விலைவாசி பிரச்சினையில் நடுத்தர வர்க்கத்தினர் பற்றிய ப.சிதம்பரம் கருத்துக்கு அரசியல் கட்சிகள் கண்டனம்

விலைவாசி பிரச்சினையில் நடுத்தர வர்க்கத்தினர் பற்றிய ப.சிதம்பரம் கருத்துக்கு, பல்வேறு அரசியல் கட்சிகள் கண்டனம் தெரிவித்து உள்ளன.

ஐஸ்கிரீம்-தண்ணீர்பாட்டில்

மத்திய உள்துறை மந்திரி ப.சிதம்பரம் நேற்று முன்தினம் பெங்களூரில் பேட்டி அளித்தபோது விலைவாசி பிரச்சினை பற்றி கருத்து தெரிவித்தார்.

அப்போது அவர், ஐஸ்கிரீம் வாங்க 20 ரூபாயும், தண்ணீர் பாட்டில் வாங்க 15 ரூபாயும் செலவிட தயாராக இருக்கும் மக்கள், அரிசி அல்லது கோதுமைக்கு ஒரு ரூபாய் அதிகமாக கொடுக்க எதிர்ப்பு தெரிவிக்கிறார்கள்'' என்று கூறி இருந்ததாக தகவல் வெளியாகி இருந்தது.

பா.ஜனதா கண்டனம்

ப.சிதம்பரத்தின் இந்த கருத்து, நடுத்தர வர்க்க மக்களை அவதூறு செய்வதாகும் என்று, பா.ஜனதா செய்தி தொடர்பாளர் ராஜீவ் பிரதாப் ரூடி உடனடியாக கண்டனம் தெரிவித்து இருந்தார். மத்திய அரசுக்குள் நிலவும் முரண்பாடுகளை எதிரொலிக்கும் கருத்து இது என்றும் அவர் குற்றம் சாட்டினார். பா.ஜனதா கட்சியின் தலைமை செய்தித்தொடர்பாளர் ரவிசங்கர் பிரசாத் கூறும்போது, "இது ஒரு இதயமற்ற அரசு, உணர்வுபூர்வமற்ற அரசு. சிதம்பரத்தின் கருத்து மக்களின் காயத்தின் மீது உப்பை தடவுவது போல் உள்ளது'' என்றார்.

பா.ஜனதாவின் மற்றொரு செய்தித்தொடர்பாளரான ஷாநவாஸ் ஹுசேன், "ஏர்கண்டிஷன் அறைகளில் தங்கும், விமானத்தில் பறக்கும் ப.சிதம்பரத்துக்கு சாதாரண மக்களின் வலியை புரிந்து கொள்ள முடியாது'' என்று கூறி இருக்கிறார். "ஏறத்தாழ 60 கோடி மக்கள் வறுமைக்கோட்டிற்கு கீழே உள்ள ஒரு நாட்டில், அவருடைய கருத்து நகைச்சுவையாக உள்ளது என்றும்'' அவர் குறிப்பிட்டார்.

தேசியவாத காங்கிரஸ்

காங்கிரசின் கூட்டணி கட்சியான தேசியவாத காங்கிரசின் செய்தி தொடர்பாளர் டி.பி.திரிபாதி, "ப.சிதம்பரம் போன்ற அறிவாற்றல், பண்பாடு நிறைந்த ஒருவரிடம் இருந்து இதுபோன்ற கருத்து வந்திருப்பது எதிர்பாராதது. இந்தியாவில் உள்ள சாதாரண மக்களும் ப.சிதம்பரம் போல் வளமுடன் வாழ விரும்புகிறேன்'' என்று கூறி இருக்கிறார்.

ஐக்கிய ஜனதா தளம்

ஐக்கிய ஜனதா தளம் கட்சியின் தலைவர் சரத்யாதவ், "ப.சிதம்பரத்தின் கருத்து சரிதான்'' என்று கிண்டலாக குறிப்பிட்டு இருக்கிறார். "அவர் சரியாகத்தான் கூறி இருக்கிறார். அவர் சொன்னதில் என்ன தவறு இருக்கிறது? ஆனால், சிதம்பரம் `வர்த்தக சந்தை' சக்திகளின் ஆதரவாளர். எனவேதான், அவர்களுக்கு ஆதரவாக ஐஸ்கிரீம் விலையை உவமையாக கூறி இருக்கிறார். எத்தனை ஏழைகள் ஐஸ்கிரீம் சாப்பிடுகிறார்கள்?'' என்றும் சரத்யாதவ் கூறி இருக்கிறார்.

விலைவாசி பிரச்சினையில் நடுத்தர வர்க்கத்தினரை ஏளனம் செய்யவில்லை - ப.சிதம்பரம் விளக்கம்

விலைவாசி பிரச்சினையில் நடுத்தர மக்கள் பற்றிய ப.சிதம்பரத்தின் கருத்துக்கு விளக்கம் அளித்து, உள்துறை அமைச்சகம் சார்பில் நேற்று அறிக்கை வெளியிடப்பட்டது. அதில், "மந்திரியின் கருத்து ஊடகங்களால் திரித்து வெளியிடப்பட்டு இருப்பது அவருக்கு அதிர்ச்சி அளிப்பதாகவும், விலைவாசி பிரச்சினையில் நடுத்தர வர்க்கத்தினரை அவர் குற்றம் சொல்லவோ அல்லது ஏளனமாகவோ கருத்து எதுவும் சொல்லவில்லை'' என்றும் குறிப்பிடப்பட்டு உள்ளது.

ப.சிதம்பரத்தின் கருத்து தவறாக புரிந்து கொள்ளப்பட்டு இருப்பதாக குறிப்பிடப்பட்டு உள்ள அந்த அறிக்கையில், ப.சிதம்பரம் பேட்டியின்போது `நாம்' என்ற வார்த்தையைத்தான் பயன்படுத்தினார் என்றும், "விலைவாசி பற்றி அவர்கள் ஏன் அளவுக்கு அதிகமாக குரல் எழுப்புகிறார்கள்?'' என்ற வார்த்தைகளை அவர் பயன்படுத்தவில்லை என்றும் கூறப்பட்டு இருக்கிறது.

தினத்தந்தி

இந்த சிதம்பரம் காலத்தின் கட்டாயம்... இவர்கள் எல்லாம் விரட்டியடிக்கப்பட வேன்டியவர்கள்