பொய் சொன்ன வள்ளுவர்!

மீனு · மீனு Thu Oct 08, 2009 4:01 pm

இதை நான் கோகுலம் புத்தகத்தில் படித்தேன். இதனை கதைப்பாடலாக எழுதியுள்ளார்கள். அதை பார்த்து உங்களுக்கு நான் எழுதுகிறேன். இதை நீங்களும் வாசியுங்கள்.

வீட்டின் முன்னே திண்ணையிலே
வெல்லத் தமிழில் வள்ளுவனார்
பாட்டுச் சொல்லி மாணவர்க்குப்
பாடம் நடத்தி வந்தார்!

"அய்யா! என்னைக் காத்திடுங்கள்
அடிக்கக் கணவன் வருகின்றான்"
'பொய்யே இல்லை நான்விரந்து
போக்குக் காட்டி ஒடிவந்தேன்'

என்ற பெண்ணை வள்ளுவனார்
இரக்கங் காட்டி " வீட்டுக்குள்
சென்று மறைவாய் இரு" என்று
சிரித்துக் கொண்டு சொன்னாரே!

அதன்பின் அந்தப் பெண் கணவன்
அதிகச் சினமே கொண்டுவந்த
விதமாய் " அய்யா என் மனைவி
வேணி இந்தப் பக்கந்தான்

வந்தாள் அவளைப் பார்த்தீரா?
மறைத்தி டாது சொல்லுங்கள்
இந்தப் பொழுதே நானவளை
இங்கே கொல்வேன்" என்றுரைத்தான்!

அவனைப் பார்த்துக் குறளாசான்
அழகாய்ச் சின்னச் சிரிப்புடனே
"எவளும் இங்கே வரவில்லை
இதுவே உண்மை" என்று சொன்னார்!

அந்த நேரம் உள்ளிருந்த
அந்தப் பெண்ணோ இருமிவிட்டாள்!
வந்த அந்த ஆள் சினந்து
வள்ளு வரிடம் பேசலுற்றான்.

"உண்மை பேச வேண்டுமென்றே
ஊருக் கெல்லாம் உரைத்துவிட்டு
திண்மை யோடு பெரும்பொய்யைத்
திருவள் ளுவரே பேசியதேன்? "

என்று கேட்ட ஆளை ஓர்
இருக்கை தனிலே அமரவைத்து
"நன்று தம்பி! நானுண்மை
நவின்றி ருந்தால் என்னாகும்?

பாபம் செய்ய வைத்துவிடும்
பண்பைத் தின்றே ஏப்பமிடும்
ஏழ்மைக் குள்ளே இருந்தாலும்
இழிவைச் செய்தல் கூடாது

நானோ ஒருபொய் சொன்னதனால்
நங்கை உன்றன் மனைவியவள்
வீணே துன்பம் அடையாமல்
மீண்டு நன்மை பெற்றாளே!

உண்மை போலே சிலநேரம்
ஒரு பொய் நலமே தருமென்றால்
பெண்கள் ஆண்கள் எல்லாரும்
பெரிய பொய்யும் சொல்லிடலாம்"

என்று சொன்னார் திருவள்ளுவர்
எழுந்த அவனோ புலவரிடம்
"என்றும் இனிமேல் மனைவியினை
என்றன் உயிர்போல் போற்றிடுவேன்

மன்னியுங்கள் புலவரய்யா!
மனைவி வரட்டும்" எனச் சொன்னான்
பெண்ணோ சிரித்த படிவந்தாள்
பிரிந்தோர் அன்பில் பிணைந்தாரே!

- கவிஞர் வெங்கடேச பாரதி