அழகு

தங்கத்துக்கு உறக்கமே வரவில்லை. மகன் அரவிந்த் ரம்யாவைக் கல்யாணம் செய்து கொள்வதாக சொன்னதிலிருந்து தங்கம் கொஞ்சம் கவலையும், பதட்டமுமாகவே இருந்தாள்.

ஒருவருடத்திற்கு முன், பஜாரில் உள்ள பிரபலமான பெண்களுக்கான அழகு நிலையம் ஒன்றிற்கு `தங்கை சுதாவை பைக்கில் கொண்டு போய் விட்டான் அரவிந்த். அங்கிருந்து வரும் ஒவ்வொரு சமயமும் ரம்யாவைப் புகழ்ந்து பேசுவாள் சுதா.

தங்கை சொன்ன ஈர்ப்பில் இந்த ஆறுமாதமாகத் தான் அரவிந்த் ரம்யாவைப் பார்த்து பேசினான். தங்கை சுதாவின் கல்யாண சமயத்தில் ரம்யா தான் சுதாவிற்கு கை, கால்களுக்கு மெகந்தி இடுவதும், பேஷியல் செய்வதுமாக இருந்தாள். கல்யாணத்திற்கு முதல்நாள் அரவிந்த் காரை அனுப்பி ரம்யாவை அழைத்து வரச் செய்தான். முதல் நாள் மாலை சுதா ரிஷப்ஷன் அன்று தேவதையாக காட்சி அளித்தாள். திருமணத் தன்றோ, மணப்பெண்ணை சிலையை வடிப்பது போல் ரம்யா அலங்கரித்திருந்தாள். உறவினர்களி டையே ரம்யாவிற்கு ஒரே பாராட்டு மழை.

அரவிந்த்தின் மனதில் ரம்யாவின் உருவம் நிழல் படமாக ஒட்டிக்கொண்டு சலனப்படுத்தியது. ஒருநாள் அவளை சந்திக்க அவன் அனுமதி கேட்டான். என்னவோ ஏதோ என்ற தயக்கத்தில் வரச்சொன்னவளிடம், முதன்முதலாக தன் காதலை சொன்னான். `நாம் திருமணம் செய்து கொள்ளலாமா? என கேட்டான். ரம்யாவின் கண்ணில் நீர் தளும்பியது. வார்த்தைகளை மென்று விழுங்கியவாறே, `எங்கள் வீட்டில் சம்மதிப்பார்கள், உங்கள் வீட்டில் ஒன்றும் சொல்ல மாட்டார்களா? என்றாள்.

அன்று இரவே அரவிந்த் அம்மாவிடம் எல்லா விஷயங்களையும் கூறினான். அம்மா தயங்கினாள். பிறகு, ``நீ கை நிறைய சம்பாதிக்கிறாய். வேறு நல்ல பெண்ணாக பார்க்கலாமே'' என்றாள். அரவிந்த் உடனேயே ``அம்மா நீ தேடினாலும் ரம்யாவைப் போல நல்ல குணமுள்ளவளாகக் கிடைக்காது நம்மை நன்கு புரிந்தவள். பிரச்சினைகள் எதுவுமின்றி சந்தோஷமாக வாழலாம்'' என்றான்.

அம்மா, `இல்ல... வந்து...' என்று விழுங்கினாள்.

"அம்மா, நீ சொல்ல வர்றது எனக்குப் புரியுது. குணம் தான் பெரிதே தவிர, ரம்யாவின் வலது காலின் பாதத்தில் உள்ள ஊனம், ஊனமே இல்லையம்மா...அதோட அவ கிட்ட நல்ல கலை இருக்கு. அதை நேர்த்தியாய் செய்யற பக்குவம் இருக்கு '' என்று சொல்ல...

அம்மா பக்கமிருந்து இப்போது மறுப்பு இல்லை.

- சந்திரா சிவபாலன்