.

டெங்கிப் பரவலால் சுற்றுலாத்துறை பாதிப்படைந்து, உற்பத்தித்திறன் குறைந்து, மலேசியாவின் பொருளியல் பாதிக்கப்படலாம் என்று மலேசிய சுகாதார அமைச்சர் எச்சரித்திருக்கிறார்.

தென்கிழக்காசிய நாடுகளில் பரவலாகக் காணப்படும் டெங்கிக் காய்ச்சல், சென்ற 2003ம் ஆண்டு முதல் மலேசியாவில் அதிகரித்து வருகிறது.

சென்ற ஆண்டு முழுவதும் மலேசியாவில் 112 பேர் மாண்டதோடு, 49,335 பேர் டெங்கிக் காய்ச்சலால் பாதிக்கப்பட்டதாகப் புள்ளிவிவரங்கள் காட்டுகின்றன.

* உலகம்