கங்கை, யமுனை ஆறுகளில் வெள்ளப்பெருக்கு, உத்தரகாண்டில் மழைக்கு 34 பேர் பலி!

வட மாநிலங்களில் கன மழை பெய்து வருவதால் கங்கை, யமுனை ஆறுகளில் வெள்ளப்பெருக்கு ஏற்பட்டு உள்ளது.

ஆறுகளில் வெள்ளப்பெருக்கு

இந்த ஆண்டில் தென்மேற்கு பருவமழை தாமதமாக தொடங்கியது. தென் மாநிலங்களில் மழை ஏமாற்றி விட்டது. வட மாநிலங்களில் தாமதமாக தொடங்கிய மழை இப்போது அங்கு தீவிரம் அடைந்து உள்ளது. காஷ்மீர், இமாச்சல பிரதேசம், உத்தரகாண்ட், உத்தரபிரதேசம் உள்ளிட்ட வட மாநிலங்களில் கனமழை பெய்து வருகிறது.

தொடர்ந்து பெய்து வரும் பலத்த மழையின் காரணமாக உத்தரபிரதேசத்தில் கங்கை, யமுனை, சாரதா உள்ளிட்ட நதிகளில் வெள்ளம் பெருக்கெடுத்து ஓடுகிறது. மாவி என்ற இடத்தில் யமுனை ஆற்றில் அபாய அளவை தாண்டி வெள்ளம் கரை புரண்டு ஓடுகிறது. வெள்ள நிலவரத்தை அதிகாரிகள் கண்காணித்து வருகிறார்கள். மழை, வெள்ளத்தால் பாதிக்கப்பட்ட பகுதிகளில் நிவாரண பணிகளை மேற்கொள்ளுமாறு மாவட்ட அதிகாரிகளை உத்தரபிரதேச மாநில அரசு கேட்டுக் கொண்டு உள்ளது.

சாவு 34 ஆக உயர்வு

உத்தரகாண்ட் மாநிலத்தில் கங்கோத்ரி, உத்தர்காஷி பகுதிகளில் மழை வெள்ளம் காரணமாக பெருத்த சேதம் ஏற்பட்டு உள்ளது. அந்த மாநிலத்தில் மழை-வெள்ளத்துக்கு பலியானோர் எண்ணிக்கை 34 ஆக உயர்ந்து இருக்கிறது. இதில் உத்தர்காஷி பகுதியில் மட்டும் 31 பேர் இறந்து உள்ளனர்.

அஸ்சி கங்கா நீர்மின் திட்டத்தில் பணியாற்றி வந்த 23 தொழிலாளர்கள் வெள்ளத்தில் சிக்கி காணாமல் போனார்கள். அவர்கள் இறந்து விட்டதாக அறிவிக்கப்பட்டு உள்ளது. ஆறுகளின் கரையோரம் உள்ள பல வீடுகளை வெள்ளம் சூழ்ந்து உள்ளது. சில வீடுகள் இடிந்து விழுந்தன.

நிலச்சரிவு

மலைப்பகுதி நிறைந்த உத்தரகாண்ட் மாநிலத்தில் 2 நாட்கள் இடைவிடாமல் பெய்த மழையால் பல இடங்களில் நிலச்சரிவு ஏற்பட்டு உள்ளது. கங்கோத்ரி நெடுஞ்சாலையில் உள்ள சில பாலங்களை வெள்ளம் அடித்துச் சென்றது.

நிவாரணம் மற்றும் மீட்பு பணிகளை மாநில அரசு முடுக்கிவிட்டு இருக்கிறது. பாதிக்கப்பட்ட மக்களுக்கு உணவுப் பொட்டலங்கள் வழங்கப்படுகின்றன. உத்தர்காஷி, சமோஷி மாவட்டங்களில் பல இடங்களில் வீடுகளுக்குள் வெள்ளம் புகுந்தது. இதனால் பாதிக்கப்பட்ட 250 குடும்பத்தினர் பாதுகாப்பான இடங்களில் தங்க வைக்கப்பட்டு உள்ளனர்.

வெள்ளத்தில் காணாமல் போனவர்களை தேடும் பணி நடந்து வருகிறது.

மழை வெள்ளத்தால் பாதிக்கப்பட்ட பகுதிகளில் ராணுவம் தயார் நிலையில் வைக்கப்பட்டு உள்ளது. மழை, வெள்ளத்தால் ஏற்பட்ட சேதம் குறித்தும், நிவாரண பணிகளை துரிதப்படுத்துவது குறித்தும் தலைமைச் செயலாளர் அலோக்குமார் ஜெயினுடன் உத்தரகாண்ட் முதல்-மந்திரி விஜய் பகுகுணா ஆலோசனை நடத்தினார். விரைவில் வெள்ள சேத பகுதிகளை அவர் பார்வையிட இருக்கிறார்.

மேலும் வெள்ள நிவாரண உதவி கேட்டு மத்திய அரசுக்கு உத்தரகாண்ட் மாநில அரசு அறிக்கை அனுப்பி உள்ளது.

காஷ்மீர்

காஷ்மீர் மாநிலத்தில் பலத்த மழை பெய்வதால் அங்குள்ள சீனாப், தாவி, உஜ், பசந்தர் ஆறுகளில் வெள்ளம் பெருக்கெடுத்து ஓடுகிறது. ஜம்மு, சம்பா, உதாம்பூர் மாவட்டங்களில் தாழ்வான இடங்களில் உள்ள வீடுகளை வெள்ளம் சூழ்ந்து உள்ளது. வெள்ளத்தில் சிக்கிய 24 பேர் பத்திரமாக மீட்கப்பட்டனர்.

இமாசல பிரதேசத்திலும் மழையினால் பல இடங்களில் பாதிப்பு ஏற்பட்டு உள்ளது. சாலைகள் சேதம் அடைந்து உள்ளன.

தினத்தந்தி