தீமையை விதைப்பதென்ன விந்தையே!

**சாமி** · **சாமி** Wed Jul 18, 2012 10:35 pm

குடிப்பதைத் தடுப்பதே
கோடி கோடி புண்ணியம்.
அடிப்பினும் பொறுத்துநாம்
அன்பு கொண்டு வெல்லுவோம்!

மக்களை வதைத்திடும்
மனைவியை உதைத்திடும்
துக்கமான கள்ளினைத்
தொலைப்பதே துரைத்தனம்!

பித்தராகி ஏழைகள்
பேய்ப்பிடித்த கோலமாய்ப்
புத்திகெட்டுச் சக்தியற்றுப்
போனதிந்தக் கள்ளினால்.

பாடுபட்ட கூலியைப்
பறிக்குமிந்தக் கள்ளினை
வீடுவிட்டு நாடுவிட்டு
வெளியிலே விரட்டுவோம்.

கஞ்சியின்றி மனைவிமக்கள்
காத்திருக்க வீட்டிலே
வஞ்சமாகக் கூலிமுற்றும்
வழிபறிக்கும் கள்ளினை

மெய்தளர்ந்து மேனிகெட்டுப்
போனதிந்தக் கள்ளினால்;
கைநடுக்கங் கால்நடுக்கங்
கண்டதிந்தக் கள்ளினால்,

தேசமெங்கும் தீமைகள்
மலிந்ததிந்தக் கள்ளினால்,
நாசமுற்று நாட்டினர்
நலிந்ததிந்தக் கள்ளினால்.

குற்றமற்ற பேர்களும்
கொலைஞராவார் கள்ளினால்;
கத்திக்குத்துச் சண்டைவேண
கள்ளினால் விளைந்ததுவே

குற்றமென்று யாருமே
கூறுமிந்தக் கள்ளினை
விற்கவிட்டுத் தீமையை
விதைப்பதென்ன விந்தையே!

(குடிப்பதை தடுப்போம்! - நாமக்கல் கவிஞர் இராமலிங்கம் பிள்ளை எழுதியது )

அசுரன் · அசுரன் Wed Jul 18, 2012 10:52 pm

கள் இப்போ விக்கிறது இல்லை ஆனால் அத்தோட கொடிய சரக்கு தமிழகத்தில் உலாவிக்கிட்டு இருக்கு. இப்போதைக்கு கள்ளே மேல் எனலாம்.

**சாமி** · **சாமி** Wed Jul 18, 2012 11:00 pm

அசுரன் wrote:
கள் இப்போ விக்கிறது இல்லை ஆனால் அத்தோட கொடிய சரக்கு தமிழகத்தில் உலாவிக்கிட்டு இருக்கு. இப்போதைக்கு கள்ளே மேல் எனலாம்.

கள், சாராயம், சரக்கு, பிராந்தி, பீர் , ஜின், வோட்கா , ரம், வொயின் .... இப்படி பல பெயரில் எதைக் குடிச்சாலும் ....... கேவலமான பழக்கம்தானே நண்பரே !

அசுரன் · அசுரன் Wed Jul 18, 2012 11:02 pm

சாமி wrote:கள், சாராயம், சரக்கு, பிராந்தி, பீர் , ஜின், வோட்கா , ரம், வொயின் .... இப்படி பல பெயரில் எதைக் குடிச்சாலும் ....... கேவலமான பழக்கம்தானே நண்பரே !

ஆமாம் குடி குடியை அல்லவா கெடுக்கும்... குடிபழக்கம் நாட்டுக்கும் வீட்டுக்கும் கேடு... இந்த கேட்டை தான் அரசாங்கமே செய்கிறது.