பள்ளி பேருந்தில் சிக்கி மேலும் ஒரு சிறுமி பலி!

பள்ளி பேருந்தில் சிக்கி மேலும் ஒரு சிறுமி பலி!

ஆம்பூர் அருகே தனியார் பள்ளி பஸ்சில் சிக்கி அதே பள்ளியை சேர்ந்த 3 வயது சிறுமி தலை நசுங்கி பலியானார். டிரைவரின் அலட்சியத்தால் நடந்த இந்த கொடூரம் அப்பகுதி மக்களிடம் கடும் அதிர்ச்சியை ஏற்படுத்தியுள்ளது. கடந்த 2 தினங்களுக்கு முன்னர் சென்னை தாம்பரம் பகுதியில் தனியார் பள்ளி பஸ்சின் ஓட்டை...


வழியாக தவறி ரோட்டில் விழுந்த சிறுமி ஸ்ருதி பலியான சம்பவம் தமிழகத்தையே உலுக்கியது. இந்த சோகம் இன்னும் நம்செஞ்சை விட்டு அகலவில்லை. அதற்குள், வேலூர் மாவட்டம் ஆம்பூர் அருகே தனியார் பள்ளி பஸ் மோதியதில் அதே பள்ளி மாணவியான 3 வயது சிறுமி பலியான சம்பவம் அரங்கேறியுள்ளது.


வேலூர் மாவட்டம் ஆம்பூர் அடுத்த ஈச்சம்பட்டு கிராமம் மீனாட்சி காலனியில் வசிப்பவர் குமார் (28), இவரது மனைவி மீனா. இவர்களுக்கு சுவேதா (5), சுஜிதா (3), என 2 மகள்கள் இருந்தனர். மாலை 4.30 மணிக்கு பள்ளி முடிந்ததும் அதே பஸ்சில் ஏறி வீடு திரும்பிக் கொண்டிருந்தனர்.


இந்த பஸ்சை வாணியம்பாடியை சேர்ந்த டிரைவர் ஒருவர் ஓட்டி வந்தார். வடச்சேரியை சேர்ந்த சக்திகுமார் என்பவர் கிளீனராக இருந்தார். மாலை 5 மணிக்கு ஈச்சம்பட்டு முருகன் கோவில் அருகே பஸ் வந்து நின்றது. இதையடுத்து அந்த ஸ்டாப்பில் குழந்தைகள் சுஜிதா, சுவேதா மற்றும் சிறுவன் அசோக் ஆகியோர் மட்டும் பஸ்சை விட்டு இறங்கினர்.


பின்னர் தங்கள் வீட்டுக்கு செல்வதற்காக பஸ்சின் முன்பக்கமாக வந்து பஸ்சை கடக்க முயன்றுள்ளனர். இதில் குழந்தை சுவேதா முதலில் செல்ல, குழந்தை சுஜிதா கையை பிடித்து சிறுவன் அசோக் பின் தொடர்ந்துள்ளான். ஆனால் இவர்கள் பஸ்சை கடந்து சென்று விட்டனரா? என்பதை கவனிக்காமல் டிரைவர் பஸ்சை இயக்கியுள்ளார்.

இதனால் பஸ் மோதி கீழே விழுந்த சுஜிதா மீது பஸ் முன்சக்கரம் ஏறியது. இதில் தலை நசுங்கி அதே இடத்திலேயே பரிதாபமாக இறந்தார். சிறுவன் அசோக்கும், அக்கா சுவேதாவும் செய்வதறியாது திகைத்து அலறினர். அதற்குள் பஸ் சென்று விட்டது. இதற்கிடையே சிறுமி சுஜிதா பலியான தகவல் கிடைத்து வந்த அவளது தந்தை குமார், தாய் மீனா மற்றும் உறவினர்கள் அங்கு ஓடி வந்தனர்.

சிறுமியின் உடலை பார்த்து அவர்கள் கதறி அழுதனர். குழைந்தைகளை அழைக்க வந்தவர்களும் தகவல் அறிந்து வந்த கிராமமக்களும் சம்பவ இடத்தில் முற்றுகையிட்டு மாணவியின் பிணத்தை எடுக்க விடாமல் மறியல் செய்தனர். இதனால் அங்கு பரபரப்பான சூழ்நிலை ஏற்பட்டது.


இதுபற்றி தகவல் அறிந்த ஆம்பூர் டி.எஸ்.பி. விஜயகுமார் போலீஸ் இன்ஸ்பெக்டர் மார்ட்டின், பிரேம் குமார், சப்-இன்ஸ்பெக்டர் ரவி தலைமையில் போலீசார் விரைந்து சென்று பேச்சுவார்த்தை நடத்தினர். பஸ் டிரைவர் கிளீனர், நிர்வாகம் மீது நடவடிக்கை எடுக்கப்படும் என்று போலீசார் கூறியதையடுத்து சமாதானம் ஆனார்கள்.


இதனை தொடர்ந்து மாணவியின் பிணத்தை மீட்டு ஆம்பூர் அரசு மருத்துவமனைக்கு அனுப்பி வைத்தனர். அஜாக்கிரதையாக பஸ் ஓட்டிய டிரைவர் சங்கர், கிளீனர் சக்திகுமாரை போலீசார் கைது செய்தனர். இருவரையும் நீதிபதி முன்பு ஆஜர்படுத்தி வேலூர் ஜெயிலில் அடைத்தனர். பள்ளிதாளாளர் கோலப்பன் (எ) சண்முகத்திடம் போலீசார் தொடர்ந்து விசாரணை நடத்தி வருகின்றனர்.
http://eutamilar.eu/tamils/index.php/4610-2012-07-28-07-29-01