நகைச்சுவைகள்

இந்த நகைச்சுவைகள் http://anbu-openheart.blogspot.in என்ற தளத்திலிருந்து எடுத்து இங்கு பதிவு செய்யப்பட்டது

நான் ஒரு விஜய் பைத்தியம் என்பது எனது பதிவு படிக்கும் அனைவருக்கும் தெரிந்த விஷயம்.. ஆனால்
எவ்வளவோ என்னை நண்பர்கள் திடப்படுத்தியும், நண்பர்களே இலவசமாக டிக்கெட் எடுத்துக்கொடுத்தாலும் காவலனுக்கு செல்ல மறுத்தேன். நேற்று காலை அதிஷா அண்ணன் விமர்சனம் பார்த்துகூட என்னை நானே நியாயப்படுத்திக்கொண்டேன்.

தீடீரென எந்த எழுச்சி ஏழுமலையாத்தா என் மனதுக்குள் இறங்கினால் என்று தெரியவில்லை. என்னடா அன்பு,வேட்டைக்காரன்,சுறாவே பார்த்துட்டோம்.. இந்த படத்தை பார்த்தா என்ன.. என்று என் உள்மனது குறுகுறுத்தது..சரி மாலை போவோம் என உறுதியானேன். வழக்கமாக நான் படத்துக்கு போவதென்றால் என் முதலாளி தான் ஸ்பான்சர்.. இந்த தடவை அதுவும் மிஸ்ஸிங்.. காரணம் அவர் விஜய் பத்தி பேசுனாலே கோவப்படுவார்.. சரி இந்த படத்துக்காவது நம் சொந்த காசில் போலாம் என எண்ணி தியேட்டருக்கு கிளம்ப ஆயத்தமானேன்..

போகும் போதே முன்னெச்சரிக்கையாக கையில் தலைவலி மாத்திரை இரண்டும், ஜெண்டுபாம் தைல டப்பாவும் வாங்கிச்சென்றேன்..தியேட்டருக்குள் நுழையும் போதே மணி 6.30 ஆகிவிட்டது.. படம் 6.20க்கே போட்டுவிடுவார்கள் என நண்பன் கூறுயது வேறு ஞாபகத்திற்கு வந்து போனது..சீக்கிரமாக சென்று சைக்கிளை நிறுத்தி பார்க்கிங் டோக்கன் கொடுப்பவரிடம் படம் போட்டாச்சா என ஆவலாக கேட்டேன்.. என்னை ஏற இறங்க பார்த்த அவர் இல்லை தம்பி என்று கூறியவாறே டிக்கெட்டை கிழித்து கையில் கொடுத்தார்..

அவரிடம் பார்க்கிங் டிக்கெட் வாங்கியவன் ஓடினேன் கவுண்டரை நோக்கி.. கம்யூட்டரின் முன் உட்கார்ந்திருந்தவன் தலையில் கைவைத்தவாறு சோகமாக அமர்ந்திருந்தான்..

அண்ணே..அவனிடம் பேச்சில்லை

கொஞ்சம் அழுத்தமான குரலில் அண்ணே என்றேன்..

என்ன என்பது போல் பார்த்தார்...

சரி அவருக்கு என்ன பிரச்சினையோ என்று எண்ணி காவலன் டிக்கெட் என்றேன்..

ஒரு பத்து நிமிஷம் ஆகும்பா என்றார்..

15 நிமிடங்கள் பொறுமை காத்தவன் சற்றே பொறுமையில்லாமல் கேட்டேன்.. கம்யூட்டர் ரிப்பேரா என்றேன்..

இல்லைப்பா...

கைகடிகாரத்தை பார்த்தேன் 6.50 என காட்டியது..

மறுபடியும் அவரிடம் கேட்க முற்பட அவரே என்னிடம்

தம்பி..உள்ள 5 பேர் தான் போயிருக்காங்க.. இன்னும் 5 பேர் வரட்டும்.. ஒரு பத்து பேர் வந்தாலாவது படம் போட்டுருலாம்னு பார்க்கிறோம்.. உங்க பிரண்ட்ஸ் யாரும் இருந்தா கூப்பிடுறீங்களா என்றார்...

அப்போதுதான் தெரிந்தது அவர் தலையில் கைவைத்து உட்கார்ந்ததன் காரணம் என்னவென்று.

இந்த நகைச்சுவைகள் http://anbu-openheart.blogspot.in என்ற தளத்திலிருந்து எடுத்து இங்கு பதிவு செய்யப்பட்டது