இன்னொரு பக்கம்

இறக்குமதிக் கலாச்சாரத்தில்
இதயம்
பறிகொடுத்தவர்களே

மந்தையில் மாடு மேய்ப்பவனின்
பெட்டிக்குள்
ஜீன்ஸ்பேண்ட் இருக்கலாம்

ஆடைகளின்
அலங்கோலத்தில்
சிலருக்கு அழகு வந்திருக்கலாம்

பாப் வெட்டியதால்
பாட்டிக்கும் கூடப்
பத்து வயது குறைந்திருக்கலாம்

ஜாக்கி சானுக்கும்
மைக்கேல் ஜாக்சனுக்கும்
ரசிகர் மன்றம் அமைக்கும்
சர்வதேச ஒற்றுமை வளர்ந்திருக்கலாம்

வெளிக் கலாச்சாரத்தால்
வெளிச்சம் சில வீதிகளில்
விழுந்திருந்தாலும் –

இருட்டை விதைத்த
அதன்
இன்னொரு பக்கம் இருக்கிறது

கலாச்சார மாற்றம்
காமத்தைக் காதல் என்று
மொழி பெயர்த்திருக்கிறது

சிறுமிகளுடைய
உதடுகளின் உத்தமத்தன்மை
திருடப்பட்டிருக்கிறது

பேருந்து நெரிசலில்
மாணவர்களின் மனது
மாசுபட்டிருக்கிறது

நட்ட நடு வீதியில்
நிர்வாணப் படங்களை
நின்று ரசிக்கும்
நிதானம் வந்திருக்கிறது

ஆளாகும் முன்னே
ஆட்கொள்ளப்படும்
அவசரம் கண்களில் அலைமோதுகிறது

குழந்தைகளே
குழந்தைகளைச் சுமக்கும்
கயமை
கையெழுத்திட்டிருக்கிறது

தனிமனிதப் புனிதம்
தகர்க்கப்பட்டிருக்கிறது
பரஸ்பர நம்பிக்கை பறிபோயிருக்கிறது

அலுவலின் இடைவேளையில்
வீட்டுக்கு வந்து வேவுபார்க்கும்
விபரீதம் விளைந்திருக்கிறது

புலன்களைத் தூண்டும் பொறுப்பற்ற
பொழுது போக்குகளால்
சுயகட்டுப்பாடு
சுதந்திரம் கேட்கிறது

குடிகாரத் தகப்பனைத்
தாங்கிப் பிடிக்க முடியாத
சிறுவனைப்போல்
உணர்வின் சுமையால்
அறிவு தள்ளாடுகிறது

உணர்ச்சிப் புயலில்
ஆண்மையும் பெண்மையும்
ஆடி முடித்தபின் –

மாம்பழத்துள் வண்டாய்
மனச் சாட்சியின் அரிப்பில்
எதிர்கால வீரியத்தை
இழந்துபோகிறது இளமை

கொசுவலைக்குள் வந்து
உறக்கம் கலைக்கும்
ஒற்றைக் கொசுவாய்
குற்ற உணர்ச்சியில்
குலைந்து போகின்றன குடும்பங்கள்

இதனால்
அபினின் அரசாட்சியில்
ஒரு அடிமை வம்சம்
அரங்கேறியிருக்கிறது

பாலியல் வெறியால்
பக்கவாதம் வந்தவனாய்ப்
பாரத தேசம் பாதிக்கப்படுகிறது

உடற்பயிற்சியை உதறிவிட்டு
உள்ளாடைகளில் அழகிருப்பதாய்
உபதேசித்தது யார்?

கட்டை விரலால் மட்டுமே
கையெழுத்துப் போடும்
பாமரனுக்குக்
காமசூத்திரம் கற்றுத் தருவதில்
அவசரம் காட்டுவதேன்?

பள்ளிப் பாடம் போதிக்காமல்
பள்ளியறைப் பாடத்திற்கான
சரித்திரத் தேவையென்ன?

அடுப்பெரிக்க
வழியில்லாத போது
அழகுக் குறிப்புக்கு அவசியமென்ன?

சோகத்தை விரட்ட
மோகத்திலா முகம் கழுவுவது?

பிறக்கும் போதே
இறப்பின் முகவரியோடு
எமனின் கை பிடித்துவரும்
எய்ட்ஸ் குழந்தைகள்
எந்தக் கலாச்சாரத்தின் எச்சங்கள்?

நம் இதயமும் தேசமும்
குப்பைக் கூடையல்ல
கழிவுகளைச் சேகரிக்கும்
கார்ப்பரேசன் லாரியுமல்ல.

கலாச்சாரப் பரிமாற்றம் என்பது
சந்தனத்தோடு பன்னீர் சேர்ப்பது போன்றது

காந்தாரக் கலைபோல்
கம்பீரமான
கண்ணியங்களின் கைகோர்ப்பு

குழந்தைத் திருமணத் தடுப்பும்
உடன்கட்டை ஒழிப்பும்
உன்னதக் கலாச்சாரங்களின்
ஊடுருவல்தான்

கதவைத் திறந்துவைப்போம்
காற்று வரட்டும்
கழிவுகள் வேண்டாம்

அந்நியரிடமிருந்து
காக்கப்பட வேண்டியவை
எல்லைகள் மட்டுமல்ல

நம் தேசத்தின் கலாச்சாரமும்தான்


”அதற்கு அப்பாலும்...”
சூரியதாஸ்
கவிதைத் தொகுப்பு...1997


facebook

நல்ல பகிர்வு பகவதி.

இரா.பகவதி wrote:
கதவைத் திறந்துவைப்போம்
காற்று வரட்டும்
கழிவுகள் வேண்டாம்

கதவைத் திறந்துவைப்போம்
உள்ள கழிவுகள் போகட்டும்
காற்று வரட்டும்

அருமையான வரிகள்
பதிவுக்கு