எங்களை கைது செய்ய முயன்றால் பயங்கர விளைவு ஏற்படும்-அன்னாஹசாரே குழு

ஊழலுக்கு எதிராக வலுவான லோக்பால் மசோதாவை நிறைவேற்ற வலியுறுத்தி, அன்னாஹசாரே தனது குழுவினருடன் டெல்லி ஜந்தர் மந்தரில் உண்ணாவிரத போராட்டம் தொடங்கி உள்ளார். ஒரு வாரமாக உண்ணாவிரத போராட்டம் நீடித்து வருகிறது. இதனால் உண்ணாவிரதத்தில் கலந்து கொண்டுள்ளவர்களில் சிலரது உடல்நிலை மோசமடைந்து உள்ளது.

குறிப்பாக, ஹசாரே குழுவின் முக்கிய உறுப்பினர்களான அரவிந்த் கெஜ்ரிவால், கோபால் ராய் ஆகியோரின் உடல்நிலை பாதிக்கப்பட்டுள்ளது. கோபால் ராய் தொடர்ந்து வாந்தி எடுக்கிறார். இவர்களை பரிசோதித்த டாக்டர்கள், இருவரும் உடனடியாக மருத்துவ சிகிச்சை எடுத்துக் கொள்ள வேண்டும். இல்லையெனில், இதயம் மற்றும் கிட்னிக்கு பாதிப்பு ஏற்படலாம் என்று எச்சரித்துள்ளனர்.

இந்த நிலையில், உண்ணா விரதம் இருப்பவர்களை கைது செய்யவும், உடல்நிலை பாதிக்கப்பட்டுள்ளவர்களை கட்டாயமாக ஆஸ்பத்திரியில் சேர்த்து சிகிச்சை அளிக்கவும் மத்திய அரசு யோசித்து வருவதாக தகவல்கள் வெளியாகி உள்ளன. இந்த தகவல் ஹசாரே குழுவினரை கொதிப்படைய செய்துள்ளது. வலுவான லோக்பால் மசோதாவை கொண்டு வர முடியாத அரசு, எங்கள் போராட்டத்தை ஒடுக்க நினைப்பதா? என குமுறுகின்றனர்.

உண்ணாவிரத பந்தலில் அரவிந்த் கெஜ்ரிவால் நேற்று மாலை பேசியதாவது:-

எங்களை கைது செய்து, ஆஸ்பத்திரியில் அனுமதிக்க முயற்சி செய்ய வேண்டாம் என்று அரசை நான் எச்சரிக்கிறேன். அவ்வாறு செய்தால், பின் விளைவுகள் பயங்கரமானதாக இருக்கும். தற்கொலைக்கு முயன்றதாக கூறி போலீசார் என்னை கைது செய்யக்கூடும் என்று என்னுடைய வக்கீல் தெரிவித்தார்.

இந்த சட்டம் 1860-ல் இயற்றப்பட்டது ஆகும். மகாத்மா காந்தியின் உண்ணாவிரத போராட்டத்துக்கு எதிராக பிரிட்டிஷ் அரசாங்கம் கொண்டு வந்த சட்டம் ஆகும். ஆனால் மகாத்மா காந்தி வலுக்கட்டாயமாக செய்யப்பட்டார் என்று நாங்கள் ஒருபோதும் கேள்விப்பட்ட தில்லை. பிரிட்டிஷ் அரசாங்கத்தை விட தற்போதுள்ள மத்திய அரசு மிகவும் மோசமாக நடந்து கொள்கிறது.

இவ்வாறு அவர் பேசினார்.

அன்னாஹசாரே பேசியதாவது:- மத்திய அரசுக்கு ஊழலை ஒழிப்பதில் அக்கறை இல்லை. எங்களுடன் பேச்சுவார்த்தை நடத்த மந்திரிகள் யாரையும் அனுப்ப மாட்டோம் என்று அரசு சொல்கிறது. ஊழல் மந்திரிகள் யாரும் வந்து எங்களை சந்தித்து பேச வேண்டிய அவசியமில்லை. அவர்கள் வராமல் இருப்பதே நல்லது.

வலுவான லோக்பால் மசோதாவை கொண்டு வந்தால், ஊழலை 100 சதவீதம் ஒழிக்க முடியாவிட்டாலும், 60 முதல் 65 சதவீதம் ஒழித்துவிட முடியும். வலுவான லோக்பால் மசோதாவை அரசு நிறை வேற்ற முடியாமல் முட்டுக் கட்டையாக இருப்பவர்கள் ப.சிதம்பரம் போன்றவர்கள்தான்.

இவ்வாறு அவர் பேசினார்.

நன்றி மாலைமலர் ..

darwin wrote:வலுவான லோக்பால் மசோதாவை கொண்டு வந்தால், ஊழலை 100 சதவீதம் ஒழிக்க முடியாவிட்டாலும், 60 முதல் 65 சதவீதம் ஒழித்துவிட முடியும். வலுவான லோக்பால் மசோதாவை அரசு நிறை வேற்ற முடியாமல் முட்டுக் கட்டையாக இருப்பவர்கள் ப.சிதம்பரம் போன்றவர்கள்தான்.

காலம் காலமாக ஊழலில் ஊறி திளைதிருக்கும் இந்த பெருச்சாளிகள் எப்படி இதை விடுவார்கள்.