ஈரானிய ஏவுகணையின் ‘டம்மி இலக்கு’ எது என்று.. இன்று தெரிந்து விடும்!

ஈரானிய ஏவுகணையின் ‘டம்மி இலக்கு’ எது என்று.. இன்று தெரிந்து விடும்!



ஈரானிய பாதுகாப்பு படையின் சிறப்புப் பிரிவான ‘புரட்சிக் காவலர்கள்’ (Revolutionary Guards) , பாலைவனத்தில் யுத்தப் பயிற்சிகளில் ஈடுபடவுள்ளதாக அறிவிக்கப்பட்டுள்ளது.

இந்தப் பயிற்சிகளில் என்ன விசேஷம் என்றால், தரையில் இருந்து தரைக்கு ஏவப்படும் ஏவுகணைகள் (surface-to-surface missiles) பயிற்சியில் உபயோகிக்கப்பட உள்ளன.

பொதுவாக ஈரானிய ராணுவம் செய்யும் ராணுவ நடவடிக்கைகள் பற்றி அமெரிக்க ஊடகங்கள் செய்தி வெளியிடுவதே வழக்கம். ஆச்சரியகரமாக இம்முறை, இந்த அறிவிப்பை ஈரானிய அரசின் நியூஸ் ஏஜென்சி IRNA வெளியிட்டுள்ளது. (உடனடியாக அமெரிக்க மீடியாவில் இது தலைப்பு செய்தியாகியது)


surface-to-surface ஏவுகணை பயிற்சிக்கு ரெடி

ஈரானின் மத்திய பகுதியில் அமைந்துள்ள பாலைவனத்தில், ஏவுகணை ஏவும் பயிற்சி நடைபெறவுள்ளது.

ஈரானிய புரட்சிக் காவலர் படையின் வான் பிரிவுத் தலைவர் அமி அலி ஹஜிசாடி, “ஏவுகணைப் பயிற்சியில், ஈரானின் எதிரி இலக்குகள் மாடல்களாக செய்து வைக்கப்பட்டிருக்கும். அவற்றை நோக்கியே ஏவுகணைகள் ஏவப்படவுள்ளன” என்று தெரிவித்ததாக IRNA செய்திக் குறிப்பு கூறுகிறது.

கடந்த 2009-ல் ஈரான் இதேபோன்ற பயிற்சி ஒன்றை நடத்தியபோதும், இதே போன்ற டம்மி இலக்குகள் வைக்கப்பட்டன. அப்போது, அமெரிக்க வெள்ளை மாளிகை வடிவில் டம்மி இலக்குகள் அமைக்கப்பட்டிருந்தன. இப்போதும் கிட்டத்தட்ட அது போன்ற ஒன்றுதான் டம்மி இலக்காக அமைக்கப்பட்டிருக்கும்.

டம்மி இலக்குதானே.. தாராளமாக அடிக்கட்டும்.

ஈரான் வெளியிட்டுள்ள செய்தியின்படி, ஏவுகணைப் பயிற்சிகள் இன்று துவங்கி, 3 நாட்கள் நடைபெறவுள்ளன. பயிற்சிக்காக உபயோகிக்கப்படவுள்ள ஏவுகணைகள் பற்றிய விபரங்கள் தெரிவிக்கப்படவில்லை.

ஈரானிய எண்ணை இறக்குமதி மீது ஐரோப்பிய ஒன்றியம் தடை விதித்த பின்னர், நடைபெறும் போர் பயிற்சி இது என்பதால், இதற்கு முக்கியத்துவம் கொடுக்கப்படுகிறது. ஈரானிய அரசின் நியூஸ் ஏஜென்சி IRNA, ராணுவ விவகாரங்களை வெளியிடுவதில் எப்போதும் ஒரு உள் நோக்கம் இருக்கும்!

“நம்மீது மற்றையவர்கள் தாக்குவதற்கு முன், நாமும் தாக்குதலுக்கு தயாராக உள்ளோம்” என்று ஈரான் காட்டிக் கொள்ள விரும்புகிறது என்பதே அந்த உள்நோக்கமாக இருக்கலாம். —